Ôngôô ya Jerusalén

N’tamane bera bulan ôyôm mimbu ô mvus. Nehemías, a mbe moan Israelita a mbe too a Susa kisoan ya Persia. A mbe mbo-ésèñ kéza Artajerjes. Môs ézing, Nehemías moanñang, a nga so a Judá ya mbimbia fuèñ : “Ayong é mbe é too a Jerusalén déé mbe ki nkamane mbeng. Ôngôô ya mimbèñ mi ya kisoan, émi Bebabilonios be nga mane tsam, béé dzi ki mia kôm.” Nehemías a nga tobe éwiñ. A nga kumu ke a Jerusalén naa a ke vole. Éde, a nga yaghlane Jehôva é dzaa ñe nge kéza a mbe likh naa, a ke a Jerusalén.

Ôyôm tam ôsu vaa, kéza a nga yen naa Nehemías a mbe éwiñ. Éde a nga dzô ñe naa : “Maa be ki wô tare yen ana, tam ézing. Dzé da lôr a wa ?” Nehemías a nga yalane ñe naa : “Ma ye bo ka tobe éwiñ ya, éyong é kisoan dzam Jerusalén, é ne ntsaman ? Kéza a nga sili ñe naa : “Za dzam me ne bo akal duè ?” Tam té, Nehemías a nga yaghlan ôsi-si. Éde, a nga dzô ñe naa : “Éngôngoo, likh naa me ke a Jerusalén, naa me bera ke long ôngôô.” Kéza Artajerjes a nga likh Nehemías naa a ke, a nga ve fe ñe avole a nga yi, nfa ye naa é dzam ézing é ne abé é taa lôr a ñe ébe ayap ékena a nga yiane bo. Nfa mboo, a nga nomane Nehemías ndjié ya Judá, a nga ve fe ñe bilé nfa ye naa a bo mimbèñ mi ya kisoan .

Niène Nehemías a nga siane a Jerusalén, a nga ke yen aval ôngôô ya kisoan ô mbe. Éyong té, éde a nga kôane befara ya bedjié, a dzô be naa : “É dzam di é ne édedaa abé. Bia yiane sum ésèñ.” Ayong é nga yebe do, ane be nga bera sum naa da ôngôô.

Minzizing Bisraelitas mizing, mi nga sum naa ba pogho bo, bé dzô be naa : “A ke kuiñ mvu ya afan, daa é ne pôô ôngôô mia long wi.” Ve, bebo-bisèñ béé dzi ki ba bèè, be nga tsini fe naa ba bo ésèñ. Ôngôô ô nga tugha ke wa bo ayap ya ngu’u.

Éyong té minzizing mité mi nga so minfa misese, nfa ye naa be zu lumane Bejudíos a Jerusalén, kaa naa be nga yane do. Niène Bejudíos be nga wokh de, éde be nga ko wong. Ve, Nehemías a nga dzô be naa : “Mi taa ko wong. Jehôva a ne ya bia.” Ane a nga tele bekale, naa be kame bebo-bisèñ, aval té minzizing mii mbe ki zu lumane bo.

Be nga mane long ôngôô ya mimbèñ mi ya Jerusalén ébe melu 52. Naa be dzemle do, Nehemías a nga so Belevitas a Jerusalén akal é fet be nga bo naa ba vakh ya ôngôô be nga mane long. A nga mane be ta ébe minsama beyiè bya mibèñ. Be nga bet ôngôô ngalane biscaleras nge ki béchelle ébe mbèñ ô mbe é vôm mendzim me nga kuiñ, be nga lôt, bé tubane kisoan. Be nga ke ba bôm metong ya becimbalos ya fe bearpas nge ki beharpe, bé yiè Jehôva bya. Esdras a nga ke ya ngura nsama, Nehemías ñe a nga ke fe ya nsama ôvoo, a ke kuiñ be nga ke tubane a templo. Befam, binenga, ya boan be nga ve Jehôva metungha, be nga dzemle fe fet. Be mbe édedaa mevakh naa meking meba, be nga wokh mo ôyap.