BEƊEA 42
¿Casa jara ɓʉda Bibliaba ẽberã iduɓa ɓea idjaɓa mĩã cãĩnarã siɗa?
Ʉ̃cʉrʉ ẽberãrãba quĩchabadada mĩã cãĩbʉrʉ capipia ɓaida. Baribʉrʉ jũma mĩã cãĩ panʉra capipia pananaẽ́da, ni jũma iduɓa ɓeara sopua panʉẽ́da. Maʉ̃ bẽrã Ãcõrẽ Beɗeaba jara ɓʉda bia ɓʉda mĩã cãĩ panʉra idjaɓa ẽberãduɓa ɓea jũma Ãcõrẽba ne bari diaɗa bẽrã.
1. ¿Cãrẽ cãrẽã biara ɓʉda ẽberãduɓa ɓʉra?
Ãcõrẽ Beɗeaba jara ɓʉ: “Wãrãda quima edabʉrʉba bia o ɓʉa. Baribʉrʉ [...] quima edaẽ́ba biara o ɓʉa” (Leadua 1 Corinto 7:32, 33, 38). ¿Cãrẽda jara quĩrĩã ɓʉda “biara o ɓʉa”? Ẽberãduɓa ɓea quima neẽ́ ɓʉ bẽrã sopuaẽ́da dji quima biya ɓai carea. Maʉ̃ carea ne zocãrã poya oɗida. Maʉ̃ne jaraɗida, ʉ̃cʉrʉ ẽberã iduɓa ɓeara poya wãnida awara purura Ãcõrẽ Beɗea jaradiaɗi carea. Ẽberãduɓa bẽrã poya zocãrã ewari eropananida dadji Ãcõrẽ carea maʉ̃ bʉrʉ poya ara caita pananida Jeowame.
2. ¿Cãrẽ cãrẽã biara ɓʉda mĩã cãĩda ley quĩrãpita?
Ẽberãduɓa ɓeara quĩrãca, dji mĩã cãĩnarãba ne zocãrã bia poya oɗida. Ãcõrẽ Beɗeaba jara ɓʉ: “Biara ɓʉda umé ɓʉda iduɓa ɓʉ cãyãbara” (Eclesiastés 4:9). Jãʉ̃ ẽberãba mĩã cãĩ panʉne, ley quĩrãpita idjia jarasia: mʉ̃a mʉ̃ quimara bio quĩrĩã ɓaida, bio waya ɓaida, mʉ̃a bia ĩjã o ɓaida idjaɓa mʉ̃ quimara nurẽmaza bia quĩrĩã eroɓaida. Mĩã cãĩnaẽ́ panʉ cãyãbara mĩã cãĩnada biara necaiẽ́ ara panʉda. Idjaɓa ẽberã mĩã cãĩ ɓʉɗe ley quĩrãpita, jãʉ̃gʉba careba ɓʉda dji zezera dji warrara siɗa dauperaɗira neẽ́ panani carea idjaɓa bio quĩrĩãni carea ãdjirãya.
3. ¿Jeowaba cãrẽda quĩchabarida mĩã cãĩ panʉnebemada?
Jeowaba naãrãbema ẽberãda mĩã cãĩbisiɗe dji wẽrãme idjia jarasia: “umaquĩrãba dji zezara, dji papa siɗa amepeɗa idji quima ume ãbaa ɓeya” (Genesi 2:24). Jeowaba quĩrĩãbarida ẽberã mĩã cãĩnara ãbaa ɓaida dji quimame aɓa beubʉrʉɗea. Ne baridua carea poya amaiẽ́ ɓʉda idji quimaa. Baribʉrʉ aɓaʉba poya amaida idji quimada dji quimaba daunemaibʉrʉ. Jãʉ̃ra mãwãbʉrʉɗe Jeowaba õgo obicada jãʉ̃ umaquĩrã wẽrãme cãĩmãrẽã, quimabʉrʉ cawa ɓʉa dji quima ne cadjirua oɗara quĩrãdoaida poya wãya ɓai carea dji quimamea (Mateo 19:9). Ẽberãba quima aɓa bʉ eroɓaida ɓʉa Jeowaba jara ɓʉ bẽrã (1 Timoteo 3:2).
BIO CAWAƊIDA NAɄ̃ BEƊEAƊE
Cawadua bʉa cãrẽda poya oida ɓʉsriɗa ɓai carea, beɗeaẽ́da mĩã cãĩ ɓʉbʉrʉ wa iduɓa ɓʉbʉrʉ idjaɓa capipiabibari Jeowaa.
