BEƊEA 57
¿Cãrẽda mãwãida bʉa bio ne cadjiruada oibʉrʉ?
Bʉa bio quĩrĩã ɓʉmĩna Jeowara idjaɓa ĩjã quĩrĩã ɓʉ idjira, eɗauɗe ne cadjirua poya oida. Zocãrã cadjiruara ɓʉda, aɓa ɓʉmĩna jãʉ̃ cãyãbara biara cadjiruara ɓʉda (1 Corinto 6:9, 10). Quĩrãnebadua, bʉa cadjirua oɗamĩna Jeowaba waɗi quĩrĩã ɓʉda; idjia careba quĩrĩã ɓʉda idjaɓa poya quĩrãdoaida bʉ ne cadjirua oɗaba.
1. ¿Cãrẽda oɗida panʉ Jeowaba quĩrãdoamãrẽã dadji ne cadjirua?
Ẽberãba quĩrĩã ɓʉbʉrʉ Jeowara, ne cadjirua oibʉrʉ bio sopuabarida. Maʉ̃ba idjia careba quĩrĩã ɓʉda, maʉ̃ carea Jeowaba idji purua jarasia: “Bãrã ne cadjiruara purea ɓʉmĩna, torroa ɓaida nieve quĩrãca” (Isaías 1:18). Ẽberãba bio sopua ɓʉbʉrʉ idji ne cadjirua oɗa carea, Jeowaba poya quĩrãdoaida jãʉ̃ ne cadjirua. ¿Cãrẽda jara quĩrĩã ɓʉda ne cadjirua oɗa carea sopua ɓaida? Jãʉ̃ra jãwã jara quĩrĩã ɓʉda bio sopua ɓʉda ne cadjirua oɗa carea, waa oẽ́da ne cadjirua oɗara idjaɓa ʉ̃taa dji idida Jeowa quĩrãdoamãrẽã jãʉ̃ ne cadjirua. Maʉ̃ bʉrʉ esfuerzo oɗida panʉa dadji crĩcha awara oi carea idjaɓa ne cadjiruara igarai carea, maʉ̃ cãyãbara ĩjã oɗida Jeowaba jara ɓʉra (Leadua Isaías 55:6, 7).
2. ¿Dadjirãba ne cadjirua o panʉbʉrʉ Jeowaba sãwã careba ɓʉda djabarã wagabadarãneba?
Aɓaʉba ne cadjirua oibʉrʉ, Jeowaba jara ɓʉda cãrẽda oida ɓʉ, idjia jara ɓʉda “djabarã wagabadarãda trʉ̃ida ɓʉa” (Leadua Santiago 5:14, 15). Jeowaba ɓʉsida djabarã wagabadarãra Ãcõrẽ jaureɗeba. Maʉ̃ bẽrã ãdjirãba poya carebaɗida dadjirãba ne cadjirua oɗibʉrʉ wãya ara caita pananamãrẽã Jeowame (Galata 6:1).
¿Djabarã wagabadarãba sãwã poya carebaɗida dadjirãra ne cadjirua waiɓʉa oɗibʉrʉ? Umé wa ũbea ãdjirãnebemada carebaɗida dadjirãra Ãcõrẽ Beɗeaɗeba cawaɗamãrẽã cãrẽ cãrẽã dadjirãba oɗara bio biẽ́ ɓasida. Ãdjirãba sobiabibarida idjaɓa beɗea bia jaraɗida ẽberãba ne cadjiruara oɗa amaaba. Baribʉrʉ ẽberãba ne cadjirua oɗaba idjia sopua crĩchaẽ́bʉrʉ idjia oɗa carea, dadji djabarã wagabadarãba idjira jaraɗida ãbaa jʉreẽ́da congregacioʉ̃nebemame, wagaɗi carea dewara djabarãra.
BIO CAWAƊIDA NAɄ̃ BEƊEAƊE
Bio cawadua idjaɓa bia unudua Jeowaba o ɓʉra carebamãrẽã aɓaʉba cadjiruara oibʉrʉ.
3. Dadjirãba jara panʉbʉrʉ dai ne cadjirua oɗaba poya carebaida dadjirãa
Ne baridua cadjirua dadjirãba o panʉra sobiabiẽ́ ɓʉda Jeowara, maʉ̃ bʉrʉ dadjirãba ne cadjiruada osiɗabʉrʉ jaraɗida panʉa. Leaɗapeɗa Salmo 32:1-5, beɗeaɗadua:
¿Cãrẽ cãrẽã bio biara ɓʉda jaraɗida Jeowaa dadjirãba ne cadjirua o panʉra idjaɓa cãrẽã biaẽ́ ɓʉda ne cadjirua mẽrãida?
Dadjirãba jaraɗida panʉa Jeowaa dadji ne cadjirua oɗara idjaɓa beɗeaɗida panʉa djabarã wagabadarãme ãdjirãba carebamãrẽã. Acʉɗapeɗa dji VIDEODA, beɗeaɗadua.
Naʉ̃ videoɗe ununa quĩrãca, ¿sãwã carebasiɗada djabarã wagabadarãba Canonba wãya zesiɗe Jeowamaa?
Dadjirãba beɗea panʉne djabarã wagabadarãme bio biara ɓʉda jũma wãrãda jaraɗida, ãdjirãba poya carebaɗi carea. Leaɗapeɗa Santiago 5:16, beɗeaɗadua:
Bʉmaarã, ¿dadjirãba wãrãda jara panʉbʉrʉ djabarã wagabadarãa ãdjirãba poya carebaɗida? ¿Cãrẽã?
