BEƊEA 35
Sãwã bio quĩcha jʉrʉɗida
Jũmarãba bio quĩcha jʉrʉɗida panʉa ewariza. Dadjirãba crĩcha panʉra poya carebaida ne bia crĩchai carea idjaɓa careba ɓʉda dji biarã panani carea Jeowame. Maʉ̃ne jaraɗida, dadjirãba crĩchaɗida panʉa sãmaare pananida, cãrẽda trajaɗida idjaɓa caime mĩã cãĩnida. Bio crĩcha jʉrʉ panʉbʉrʉ cãrẽda oɗida, jãʉ̃gʉba poya carebaida ɓʉsriɗa panani carea idjaɓa capipia ɓei carea Jeowaa.
1. ¿Sãwã careba ɓʉda Bibliaba bio quĩcha jʉrʉɗi carea?
Ne baridua oi naẽna, ʉ̃taa dji iwiɗida Jeowaa. Idjaɓa jʉrʉdua Ãcõrẽ Beɗeaɗe idjia quĩcha ɓʉra (Leadua Proverbios 2:3-6). Eɗauɗe Jeowaba ebuɗa jara ɓʉda cãrẽda oida ɓʉ. Jãʉ̃gʉra mãwãbʉrʉɗe ara maʉ̃ quĩrãca ĩjã odua.
Baribʉrʉ, ¿cãrẽda poya oɗida Ãcõrẽ Beɗeara ebuɗa jaraẽ́ ɓʉbʉrʉ cãrẽda oɗida panʉ? Bʉa poya quĩrãnebaida Ãcõrẽba jarabʉrʉɗe “jipa wãida mʉ̃ oɗe cawamãrẽã sãmaare wãida” (Isaías 48:17). ¿Idjia sãwã carebaida? Idjia poya carebaida idji beɗeaɗeba. Dji beɗea wãrãda Ãcõrẽ Beɗeaɗebemada careba ɓʉda cawaɗi carea Jeowaba quĩcha ɓʉra idjaɓa idjia quĩrĩã ɓʉra. Jãʉ̃gʉɗeba poya cawaɗida Ãcõrẽ Beɗea lea ɓʉɗe. Cawa panʉbʉrʉ Jeowaba quĩcha ɓʉra jãʉ̃gʉba jãwã careba ɓʉda ne bia oɗi carea.
2. ¿Cãrẽda oidabara ɓʉ ne baridua oi naẽna?
Ãcõrẽ Beɗeaba jara ɓʉda “ẽberã cawa ɓʉbara quĩrãcuita acʉ ɓʉda cãrẽda oida” (Proverbios 14:15). Jãʉ̃ jãwã jara quĩrĩã ɓʉda ne baridua oi naẽna quĩrãcuita quĩchaɗida panʉ cãrẽ ne awara poya oɗida. Naẽna bʉduɓa ididua: “¿Sãʉ̃gʉ beɗeaba wãrãda Ãcõrẽ Beɗeaɗebemada poya carebaida ne bia oi carea? ¿Cãrẽda poya oida mʉ̃ quĩcha necai ɓamãrẽã? ¿Dewararãba cãrẽda poya quĩchaɗida unu panʉne mʉ̃a oira? Idjaɓa ¿Jeowaba sãwã unuida mʉ̃a oira?” (Deuteronomio 32:29).
Jeowaba dadjía jaraida ɓʉda cãrẽda dji biada idjaɓa cãrẽda dji biaẽ́da. Bio cawa panʉbʉrʉ idjaɓa ĩjã panʉbʉrʉ Ãcõrẽ leyra idjaɓa beɗea wãrãda Ãcõrẽnebemada bia quĩchaɗida. Quĩcha jipa eroɓʉa bʉ́a jaraida sãʉ̃gʉda dji biada idjaɓa sãʉ̃gʉda dji biaẽ́da; wa bʉa obʉrʉɗe za ɓʉda jipa o ɓʉda wa jipa oẽ́ ɓasida (Romano 2:14, 15). Bia quĩcha panʉbʉrʉ Ãcõrẽ quĩrãca jãʉ̃gʉba poya carebaida dadjirãa ne bia oɗi carea.
BIO CAWAƊIDA NAɄ̃ BEƊEAƊE
Bio quĩrãcuita ununida cãrẽã biara ɓʉda dji beɗea wãrã Ãcõrẽ Beɗeaɗebema idjaɓa cãrẽã bio quĩchaɗida panʉa ne baridua oɗi naẽna.
3. Iduaribibarida Ãcõrẽ Beɗeaba jipa edemãrẽã
¿Sãwã careba ɓʉda dji beɗea wãrã araba Ãcõrẽ Beɗeaɗebemada ne baridua oi naẽna? Acʉɗapeɗa dji VIDEODA, beɗeaɗadua:
¿Jeowaba cãrẽda iduaribi ɓʉda dadjirãa?
¿Cãrẽã Jeowaba iduaribi ɓʉda dadjirãba oɗida dadjia quĩcha panʉra?
¿Cãrẽneba Ãcõrẽba careba ɓʉda dadjirãa ne bia oɗi carea?
Unui carea aɓa beɗea wãrãda Ãcõrẽ Beɗeaɗebemada, leaɗadua Epeso 5:15, Leaɗacarea beɗeaɗadua cãrẽ ne bia oɗida panʉ...
... leaɗi carea Ãcõrẽ Beɗea ewariza.
... biara panani carea dji cuariarãme.
... ãbaa jʉreɗi carea dadji djabarãme.