4. Ne bia odua waɗi quima neẽ́ ɓʉ bʉrʉ
Jesumaarã iduɓa ɓeara ne bia dia ɓʉ quĩrãca ɓʉa (Mateo 19:11, 12). Leaɗapeɗa Mateo 4:23, beɗeaɗadua:
¿Jesura naʉ̃ ẽjũãne iduɓa ɓasiɗe cãrẽda osida carebamãrẽã dewara ẽberãrãra idjaɓa ĩjãmãrẽã dji Zezaa?
Dji critianorã iduɓa ɓeara poya capipia pananida ne bia o panʉbʉrʉ Jesu quĩrãca. Acʉɗapeɗa dji VIDEODA, beɗeaɗadua.
¿Critianoduɓa ɓʉba cãrẽda poya oida biya ɓai cãrẽã?
¿Cawa ɓasida?
Ãcõrẽ Beɗeaba jaraẽ́ ɓasida sãʉ̃be poya mĩã cãĩda. Baribʉrʉ jara ɓʉda dji quima “edaɗi naẽna” droaida, cũdra panʉ bẽrã jipa quĩchaɗaẽ́da, maʉ̃ cãyãbara aɓabe bʉrʉ poya quĩchaida isabe quima edaida cãĩ quĩrĩã panʉ bẽrã idjime (1 Corinto 7:36).
5. Quĩrãcuita acʉida ɓʉa caime poya mĩã cãĩbara ɓʉda
Quĩchaida bʉa caime mĩã cãĩ quĩrĩã ɓʉda, jãʉ̃gʉra bio biara ɓʉda. Leaɗapeɗa Mateo 19:4-6, 9, beɗeaɗadua:
¿Cãrẽ cãrẽã critiano bio quĩchaida ɓʉa mĩã cãĩ naẽna?
Ãcõrẽ Beɗeaba carebaida cawai carea mĩã cãĩ naẽna cãrẽda oibara ɓʉda dji quima bia eroɓai carea. Bʉa quima eda quĩrĩã ɓʉbʉrʉ jʉrʉida Ãcõrẽ Beɗea bio ĩjã ɓeada.b Leaɗadua 1 Corinto 7:39 idjaɓa 2 Corinto 6:14. Mãwãnacarea beɗeaɗadua:
¿Cãrẽã critiano aɓa ẽberãme mĩã cãĩ quĩrĩã ɓʉbʉrʉ poya jʉrʉida idji quĩrãca cawa ɓʉda Jeowaɗebemada?
¿Idjia mĩã cãĩbʉrʉ Ãcõrẽ adua ɓʉame Ãcõrẽra sãwãsa quĩchaida?
Ẽberãba néu uɗi carea pacada idjaɓa burroda edeɗibʉrʉ ãbaa ɓʉɗibʉrʉ bacurume trajaɗi carea ãdjirãra bio djuburia pananida. Ara maʉ̃ quĩrãca Jeowa beɗea ĩjãẽ́ ɓeame mĩã cãĩbʉrʉ idjia zocãrã beɗea dromara eroɓaida
6. Bio acʉida mĩã cãĩnara Jeowaba unu ɓʉ quĩrãca
Naẽna Israel puruɗe, ʉ̃cʉrʉba amasiɗada dji quimara ne baridua carea. Leaɗapeɗa Malaquías 2:13, 14, 16, beɗeaɗadua:
¿Cãrẽ cãrẽã Jeowaba bio quĩrãmabarida idji quimada carta mĩã amainebemada diaida, ãdji uméba daunemaiẽ́ panʉbʉrʉ?
Ẽberã aɓaʉba dji quimada amaibʉrʉ daunema ɓʉ carea, mãwãra dji quimara bio djuburia ɓaida idjaɓa dji warrara siɗa bio djuburia pananida
Acʉɗapeɗa dji VIDEODA, beɗeaɗadua.
Bʉda ara naʉ̃da mĩã cãĩ ɓʉbʉrʉ ĩjãẽ́ ɓeame Jeowaɗebemaẽ́me, ¿cãrẽda poya oida ɓʉsriɗa ɓai carea ɓʉ quimame?
7. Ĩjãdua Jeowaba jara ɓʉra mĩã cãĩnanebemada
Ʉ̃cʉrʉmaarã bio zarea ɓʉda ĩjãni carea Jeowaba jara ɓʉra mĩã cãĩnanebemada.c Baribʉrʉ Jeowaba carebaida bia zarea trajaɗibʉrʉ idji carea idjaɓa mãwãra dadji Ãcõrẽ Beɗeara bia ĩjãnida. Acʉɗadua dji VIDEODA.