Jaradua bʉ ne cadjirua oɗara, wãrãda jaradua beɗea ɓʉɗe djabarã wagabadarãme idjaɓa iduaribiɗa Jeowaba carebamãrẽã
4. Jeowara quĩrã djuburiabaria ne cadjirua opeɗaɗarãa
Aɓaʉ djababa congregacioʉ̃nebemada ne cadjirua waiɓʉada oɗabʉrʉ idjaɓa Jeowa beɗea ĩjã quĩrĩãẽ́bʉrʉ poya ãbaa jʉreẽ́da congregacioʉ̃ne. Maʉ̃ bẽrã jãʉ̃ ẽberãme ãbaa poya ɓaẽ́da. Leaɗapeɗa 1 Corinto 5:6, 11 beɗeaɗadua:
Jãma jara ɓʉ quĩrãca harina ẽsãbibari maãrĩ ɓʉba harinara jũma ẽsãbibarida, mãwãmĩna congregacioʉ̃nebema ẽberãba ne cadjirua oɗada, idjia sopua crĩchaẽ́bʉrʉ, ¿cãrẽã biara ɓʉda jãʉ̃ ẽberãme ãbaa jʉreẽ́da?
Jeowara quĩrã djuburia bari bẽrã, djabarã wagabadarãba careba panʉda ne cadjirua opeɗaɗarãa, congregacioʉ̃ne ãbaa jʉre panʉẽ́mĩna. Eɗauɗe ãdjirãba jẽda ãbaa jʉreɗe ze panʉda congregacioʉ̃ne. ¿Cãrẽ cãrẽã? Jãʉ̃ra zarea ɓasimĩna idjaɓa sopua ɓaɗamĩna ãdjirãmaarã, jãʉ̃ra ãdjia bia quĩchasiɗaa bia ĩjãni carea Jeowara idjaɓa congregacioʉ̃nea ɓai carea (Salmo 141:5).
Ne cadjirua opeɗaɗara congregacioʉ̃ne ãbaa jʉre panʉẽ́mĩna, Jeowaba bio careba ɓʉda. ¿Jãʉ̃ba jara quĩrĩã ɓʉda Jeowara quĩrã djuburiabaria? ¿Cãrẽã bʉa jãʉ̃ jãwã jara ɓʉda?
5. Dadjirãba sopua pananibʉrʉ Jeowaba quĩrãdoaida dadji ne cadjiruara
Jesuba ne jara ɓʉɗeba jaradiasida sãmasa Jeowaba crĩcha ɓʉda ẽberã cadjirua oɗada sopua ɓʉɗe. Leaɗapeɗa Luca 15:1-7, beɗeaɗadua:
Za ɓʉ nẽbʉrʉɗada, ¿cãrẽda cawabi ɓʉda Jeowaɗebemada?
Leaɗapeɗa Ezequiel 33:11, beɗeaɗadua:
¿Cãrẽda oɗida panʉ acʉbiɗi carea wãrã arada dadji soɗeba sopua panʉda ne cadjirua oɗa carea?
Jeowara oveja wagabari quĩrãca ɓʉda. Bio sopua ɓʉda ẽberãrã carea
ẼBERÃRÃBA JARA PANɄRA: “Mʉ̃ra waya ɓʉda djabarã wagabadarãme beɗeai carea. Mʉ̃a nẽbʉrʉibʉrʉ mʉ̃ ne cadjirua oɗada, mʉ̃ra poya ãbaa jʉreẽ́da congregacioʉ̃ne”.
¿Bʉa cãrẽda jaraida aɓaʉba jãʉ̃gʉda jaraibʉrʉ?
JŨMA BEƊEAƊA
Dadjirãba ne cadjirua waiɓʉa o panʉmĩna, sopua pananibʉrʉ idjaɓa waa oɗaẽ́bʉrʉ, Jeowaba quĩrãdoaida dadji ne cadjiruara.
Cawaɗara
Dadjirãba ne cadjirua osiɗabʉrʉ, ¿cãrẽã jaraɗida panʉda Jeowaa?
¿Cãrẽda oɗida panʉ Jeowaba quĩrãdoamãrẽã dadji ne cadjirua?
Ne cadjirua waiɓʉa osiɗabʉrʉ, ¿cãrẽ cãrẽã beɗeaɗida panʉ djabarã wagabadarãme?
CAWADUA MÃSA
Acʉdua umaquĩrãba cãrẽda osida Ãcõrẽba quĩrãdoamãrẽã dji ne cadjirua, Ãcõrẽ Beɗeaba jara ɓʉ quĩrãca Isaías 1:18ɗe.
¿Djabarã wagabadarãba sãwã careba panʉda ne cadjirua opeɗaɗarãa?
“Sãwã djabarãba quĩrĩã unubipanʉda ẽberãba ne cadjirua obumina” (Cartaba Jara ɓʉda, Agosto 2024ɗe)
Cawadua djabarãba quĩrĩãneba careba panʉda ne cadjirua obadarãa, idjaɓa quĩrã djuburia panʉda.
Dji nẽbʉrʉɗada “Mʉ̃a quĩrĩã ɓasida wãya wãi carea Jeowamaa”, jãma poya cawaida umaquĩrãba sãwã senti ɓasida jẽda wãsiɗe congregacioʉ̃ra.
“Bibliara cawaɗapeɗa awara panesiɗaa” (Cartaba Jara ɓʉda, 2012, Abril 1)