Gedeón a nga wun Bemadianitas

Ya tam, Israel a nga bera lum Jehôva mvus, ye sum naa a kang bivus benzame. Tang mimbu zangbwa, Bemadianitas be nga wup betsit Bisraelitas ye mane tsam mefup meba. Nfa ye naa, be tup Bemadianitas, Bisraelitas be nga bo bé sobo bibéñ été ya fe minkôô été. Be nga dzaa Jehôva naa a kôre be. Ane Jehôva a nga lôm angele ébe étong moan fam a too éyôla naa, Gedeón. Angele té a nga dzô ñe naa : “Jehôva a va top wa naa ô bo ngu-ngu’u mbo-aluman.” Gedeón a nga sili ñe naa : “Me ne kôre ayong Israel za aval ? Méé se ki dzôm ézing.”

Za aval Gedeón a nga ye yem naa Jehôva a nga top ñe ? A nga bo do é bwi abong lana nge ki laine ôsi, ye dzô Jehôva naa : “Kikiri, nge éfôp é buale abong lana, ve naa si é too nkôt, ma ye yem naa, wa kômô naa me kôre Israel.” Kikiri, abong lana é mbe mbualan, si daa, é mbe nkôt ! Ve, Gedeón a nga bera dzaa naa, é kiri évoo, lana a bo nkôt, si daa, mbualan. Éyong dzam té é nga dzalban, éde Gedeón a nga sughlane tobe ndzi-n’nem naa, Jehôva a nga top ñe. A nga kôane bizima biéñ naa be ke lumane ya Bemadianitas.

Jehôva a nga dzô Gedeón naa : “Ma ye ve naa Bisraelitas be wun aluman. Ve, amu bizima bi dang-hang abuiñ, mi ne tem naa mi va wun aluman ya é ngu’u denan. Dzôghe é môr ase a ko wong naa a bulan é nda dzèñ.” Ane bizima 22 000 bi nga bulane menda meba, ye naa bizima 10 000 bi nga lighi. Éde Jehôva a nga bera dzô Gedeón naa : “Bizima bi ngen abuiñ. Keng a bo ôshuiñ ye dzô be naa be ñu mendzim. Baghle nsama wiè été, fave bizima bia momo nzizing nté ba ñu.” Fave befam 300 ébe be nga tobe nkee nté be mbe bé ñu. Jehôva a nga kiagh naa avitsang befam beté ébe ba ye wun bizima Bemadianitas 135 000.

Alu té, Jehôva a nga dzô Gedeón naa : “Éndagha, a ntoo tam ye a lumane Bemadianitas ! Gedeón a nga kee é bôr bèñ betong ya bura mendakh me bele bilam bi nduan bi shuale été. A nga dzô be naa : “Daghan, ye bo fave ane ma bo.” Gedeón a nga long é tong dèñ é too mboane ya minlakh, éde a nga buiñ é ndakh dzèñ, ye fogho élam nduan dèñ, é yônane naa : « É zoa ôkeng Jehôva ya Gedeón ! » Befam 300 besese bèñ be nga bo aval dèè. Bemadianitas be nga ko wong ye ke ba mare mimbii mevôm mese. Ya nzamane té, be nga sum naa ba lumane bevoo ya éba bevoo. Tam té fe, Jehôva a nga vole Bisraelitas naa be wun minzizing mieba.