Jehôva a nga ve Sansón ngu’u

Abuiñ Bisraelitas be nga bulan a ke kang biyema, aval é nga ve naa, Jehôva a likh naa Befilisteos be djié é si deba. Ve, Bisraelitas bézing be mbe bé dzing Jehôva. Mboo ye été a mbe éyôla naa Manóah. Éñe ba ngal béé mbe ki be bele boan. Môs ézing, Jehôva a nga lôm angele ébe Manóah, ngal. Angele a nga dzô ñe naa : ‘Wa ye byèñ moan fam. A ye kôre Israel é mo Befilisteos. A ye bo nazareo nge ki naziréen.’ Ye wa yem beza be mbe benazareos ? A mbe é bôr be mbe bé sèhane Jehôva ngura aval. Benazareos béé nga yiène ki kikh ésii deba.

Ya tam, é ndôma dzeba é nga byale, éde a nga luè ñe naa, Sansón. Éyong Sansón a nga vem, Jehôva a nga ve ñe édedèè ngu’u. A mbe wiñ mbuémbuém ya mo. Éyong ézing, Sansón a nga wiñ Befilisteos 30 éñe étam. Befilisteos be mbe bé fem ñe, ye dzeng fe éyong ésese aval be mbe ñe wiñ. Alu ézing, atoo naa Sansón a mbe a bôô ôyô a Gaza, ane be nga ke tebe mbéñ ya kisoan, ye yane ñe naa be wiñ ñe kikiri. Ve, ézizang alu, Sansón a nga véé, ye téñ mbéñ ya kisoan ya fe minfim. A nga baghe mbéñ kisoan bituu bièñ ayô ya ke kuiñ nkôô ézing ayô bébéñ Hebrón !

Ôsu vèè, Befilisteos be nga ke yen Dalila, é minenga Sansón a mbe é dzing ye dzô ñe naa : “Bia ye yaane wa abuiñ minsang mi mono, nge ô dzeng naa ô yem amu dzé a ne édedèè ngu’u aval té.” Dalila a mbe é kômô bele mono, éde a nga yebe. Ôsusua, Sansón a nga tep naa a dzô ñe amu dzé a mbe abim ngu’u té. Ve, Dalila a nga dzèñ ñe de sili, ya ke kuiñ Sansón a nga dzô ñe ashuèñ dèñ. A nga dzô ñe naa : “Baa be ki me vaghle kikh ésii amu me ne nazareo. Nge be kikh ma ésii, ma ye dzimle é ngu’u dzam.” Ke Sansón a nga bo mura ékop éyong a nga dzô ñe de, nga ?

Étéñ té ébién, Dalila a nga dzô Befilisteos naa : “Me nga yem-hang ashuèñ dèñ !” A nga yale Sansón ôyô mebong mèñ ayô, ane a nga dzô môr naa a kikh ñe ésii. Dalila a nga yônane naa : « A Sansón, Befilisteos be ne va ! » Éde Sansón a nga véé, vedaa éé mbe ki fe a bele ngu’u. Befilisteos be nga biñ ñe, ane be nga ve naa a bo ndzim, ye wua ñe a mbokh.

Môs ézing, bizukh Befilisteos be nga kôan é templo é nzame wôba, Dagón bé yônane naa : “É nzame waa a keeyang bia Sansón ! Kuleghane Sansón ! Bi tsap ôyôm tam ya ñe.” Be nga tele ñe ézizang minkum, ye tobe naa ba pogho ñe. Sansón a nga yônane naa : “A Jehôva, bera me ve ngu’u.” Nté té, a ke kuane naa ésii Sansón é bereyang mane vem. A nga tsini minkum mi ya templo té ya mengu’u mese mèñ. Nda ésese é nga mane sulan, ye wiñ é bôr besese be mbe a templo té été. Sansón ña a fe a nga wu.