Mbo-aluman ya mominenga

Ôyôm mominenga ya Israel a nga nining a Siria, ôyap ya é nda-bôr dzèñ. Bizima bi nga kee ñe a Siria, abong di a ntoo mbo-ésèñ é minenga Naamán, ndjiè bizima. Mominenga té a mbe é kang Jehôva amben é bôr ba bebe be mbe be too, béé mbe ki bé bo do.

Naaman a mbe é koan zam. Ôkoan té wa name ékôp, ô too fe édedaa mintèñ. Éde, mominenga a nga kômô ñe vole. Ane a nga dzô é minenga Naamán naa : “Ma yem môr ézing a ne ve naa ñu n’nôm é ler ôkoan a bele alé. A ne nkulu medzô Jehôva, éyôla dèñ é ne Eliseo nge ki Élisée a tobe Israel. A ne sèñ ñu n’nôm.”

É minenga Naamán a nga dzô n’nôm é mam mese mominenga té a nga dzô ñe. Amu a nga kômô let, éde a mbe nkoghan naa a vakh dzam sese, ane a nga ke yen Eliseo a Israel. A nga bunu naa Eliseo a ye ñe ñong ane ba ñong môra môt. A nga yane naa Éliseo émiéñ a zu kobe ye ñe, ve, Eliseo a nga vane lôm mbo-ésèñ wèñ naa a ke tubane ñe ye dzô ñe naa : “Keng wobane mendzim me ya Jordán biyong zangbwa, éyong té éde wa ye let.”

Naamán a nga mane sulu. A nga dzô naa : “Me va tem naa nkulu medzô ñi a ye yaghlan é Nzame wèñ, ye bere ma é mo mèñ ô ñuu, ndamben me nga ye let. Ve kaa dzôm. A vane me dzô naa me ke wobane ôshuiñ ya Israel. Ye méé mbaa sia ke woban ôshuiñ ézing ya Siria ? Ashuiñ dèè da dang mvèñ !” Naamán a nga wokh dzam té abé, éde a nga kôrô ébe Eliseo.

Bebo bisèñ Naamán be nga vole ñe naa a tugha fas. Be nga sili ñe naa : “Ye wéé se nkoghane naa wa vakh dzam sese naa ô let ? É dzam nkulu medzô té a dzô wô naa ô bo é ne édedaa ébubu. Amu dzé wéé se ki de bo ?” Naamán a nga bèè be. Ane a nga ke ôshuiñ Jordán. A nga ñii mendzim été biyong zangbwa. Éyong a nga sughlan kuiñ mendzim été, éyong zangbwa, a ke kuane naa a mana let. Ya mevakh a n’nem, a nga bulan ébe Eliseo naa a ke ñe ve akiba. Naamán a nga dzô ñe naa : “Éndagha me yemang naa Jehôva éñe a ne é Nzame a ne bebela.” Za dzam wa tem naa mominga israelita té a nga wôran, éyong a nga yen ane Naamán a nga so a mana let ?