Akengha ya Évele mang

Étéñ ébién Faraón a nga wokh naa Bisraelitas be kôrôyang Egipto, éde a nga tsen nkighane wèñ naa a likh naa be ke. A nga dzô bizima bièñ naa : “Bemetua melumane bam besese be tobeghe nkôman, naa bi ke bia dzirane bo ! Bii va yiène ki likh naa be ke.” Éñe ye nsama bizima wéñ, be nga sum dzirane Bisraelitas.

Jehôva a mbe é wulu ya ayong dèñ, é belane nkut ômôs ye nduan alu. A nga ke bo Évele mang, éde a nga dzô be naa be tele bibem bieba vôm té.

Ane Bisraelitas be nga yen Faraón ye nsama bizima wèñ bé dzirane bo. Be mbe ôlam été ézizang mang ya nsama bizima ye Egipto. Be nga yônane Moisés naa : “Bia ye wu ! Ô va yiène bia likh Egipto.” Ve Moisés a nga yalane naa : “Mi taa ko wong. Yaneghan, ye yen aval Jehôva a ye mina kôre.” Moisés a mbe faa a bele mebun ébe Jehôva, nga ?

Jehôva a nga dzô Bisraelitas naa, be kôrô é vôm be nga tele bibem bieba. Alu té, Jehôva a nga vèè nkut ye tele wô ézizang Beegipcios ya Bisraelitas. Nfa Beegipcios ô mbe dzibi. Ve nfa Bisraelitas ô mbe éyèè été.

Jehôva a nga dzô Moisés naa, a sam wo a mang ayô. Ane Jehôva a nga ve naa nfungha ô vunghle ngu’u, ngura nté alu. Mang me nga kanebane minfa mibèñ, éde zen é nga bo ézizang mang. Baakuru nge ki bizukh Bisraelitas be nga wulu nkôr si, ézizang minfim mendzim, ya ke kuiñ nfa mboo ye mang.

Nsama bizima Faraón ô nga béé Bisraelitas ézizang mang me nga mane lighi nkôt. Ane Jehôva a nga zamane nsama bizima té. Minkè é bemetua melumane meba mi nga sum naa mia kôrô. Bizima bi nga yônane naa : “Nkuighan ! A ne Jehôva éñe a luman akal deba.”

Jehôva a nga dzô Moisés naa : “Sameghe wo a mang ayô.” Étéñ té ébién, minfim mendzim mi nga kubane nsama bizima ye Egipto ayô. Faraón ye é bôr besese be mbe ya ñe, be nga mane wu. Mboo ézing ye été éé dzi ki ning.

Nfa mboo ya mang, môra nsama bôr ô nga lughu Nzame ya é dzia di : “Yièghe Jehôva dzia ; amu a va lere é duma dzèñ. Nkalbèñ ye é môr a too wô ayô, a va wua be a mang été.” Nté bôr be mbe bé yiè, binenga baa, be mbe bé dzem ye bôm bepanderetas nge ki betambourin. Môr asese a mbe édedèè mesan amu abong té be ntoo fili.