4. Bio cawaɗapeɗa quĩcha jʉrʉɗida
Bibliaba ebuɗa jara ɓʉra jãʉ̃gʉra poya oicha ɓʉda oi careara. Baribʉrʉ Ãcõrẽ Beɗeaba ebuɗa jaraẽ́ ɓʉbʉrʉ, ¿bʉa cãrẽda oida? Acʉɗapeɗa dji VIDEODA, beɗeaɗadua.
Jãʉ̃ videoɗe ununa quĩrãca, ¿dadji djabawẽrãba cãrẽda osida bia quĩchai carea idjaɓa ne bia oi carea Jeowaba quĩrĩã ɓʉ quĩrãca?
¿Cãrẽã idiɗaẽ́da dewaraa cãrẽda oɗida bara panʉda? Leaɗapeɗa Hebreo 5:14, beɗeaɗadua:
Eɗauɗe dadjirãmaarã oicha ɓʉa dewararãba jarabʉdaɗe cãrẽda oida ɓʉ, ¿cãrẽã quĩchaɗida dadjiduɓa sãʉ̃gʉda dji biada idjaɓa sãʉ̃gʉda dji biaẽ́da?
¿Cãrẽba poya carebaida bia quĩchai carea idjaɓa ne bia oi carea?
Quĩcha biara mapa quĩrãca ɓʉda, jãʉ̃gʉba cawabi ɓʉda sãmaare wãida
5. Wayadua dewararãba quĩcha panʉra
Jũmarãba awara quĩcha panʉda, awara awara panʉ bẽrã. ¿Sãwã acʉbi panʉda bio waya panʉda dewararãba quĩcha panʉra? Acʉɗida ejemplo umé:
Ejemplo 1: Djabawẽrã aɓa colorete pãya ɓʉda idjira wãsida dewara congregacioʉ̃na, baribʉrʉ jãmara djabawẽrãrãra colorete pãnaca bẽrã, maʉ̃ bʉrʉ biẽ́ quĩchasiɗada.
Leaɗapeɗa Romano 15:1 idjaɓa 1 Corinto 10:23, 24, beɗeaɗadua:
Naʉ̃gʉ textoba jara ɓʉ quĩrãca, ¿dadji djabawẽrãba cãrẽda poya oi ɓasida? ¿Bʉa cãrẽda oibarai bʉa quĩcha ɓʉra dewaramaarã biẽ́ ɓʉda idjaɓa jãʉ̃gʉba idu quĩchabiẽ́da bʉa o quĩrĩã ɓʉra?
Ejemplo 2: Aɓa djababa cawa ɓʉda chicha asea doira jãʉ̃ra Ãcõrẽ Beɗeaba wãga acada, baribʉrʉ idjia aɓeɗa quĩcha ɓʉda waa doẽ́da chicha aseara. Ewari aɓaʉɗe djabarãba edecasiɗada capipiabi carea maʉ̃ne unu ɓʉda dewararãba do panʉda chicha aseada.
Leaɗapeɗa Eclesiastés 7:16 idjaɓa Romano 14:1, 10, beɗeaɗadua:
Naʉ̃gʉ textoba jara ɓʉ quĩrãca, ¿dadji djababa cãrẽdrʉ poya oibara ɓasida? ¿Bʉa cãrẽda oibarai bʉ quĩchamaarã biẽ́ ɓʉda, baribʉrʉ dewaraʉba o ɓʉra jãʉ̃ra?
¿Cãrẽda oida ɓʉ ne bia quĩcha jʉrʉi carea?
1. Ididua Jeowa carebamãrẽã bʉ́a cawai carea cãrẽ oida (Santiago 1:5).
2. Jʉrʉdua Ãcõrẽ Beɗeaɗe idjaɓa carta zaque Ãcõrẽ Beɗeaɗebemaneba cãrẽda oi carea. Idjaɓa poya idida djabarã crĩcha droma ɓeaa.
3. Quĩchadua bʉa o ɓʉba carebaida dewararãra wa biẽ́ quĩchabida dewararãra.
ẼBERÃRÃBA JARA PANɄRA: “Bʉa oida bʉdjia quĩrĩãda. ¡Beɗeaẽ́da dewararãba quĩchabadara!”.
¿Cãrẽã quĩchaɗida panʉda Ãcõrẽba quĩcha ɓʉra idjaɓa dewararãba quĩchabada siɗa?
JŨMA BEƊEAƊA
Bio quĩcha jʉrʉɗida dadjirãba cawa panʉne Jeowaba quĩcha ɓʉra idjaɓa quĩchaɗida dadjirãba o panʉba poya carebaida wa carebaẽ́da dewararãra.
Cawaɗara
¿Bʉa bio quĩcha jʉrʉida Jeowaba quĩrĩã ɓʉ quĩrãca?
¿Cãrẽda oidabara ɓʉ quĩcha jipa ɓai carea?
¿Bʉa sãwã poya acʉbi ɓʉda waya ɓʉda dewarara quĩchara?
CAWADUA MÃSA
¿Bʉa sãwã quĩchaida dji bia ɓai carea Ãcõrẽme?
“Bio quĩcha jʉrʉɗida wayaɗi carea Ãcõrẽra” (Cartaba Jara ɓʉda, 2011, Abril 15)
Cawadua sãwãbʉrʉ ʉ̃rãga biada dia ɓʉda Jeowaba.
Cawadua cãrẽba carebasida umaquĩrãra ne bia oi carea zarea ɓasimĩna.
Unudua sãwã sentibi ɓʉda Jeowaba ebuɗa unubi ɓʉẽ́mĩna dji leyɗeba.
“¿Ewariza necesita panʉda ley Ãcõrẽ Beɗeaɗebemada?” (Cartaba Jara ɓʉda, 2003, Diciembre 1)