Religioʉ̃ sewaida ɓeaba unubi panʉda Ãcõrẽra cadjiruada

Ãcõrẽba bio quĩrĩã ɓʉbʉrʉ dadjirãa idjaɓa religioʉ̃ sewaida ɓeara Ãcõrẽ trʉ̃neba beɗea panʉbʉrʉ, ¿cãrẽ cãrẽã ne cadjirua obada? Jãʉ̃gʉ religioʉ̃ra sewa jarabada bẽrã; ãdjia o panʉba unubi ɓʉda Ãcõrẽra cadjiruada. Jãʉ̃ religioʉ̃bara ¿sãwã obada jãʉ̃ cadjiruada? ¿Ãcõrẽba sãwã senti ɓʉ ãdji oɗa carea? Idjaɓa ¿cãrẽda o quĩrĩã ɓʉ ãdjirãme?

1. ¿Religioʉ̃ sewaida ɓearãba sãwã unubi panʉ Ãcõrẽra cadjiruada ãdjia jaradia panʉneba?

Religioʉ̃ sewaida ɓeaba “wãrã Ãcõrẽda igaraɗapeɗa sewadrʉ ẽpẽ panesiɗaa” (Romano 1:25). Ejemploda, zocãrã religioʉ̃ba jaradiaɗacada Ãcõrẽ trʉ̃ra, baribʉrʉ Ãcõrẽ Beɗeaba jara ɓʉda Ãcõrẽ trʉ̃ra jaraɗida panʉa (Romano 10:13, 14). Sacerdote bororãba jara panʉra djuburia panʉne Ãcõrẽneba. Baribʉrʉ jãʉ̃ra sewada. Jũma ne cadjirua mãwã panʉra Ãcõrẽba diacada (Leadua Santiago 1:13). Maʉ̃ bʉrʉ zocãrã ẽberãrãba igaraɗa Ãcõrẽra.

2. ¿Religioʉ̃ sewaida ɓeaba cãrẽda obada unubiɗi carea Ãcõrẽra cadjiruada?

Religioʉ̃ sewaida ɓeaba biẽ́ obadaa ẽberãrãa, Jeowaba quĩrãca oɗaẽ́da. Ãcõrẽ Beɗeaba jara ɓʉda “ãdji cadjiruara mõgara pã buebʉda quĩrãca bajãnaa jũẽsia” (Apocalipsi 18:5). Dãrãbʉrʉɗe eɗa religioʉ̃ sewaida ɓearãba ãbaa trajabadaa ẽjũãnebema bororãme, careba djõbada idjaɓa zocãrã ẽberãrãra beabibarida. Sacerdote bororãba idibadaa parata ne zocãrã eroɓeaɗi carea. Ãdjirãba o ɓaɗara acʉbi panʉda adua panʉda Ãcõrẽra, maʉ̃ bẽrã ãdjirã Ãcõrẽnebemaẽ́a (Leadua 1 Juaʉ̃ 4:8).

3. ¿Ãcõrẽba sãwã senti ɓʉ dji religioʉ̃ sewaida ɓeaba obada bẽrã?

Bʉa biẽ́ senti ɓʉbʉrʉ ãdjia obada bẽrã, ara maʉ̃ quĩrãca Ãcõrẽrã sopua ɓʉda. Idjia bio quĩrĩã ɓʉda ẽberãrãa, baribʉrʉ quĩrũ nũmʉda religioʉ̃ sewaida ɓearame unubi panʉ bẽrã idjira cadjiruada idjaɓa ãdjirãba cadjirua obada bẽrã ẽberãrãa. Ãcõrẽba jara ɓʉ religioʉ̃ sewaida ɓeara jõbiya idjaɓa “waa ununaẽ́a” (Apocalipsi 18:21). Dãrãẽ́ne jũma religioʉ̃ sewaida ɓearãra jõbiya (Apocalipsi 18:18).

BIO CAWAƊIDA NAɄ̃ BEƊEAƊE

4. Ãcõrẽba bia unuẽ́da jũma religioʉ̃ra

Zocãrã baraa quĩchabadaa religioʉ̃ra o zocãrã ɓʉ quĩrãca ɓʉda Ãcõrẽmaa jũẽi careara. Baribʉrʉ, ¿jãʉ̃ra wãrãda? Leaɗapeɗa Mateo 7:13, 14, beɗeaɗadua:

• ¿Ãcõrẽ Beɗeaba jara ɓʉ quĩrãca Ãcõrẽ ora sãwãbʉrʉ ɓʉda dãrã zocai panani carea?

Acʉɗapeɗa dji VIDEODA, beɗeaɗadua.

VIDEO: ¿Ãcõrẽba bia unu ɓʉda jũma religionera? (djubibi ɓʉ) (3:22)

• ¿Ãcõrẽ Beɗeaba jara ɓʉda Ãcõrẽba bia unu ɓʉda jũma religioʉ̃ra?