Leaɗapeɗa Hebreo 13:4, beɗeaɗadua:
¿Bʉa quĩcha ɓʉda Jeowaba jara ɓʉra mĩã cãĩnanebemada jãʉ̃gʉra bia ɓʉda? ¿Cãrẽ cãrẽã jãʉ̃ jãwã quĩcha ɓʉ?
Jeowaba quĩrĩã ɓʉda bʉa mĩã cãĩ carea registro sacaida idjaɓa sacaibara ɓʉda registro bʉ amabʉrʉɗe biɗa, ĩjãmãrẽã ẽjũãnebema bororãba jarabadada, jãʉ̃gʉ ley ɓʉ bẽrã. Leaɗapeɗa Tito 3:1, beɗeaɗadua:
¿Bʉa mĩã cãĩ ɓʉbʉrʉ registro eroɓʉda idjaɓa osida ẽjũãnebema bororãba jarabada quĩrãca?
AƁAɄBA POYA IDIDA: “¿Cãrẽã mĩã cãĩda? ¿Wãrãda quĩrĩã panʉda jãʉ̃ registrora?”.
¿Bʉa cãrẽda poya jaraida?
JŨMA BEƊEAƊA
Ẽberãduɓa ɓeara idjaɓa mĩã cãĩnara jãʉ̃ra bia ɓʉda, Jeowaba ne bari dia ɓʉ quĩrãca. Beɗeaẽ́da bʉra iduɓa ɓʉbʉrʉ wa mĩã cãĩ ɓʉbʉrʉ, poya jũmada capipia pananida ĩjã panʉ bẽrã Jeowara.
Cawaɗara
Ẽberãduɓa ɓʉba, ¿cãrẽ ne biada poya oida?
¿Cãrẽ cãrẽã Ãcõrẽ Beɗeaba jara ɓʉda critianorãba aɓabe bʉrʉ mĩã cãĩnida panʉa Crito ĩjã ɓearame?
¿Cãrẽ cãrẽã aɓabe Ãcõrẽ Beɗeaba jara ɓʉ quĩrãca poya amaida ɓʉda dji quimara?
CAWADUA MÃSA
¿Cãrẽda jara ɓʉda “dadjirã Boro Jesucrito ĩjã ɓʉdrʉ” quima edaida ɓʉda?
Acʉdua nẽbʉrʉɗada umé, quima ede quĩrĩã ɓʉbʉrʉ idjaɓa cawadua cãrẽda poya oida quĩcha jʉrʉi carea mĩã cãĩbʉrʉɗe.
Cawadua dadji djaba Jeowaba ne bia diaɗara ne zocãrã amesida idjia o ɓaɗara.
Carta mĩã amainebemada diai naẽna bio quĩchaida idjaɓa dji quima amei naẽna bio quĩchaida. ¿Critianoba cãrẽda quĩchaida ɓʉ jãʉ̃gʉ oi naẽna?
“Bio wayaɗadua ‘Ãcõrẽba ãbaa ɓʉɗaraʼ” (Cartaba Jara ɓʉda, 2018, Diciembre)
a Acʉdua naʉ̃ carta jõnacare jãma jara ɓʉmae “mãsa beɗeara” número 4, jãma acʉɗida bʉa sãʉ̃be bʉ dji quimada daunemaẽ́ ɓʉmĩna poya ameida ɓʉda.
b Bʉda ãbaa ɓaibʉrʉ quimame mĩã cãĩẽ́ ɓʉmĩna, bʉduɓa jaraida ɓʉa cãrẽda oida ɓʉa, idjime ãbaa ɓa quĩrĩã ɓʉbʉrʉ wa ame quĩrĩã ɓʉbʉrʉ, bʉduɓa jaraida ɓʉa.
c Ʉ̃cʉrʉ ẽberãba awara puruɗebemaba, quĩchabadada dji warrarã wẽrã edamãrẽã idjaɓa dji caurã quima edamãrẽã. Bʉ puruɗe jãʉ̃gʉ mãwã ɓʉɗe dji zezerãba bio acʉɗida panʉa jãʉ̃ ẽberãba wãrãda quĩrĩã ɓʉda Jeowara. Ãdjirãmaarã jãʉ̃gʉra bio biara ɓʉda parata cãyãbara wa ẽberãrãba jarabadaa cãyãbara.