Dzôm ézing déé dzi ki ve naa be tele

Mbômbokh ézing a mbe a too ôsi é dzaa mono melu mesese mbéñ ya templo. Ngogho ézing, a nga yen Pedro ya Juan bé ñii a templo. A nga dzô be naa : “Éngôngoo vaane ma dzôm ézing.” Pedro a nga dzô naa : “Me bele é dzôm da dang mvèñ a lôr mono ma ve wa. Ya é ngu’u éyôla Yésu, tebeghe ye wulu !” Ane Pedro a nga vole ñe naa a tebe, éde môr té a nga sum naa a wulu ! Bôr be nga bira vakh amu akengha té, éde abuiñ ye été é nga sughlan bo beyeghe Yésu.

Befara ya Besaduceos nge ki Besadducéen be nga wokh dzam té édedèè abé. Ane be nga biñ mintôô, be k’a bo a Sanedrín ye sili be naa : “Za a va ve mina é ngu’u mi va ve naa é môr ñi a let ?” Pedro a nga dzô naaa : “A ne Yésu Krist, éñi mi nga wiñ.” Betebe ôsu be ya menda menzame be nga bame be naa : “Teleghane naa mia kobe adzô Yésu !” Ve, mintôô mi nga yalane naa : “Bia yiène tsini ôsu naa bia kobe adzô dèñ. Biaa ye ki tele.”

Étéñ té ébién, be nga likh naa Pedro ba Juan be ke, éde be nga ke ébe beyeghe bevoo ya dzô be é dzam é nga lôt. Be nga yaghlane nsama, bé dzaa Jehôva naa : “Éngôngoo, voleghe bia naa bi bo ngengaa nfa ye naa, bi ke ôsu ya bo ésèñ duè.” Jehôva a nga ve be nfufup nsisim wèñ, éde be nga ke ôsu naa ba kanghle ya lerre bôr. Abuiñ bôr be nga bo bebunu. Amu Besaduceos be mbe bé ñamle bo, éde be nga biñ mintôô ye wua be mimbokh. Vedaa, alu, Jehôva a nga lôm angele naa a zu kuu mimbèn mi ya nda mimbokh, ye dzô mintôô naa : “Buleghan a temple, ye yeghle bôr wéñ.”

É môs ô nga berane vèè, be nga dzô bedjié be ya Sanedrín naa : “Nda mbokh é fere, ve é bôr mi va biñ be mana ke ! Be ne a templo, bé yeghle bôr !” Be nga bera zu biñ mintôô ye k’a bo a Sanedrín. Fara n’nen a nga dzô naa : “Bi va dzô mina naa, mi taa kobe adzô Yésu !” Vedaa, Pedro a nga yalane naa : « Bia yiène bo Nzame mewokh ndaane moan môt. »

Betebe ôsu be ya menda menzame be nga wokh édedèè abé aval é nga ve naa be kômô wiñ mintôô. Éde moan fariseo nge ki pharisien, a mbe éyôla naa Gamaliel a nga tebe ye dzô naa : “Boghane nkee ! Ane bo naa Nzame a ne ya bôr beté. Ye mia kômô faa lumane ya Nzame ?” Ane be nga bèè melepgha mèñ. Niène be nga mane yit mintôô, be nga bera be dzô naa be tele naa ba kanghle, ya likh naa be ke. Ve, mintôô mii dzi ki tele naa ba bo do. Mi nga ke ôsu ya kanghle mbemba fuèñ ya ngengaa, a templo été ye menda menda.