Yésu a lereban ébe beyop bekoas

Ôyôm tam ô nga lôr éyong Yésu a nga lereban ébe mintôô, ane Pedro nge ki Pierre a kikh naa a ke yop koas a mang me ya Galilea. Tomás, Santiago nge ki Jacques, Jean, ye beyeghe bevoo be nga béé ñe. Ane be nga yop alu ngura kaa biñ dzôm ézing.

Ékuna kikiri, be nga yen môr a tele nsa mang. Môr té é yônane be naa : “Ye mi va biñ koas ?” Éde be nga yalane ñe naa : « Kaa dzôm ! » Môr té a nga dzô be naa : « Wèèghane mevoat nfa meyôm ya tsimi. » Aval té éde be nga bo, ane mevoat me nga dzèñ ye koas. Bekoas be mbe édedaa abuiñ, aval é mbe naa beyeghe kaa fe nguu ya bere mevoat a tsimi été. A tem-tem, Juan a nga yem naa môr té a mbe Yésu, éde a nga dzô ñe naa : « A ne Nti ! » Étéñ té ébiéñ, Pedro a nga wèè ñuu mendzim a nga dzua ya ke kuiñ nsa mang. Beyeghe bevoo be nga béé ñe a tsimi été.

Éyong be nga kuiñ nsa mang, be nga yen koas ya nfem bé béñ a nduan ayôp. Yésu a nga dzô be naa be ñong ôyôm abim bekoas ya é bekoas be nga yop. Éde ki a nga dzô be naa : “Zaane dzi.”

Niène be nga mane dzi, Yésu a nga sili Pedro naa : “Ye wa ñeghe ma a lôr min’yop ?” Pedro a nga yalane ñe naa : “Owé, a Nti, wa yem naa ma ñeghe wa.” Yésu a nga dzô ñe naa : “Vakh mintôma miam bidzi.” Yésu a nga bera sili ñe naa : “A Pedro, ye wa ñeghe faa ma ?” Pedro ñe naa : “A Nti ke wa yem naa ma ñeghe wa.” Yésu a nga dzô naa : “Tugha baghle é boan mintôma miam.” Yésu a bera ñe sili nsili té éyong lal. Pedro a nga bo édedèè éwiñ. A nga dzô naa : “A Nti, ke wa yem mam mese. Wa yem naa ma ñeghe wa.” Éde Yésu a nga dzô ñe naa : « Vakh é boan mintôma miam bidzi. » Ane a nga dzô Pedro naa : « Keng ôsu ya béé ma. »