Zergatik ez ditu Jainkoak otoitz guztiak erantzuten?
Gure zeruko Aita Jehobari asko gustatzen zaio gure otoitz zintzoak entzutea. Baina Jainkoak ez ditu otoitz guztiak erantzuten. Zergatik? Zer izan behar dugu kontuan otoitz egitean? Ikus dezagun Bibliak dioena.
«Otoitz egitean, ez errepikatu hitz berberak behin eta berriz» (Mateo 6:7).
Jehobak ez du guk buruz ikasitako otoitzak errepikatzerik nahi, ezta liburu batetik irakurtzerik nahi ere. Horren ordez, guk berari bihotz-bihotzez hitz egitea nahi du. Imajinatu egunero-egunero gauza bera kontatzen dizun lagun bat duzula. Zer nekagarria! Lagun onak zintzoak dira eta elkarri gauza asko kontatzen dizkiote. Era berean, Jehobari gure hitzetan otoitz egiten diogunean, guretzat lagun bat dela erakusten diogu.
«Eskatzen duzuenean, ez duzue jasotzen, motibazio txarrarekin eskatzen duzuelako» (Santiago 4:3, NWT).
Jainkoari gustatzen ez zaiona ezagutzen badugu, eta, hala ere, horixe eskatzen badiogu, ezin dugu espero Jainkoak erantzutea. Adibidez, imajinatu apustu egiten duen norbaitek Jainkoari zorte ona ematea eskatzen diola. Erantzungo al luke Jehobak otoitz hori? Berak argi utzi digu ez zaiola diru-gosea eta guk zorte onean sinestea gustatzen (Isaias 65:11; Lukas 12:15). Beraz, ez litzateke logikoa izango berak otoitz horiek erantzungo dituela pentsatzea. Jainkoak gure otoitzak erantzun ditzan, honetaz ziurtatu behar dugu: gure otoitzek Jehobak Biblian esaten duenarekin bat egiten dutela.
«Norbaitek ez badu legea aditu nahi, haren otoitza bera ere Jaunarentzat higuingarri» (Esaera Zaharrak 28:9).
Biblia garaian, Jainkoak ez zituen bere arauak baztertu zituztenen otoitzak erantzun, eta gaur egun modu berean pentsatzen jarraitzen du (Isaias 1:15, 16; Malakias 3:6). Jainkoak gure otoitzak erantzutea nahi badugu, bere arauen arabera bizitzeko ahal dugun guztia egin behar dugu. Eta iraganean gaizki jokatu bagenuen? Esan nahi al du horrek Jehobak ez digula inoiz entzungo? Ez, noski! Damututa gaudela eta bere nahia egiteko ahal dugun guztia egiten dugula erakusten badiogu, guri barkatzeko prest egongo da (Eginak 3:19).