É ngiagh Jefté

Bisraelitas be nga bera lame Jehôva ye sum naa ba kang bivus benzame. Éyong Bammonitas be nga lumane Bisraelitas, bivus benzame beté béé dzi ki be vole. Tang abuiñ mimbu, Bisraelitas be nga bira dzukh. Asughlan, be nga dzô Jehôva naa : “Bi va bo nsem. Éngôngoo, kôreghe bia é mo minzizing miè.” Bisraelitas be nga mane tsam biyema bieba ye bera sum naa ba kang Jehôva. Nfa wèñ, Jehôva éé nga kômô ki yen ane ba tsini naa ba dzukh.

Mbo-aluman ézing a mbe éyôla naa Jefté éñe a nga tobe ntopbane naa a wulu ayong akal aluman ya Bammonitas. A nga dzô Jehôva naa : “Nge ô ve naa bi wun aluman, ma kiagh wô naa, éyong ma ye bulan é nda dzam, ma ye wô kee é môr ôsua a ye kuiñ é nda dzam atan naa a zu tubane ma.” Jehôva a nga bèè meyaghlane Jefté ye vole ñe naa a wun aluman.

Éyong Jefté a nga bulan é nda dzèñ, é môr ôsua a nga kuiñ naa a zu tubane ñe a mbe ngoan dzèñ, é moan étam a mbe a bele. A mbe é dzem ye bôm pandereta nge ki tambourin. Za dzam Jefté a nga ye bo ? A nga siman é ngiagh dèñ ye dzô naa : “Kié kaa, a ngoan dzam ! Ô dzugheyang ma a n’nem. Me nga bo Jehôva ngiagh. Naa me dzale ngiagh té, wa yiène ke sèhane ñe a tabernáculo a Siló.” Ve, é ngoan dzèñ a nga é dzô ñe naa : “A tat, nge ô va bo Jehôva ngiagh, wa yiène de dzale. É dzam étam ma dzaa, é ne naa me ke lôr mengoan mebèñ minkôô été ya memvuiñ mam. Éyong té, éde ma ye ke.” É ngoan Jefté é nga sèhane Nzame ya sôsôe a tabernáculo éning sese dèñ. Mimbu misese, memvuiñ mèñ me mbe mé ke a Siló naa ba ke ñe yen.