Édjié é nga tobe nkabane

É tam Salomón a nga lughu Jehôva, mvôa é mbe a Israel. Ve Salomón a nga lukh abuiñ binenga é ba be mbe binenga be ye mesi me fe, be nga lughu fe biyema. Avitsang-avitsang, Salomón a nga tsèn, a nga sum fe naa a lughu biyema. Jehôva a nga wokh ôlun. Éde a nga dzô Salomón naa : “Ma ye véé édjié ye Israel é mvong bôr dzuè été ma ye fe de kap menghap mebéñ. É ngap da dang n’nen ma ye de kee mboo ye bebo-bisèñ buè, é mvong dzuè da ye lighi ya é ngap é ne avitsang.”

Jehôva a nga bo dzam éfe naa bôt bese be tugha wokh é dzam a nga dzô. Mbo ésèñ Salomôn, be nga luè naa Jeroboán, a mbe ékena éde a nga tuban ya nkuku-medzô Ahíya a nzén. Nkulu-medzô a nga vaa éyèñ dèñ, a ñap de bifus 12, éde a nga dzô Jeroboán naa : “Jehôva a ye vaa é mvong Salomón édjié a ye fe de kap menghap mebéñ. Ñonghe bifus awôm a mu naa wa ye bo kéza é be awôm meyong.” Éyong kéza Salomón a nga wokh dzam té a nga kumu wiñ Jeroboán ! Éde Jeroboán a nga tup Egipto. Niène tam é nga lôr, Salomón a nga wu, éde ndôma dzèñ Rehoboam a nga sum naa a djiè. Éyong té éde Jeroboán a nga tem naa abé é lôr yang éde a nga bulan Israel.

Ôsu vaa, beñabôrô be ye Israel be nga dzô Rehoboam naa : “Nge ô yem belane n’nam, ba ye tobe sôsôe ya wa.” Ve bemvuiñ be mbe bitong be nga dzô ñe naa : “Wa yiane bo zông ya n’nam. Lôm be naa be bo abuiñ ésèñ” ! Rehoboam a nga bèè é dzam bemvuiñ be nga dzô ñe éde a nga bo zông. Ya dzam té bôr be nga ke ñe ô ngam ayat, be tele Jeroboán ane kéza ye awôm meyong. Édjié é mbe bele awôm meyong éde be nga luè naa Israel. Ve édi déé mbe bele meyong mebèñ éde be nga lué naa Judá, édjié té éde é nga tobe sôsôe ya Rehoboam. Aval té éde be nga kap meyong 12 me ya Israel.

Rehoboam éñe a mbe é djié a Jerusalén. Ya dzam té, Jeroboán aa nga kumu ki naa n’nam wèñ ô ke lughu Jehôva ô wéñ. Ye wa yem amu dzé ? É mbe amu naa a nga ko wong naa be tep ñe be sum fe naa ba kang Rehoboam. Ya dzam té éde a nga bo biyema betsit bebèñ ya kong, éde a nga dzô n’nam naa : “Jerusalén a ne édidèè ôyap. Bamane sia lighi va naa mia lughu biyema bi.” Bôr be nga bèè ñe éde be nga bera vuène Jehôva.