5. Religioʉ̃ sewaida ɓeaba unubi panʉẽ́da Ãcõrẽ quĩrĩãra

Religioʉ̃ sewaida ɓeaba unubi panʉda Ãcõrẽra cadjiruada, jãʉ̃ra jãwã o panʉda ne zocãrãneba. Ne jara ɓʉ quĩrãca, ãdjirãba careba panʉda djõ panʉneba, jãʉ̃gʉ cawai carea acʉɗapeɗa dji VIDEODA, beɗeaɗadua.

VIDEO: Religioʉ̃ sewaida ɓeaba o ɓaɗara dji Segunda Guerra Mundialɗe (2:22)

• ¿Ʉ̃cʉrʉ religioʉ̃ra caime panabadjiɗa Segunda Guerra Mundialɗe?

• ¿Bʉa cãrẽda quĩcha ɓʉ ãdjirãba oɗaɗeba?

Leaɗapeɗa Juaʉ̃ 13:34, 35 idjaɓa 17:16, beɗeaɗadua:

• ¿Cãrẽda sentida ɓʉ Jeowa religioʉ̃ sewaida ɓeaba careba panʉneba djõbadara?

• Religioʉ̃ sewaida ɓeaba zocãrã ne cadjirua obadaa, Ãcõrẽ quĩrãca oɗacaa. ¿Bʉa cãrẽda unubada jãʉ̃gʉɗebema?

6. Ãcõrẽba ẽdrʉ eda quĩrĩã ɓʉda ẽberãrãra jãʉ̃ religioʉ̃ sewaida ɓeaɗebemara

Leaɗapeɗa Apocalipsi 18:4,a beɗeaɗadua:

• Ãcõrẽba ẽdrʉbi quĩrĩã ɓʉ ẽberãrãa religioʉ̃ sewaida ɓearaɗebema cũrũgaɗa bẽrã, ¿bʉmaarã sãwã ɓʉda jãʉ̃ra?

7. Mĩga cawadua Ãcõrẽ wãrãda

Religioʉ̃ sewaida ɓeaba bio cadjirua oɗa bẽrã, ¿bʉa biẽ́ unumʉca Ãcõrẽra? Quĩchadua warrada ũrĩ quĩrĩãẽ́ ɓʉa idji zeza ʉ̃rãga biada, idji deɗebema wãpeɗa biẽ́ wãida. Dji zezaba dji warra o ɓʉra quĩrĩãẽ́ ɓʉbʉrʉ, ¿dji zeza cuentaɗeba idji warra biẽ́ wãbʉrʉca?

• ¿Dadjirãba poya jaraɗida Ãcõrẽ cuentaɗeba religioʉ̃ sewaida ɓeaba cadjirua obada, maʉ̃ bʉrʉ cawaira mãsa Ãcõrẽnera idu ɓʉida?

JŨMA BEƊEAƊA

Religioʉ̃ sewaida ɓeaba unubi panʉda Ãcõrẽra cadjiruara, ne zocãrã cadjirua o ɓaɗa bẽrã. Maʉ̃ bʉrʉ Ãcõrẽba ãdjirãra jõbiya.

Cawaɗara

• ¿Bʉa cãrẽ quĩcha ɓʉ religioʉ̃ sewaida ɓeaba obadara idjaɓa jarabadara?

• ¿Jeowaba cãrẽda quĩcha ɓʉ religioʉ̃ sewaida ɓearaɗebema?

• ¿Ãcõrẽba cãrẽda oida religioʉ̃ sewaida ɓearame?

CAWADUA MÃSA

Ãcõrẽba quĩrĩãcada jũma religioʉ̃ra, acʉdua cãrẽã.

“¿Jũma religioʉ̃ra careba panʉda ara caita pananamãrẽã Ãcõrẽme?” (Acʉdua internene)

¿Cãrẽ cãrẽã Jeowaba quĩrĩã ɓʉda bia beɗeaɗida idjira ãbaa dewararãme?

“¿Pananibara ʉ̃cʉrʉ religioʉ̃ne?” (Acʉdua internene)

Sacerdote aɓa ĩjãẽ́badjida idji religioʉ̃nebema. Baribʉrʉ cawasida dji wãrãda Ãcõrẽnebema.

“Aɓaʉ sacerdoteba amesida idji iglesiara” (¡Despertad!, 2015, Febrero)

Dãrãbʉrʉɗe eɗa ʉ̃cʉrʉ religioʉ̃ra sewa jarabadaa Ãcõrẽnebemada idjaɓa jarabadaa idjia quĩrĩãcada ẽberãrãa. Acʉdua jãʉ̃ ũbea sewara sãmaʉba zesiɗada.

“Sewaba igarabibarida Ãcõrẽra” (Cartaba Jara ɓʉda, 2013 Noviembre 1)