Aval avé é nda bôr dwiè é ne ning a mvom été ?

1. Amu dzé alukh ya ngoman é ne éban akal nda bôt ?

Jehôva, é môr a ne tsin mbemba mefuèñ ye é Nzame a ne mevakh, aa kômô naa, menda me bôr me ning a mvom été (1 Timothée 1:11). É nye a nga té alukh. Alukh ya ngoman é ne éban akal mvom ye nda bôr ése, da sili n’nôm, ngal ye boan n’nem ôsi. Bechrétien ba yiane baghle metsing m’alukh me y’é si be too.​—A lang Luc 2:1, 4, 5.

Aval avé Nzame a taa alukh ? Aa kômô naa é tobe mbèmbèè ézang fam ye minenga. Jehôva aa Kômô ki naa, medukh me boban ézang ngal ya n’nôm (Behébreu 13:4). Aa suban vine naa môr a vas alukh (Malachie 2:16). Ve daa aa dzam naa moan chrétien a vas ye bera lughan, foghe ve nge môr ngal nge ki n’nôm a bo medzian.​—A lang Matthieu 19:3-6, 9.

2. Aval avé ngal ye n’nôm ba yiane belan bébyen ?

Jehôva a ngal vele fam ye minenga naa môr ase ye été a dzale é dzôm da makh ébe é môr mbokh (Atargha 2:18). Akal fam é de é ne ndjiè ya nda bôt, éde, aa yiane dzeng biôm bi ya nsôn ye yeghle é nda bôr dzèñ a ne ba kang Nzame. Aa yiane bira nyeghe ngal. N’nôm ba ngal ba yiane nyeghan ye kanghan. Beyaa ye beyôm bese be ne bôr minsem, ésap mvom évokh ye me nda me bôt é ne naa ba yeghe ane ba bo bidzam.​—A lang Beéphésien 4:31, 32 ; 5:22-25, 33 ; 1 Pierre 3:7.

3. Ye mina yiane tsam alukh denan éyong da wulu abé ?

Nge alukh denan da wulu abé, bongh’ane naa môr a belane y’é nyi mbokh y’ényeghe (1 Becorinthien 13:4, 5). Kalare Nzame aa dzô ki naa, a kanan é de é ne kôm mintiè mi ye alukh denan.​—A lang 1 Becorinthien 7:10-13.

4. A boan, za dzam Nzame aa kômô akal denan ?

Jehôva aa kômô naa ô tobe a mvom été. Aa ve we minfang melepgha, ma ve naa ôô yem ning éyong ô ngen étong môt. Aa kômô naa, ôô tugha buane n’yeman ye mefekh bebyèñ bwa be bele (Becolossien 3:20). Aa kômô fe naa ôô bele nsas wa so éyong môr aa bo mam akal Mvele wèñ, ye akal é moan wèñ.​—A lang Ecclésiaste 11:9–12:1 ; Matthieu 19:13-15 ; 21:15, 16.

5. A bebyèñ, za dzam mine bo, naa é boan benan be ning a mvom été ?

Bebyèñ ba yiane sèñ ngul naa be ve é boan beba bidzi, nda ye bitôp (1 Timothée 5:8). Ve naa be bele nya mvom, mina yiane fe bo yeghle naa be nyeghe Nzame ye yebe ayeghle dèñ (Beéphésien 6:4). Aval wa lere Nzame ényeghe, é ne bo bira vole. Nge da so a Bible été, ayeghle denan é ne ve naa be tobe mbemba be bôt melu ma zu.​—A lang Deuteronome 6:4-7 ; Minkana 22:6.

Boan ba yem wôn éngeng ba sekh bo a si. Be ne fe ashèñ naa be songh’ane bo ye sure bo. Aval ayaghle te éde é ne ve naa be bo keghe bele mefulu ma bo naa be shime mvom (Minkana 22:15). Ve daa, asurgha daa yiane ki boban ye ngul, nge ki ye nget.​—A lang Becolossien 3:21.

Bengaa Jehôva ba kulu abuiñ bekalare ba vole bebyèñ ye boan. Bekalare be te, tsin é ne bo a Bible été.​—A lang Bya 19:7, 11.