Nféféñ ndjié ya bengengèè binenga bebèñ

Niène a nga wulu ya ayong Jehôva tang abuiñ mimbu, ane Josué a nga wu a bele mimbu 110. Nté sese a mbe a tèè, Bisraelitas be nga kang Jehôva. Ve, niène Josué a nga wu, be nga sume kang biyema, ane Becananeos. Amu Bisraelitas béé dzi ki ke ôsu ye béé ñe, Jehôva a nga likh naa, é kéza Cananeo be nga luè naa Jabín, a ve naa éning é bo be ndzukh. Ayong é nga dzaa Jehôva avole dèñ. Éde Jehôva a nga ve be nféféñ ndjié, a too éyôla naa Barac. A nga ye vole ayong naa é dughan ébe Jehôva.

Débora, nkulu medzô minenga, a nga lôm naa be ke luè Barac. A mbe a bele mbana Jehôva akal dèñ : “Ñong befam 10 000, ye ke tubane nsama bizima Jabín ôshuiñ ya Cisón nge ki Kishôn. Wéñ, wa ye wun aluman asu Sísara, ndjié bizima Jabín.” Barac a nga dzô Débora naa : “Ma ye ke fave nge wa zu ya ma.” Éde Débora a nga yalane ñe naa : “Ma ye ke ya wa. Ve, waa ye ki bo é môr a ye wiñ Sísara. Jehôva a va dzô naa, minenga éñe a ye ñe wiñ.”

Débora a nga ke ya Barac ye nsama bizima wèñ nkôô Tabor, naa be kôman akal aluman. Étéñ ébién Sísara a nga yem de, ane a nga kôane bemetua meluman bèñ ye bizima bièñ nkôô asi. Débora a nga dzô Barac naa : “Ému, a ne é môs Jehôva a ve naa ô wun.” Barac ya 10 000 befam bèñ be nga sighi nkôô naa ba ke tubane ngu-ngu’u nsama bizima Sísara.

Ane Jehôva a nga ve naa ôshuiñ ya Cisón ô dzèñ. Bemetua meluman Sísara béé mbe ki fe ke ôsu étom mbuargha. Sísara a nga likh metua aluman wèñ ye sum naa a tup é mare mbii. Barac ya bizima bièñ be nga wun nsama bizima Sísara, ve Sísara a nga tup ! A nga ke sobe ébem minenga ézing a mbe éyôla naa Jael. Jael a nga ve ñe meñang ye buru ñe ya nfingha. Mbo alumane té a nga ke ôyô amu a mbe mvoaran. Ane Jael a nga zu a yaa-ôsi ôtetak é vôm a mbe, ye dzii ñe nsong ébem a nlô été. Éde Sísara a nga wu.

Barac a nga zu a dzeng Sísara. Jael a nga kuiñ ébem dèñ atan ye dzô ñe naa : « Ñiighe, ma ye wô lere é fam wa dzeng. » Barac a nga ñii ye yen Sísara a bôô mbim. Barac ya Débora be nga lughu Jehôva ya dzia, amu a nga ve naa Bisraelitas be wun minzizing mieba. Mimbu 40 mi nga zu ôsu vèè, Israel a nga ning a mvoa été.