Elisabet a bele moan

A kuane é lôrang mimbu a lôr 400 ave be nga bera mane kôm ôngôô ya Jerusalén. Fara ézing a too éyôla naa Zacarías ba ngal, Elisabet, be mbe be too bébéñ a kisoan. A kuane be tobeyang abuiñ mimbu ane minlughan, ve béé mbe ki be bele boan. Môs ézing, Zacarías a nga ke ve incienso é vôm ô nga dang nfufup a templo. Éde, angele Gabriel a nga lerebane ébe ñe. Zacarías a nga bira sighan. Ve, Gabriel a nga dzô ñe naa : “Ô taa ko wong. Me va so wa mbemba fuèñ ébe Jehôva. Ñu ngal, Elisabet, a ye bele moan, éyôla dèñ da ye bo Juan nge ki Jean. Jehôva a ve top Juan akal ngura aval ésèñ.” Zacarías a nga dzô ñe naa : “Aval avé ma yem naa é dzam wa dzô é ne bebela ? Ane ma, ane é minenga wom, bi ntoo édedaa beñabôrô naa bi ne bele moan.” Gabriel a nga yalane ñe naa : “Nzame a va lôm ma naa me zu wa ve mbemba fuèñ. Ve, amu wéé dzi ki bele mebun, waa ye ki bera kobe a ke kuiñ éyong moan té a ye byale.”

Zacarías a nga lighi é vôm ô ne nfufup a lôr abim a nga yiane tobe. Asughlan, éyong a nga kuiñ, é bôr be mbe nseng be nga kumu yem é dzam é nga lôr a ñe. Zacarías éé mbe ki fe kobe. A mbe ba lere fave mendem. Éyong té, éde bôr be nga ñu tang naa, Zacarías a nga ñong é fuèñ da so ébe Nzame .

Ôyôm tam ôsu, Elisabet a nga ñong abum, ane a nga byèñ moan fam, aval ane angele a nga dzô. Bivuvuman ya memvuiñ mèñ be nga zu yen moan. Éde, be nga tobe mevakh akal dèñ. Elisabet a nga dzô naa : “A ye bo éyôla naa Juan.” Ve, be nga dzô ñe naa : “Môr ézing ye é mvong duè éé se ki éyôla naa Juan. Bame ñe luè naa Zacarías, ane ésaa.” Zacarías a nga tsili naa : “Éyôla dèñ é ne Juan.” Tam té, Zacarías a nga bera sum naa a kobe ! Ane mefuèñ me mbe mé daghe moan té, me nga mane yamane Judea ngum. Éde, bôr be nga sili naa : “Za dzam da ye lôr ya é moan ñi éyong a ye vem ?”

Éyong té, Zacarías a nga tobe ndzalan ya nfufup nsisim. Éde, a nga kobe nkulane adzô naa : “N’veghane Jehôva duma. A nga kiagh Abrahán naa a ye lôm nkôre, Mesías, nfa ye naa a zu bia kôre. Juan ñe a ye bo nkulu-medzô a ye kôman é zen Mesías.”

Ngura aval dzam daa é nga lôr fe ya évuvumane Elisabet é mbe éyôla naa, María. Bia ye de yen ayeghle da zu.