A beñabôrô, mi ne éban akal ékôan

Tam ézing, waa bo ki fe ésèñ aval ô nga bo-bo do ô mvus, amu naa ô ntoo n’nôm. Amben ô va sèhane Jehôva ébe abuiñ mimbu, é ne bo naa wa yen wamién aval daa yiane ki amu ô bele menié éndagha. Éfônan, ô ne sum naa wa vaghan é mam wa bo ému ya éma ô nga bo-bo ô mvus. Nge éñe é ne naa, dzé é ne wa vole naa ô wun ôsimane té ?

É DZAM JEHÔVA A YANE ÉBE WA

Silighe wamién naa : “Za dzam Jehôva a yane ébe ma ?” Ô ne kuane afôlô abakh Deutéronome 6:5, da dzô naa : « Wa yiane dzing Jehôva é Nzame wiè ya n’nem wiè ôse, ya é ñuu duè ése, ya mengu’u muè mese ».

Aval ane éfus té da lere do, Jehôva a yane naa ô sèhane ñe ya n’nem wiè ôsese, é ñuu duè ésese, ya mengu’u muè mesese. A simane dzam té é ne wa vole naa, ô taa vaghane wamién ya é bôr bevoo, nge ki a vaghan é mam ô ne bo éndagha ya éma ô mbe we bo ô mvus.

Tame fas é dzam di : Éyong ô mbe étong, dzé ô nga ve Jehôva ? Abuiñ bôr be ne ayong Jehôva été, be ne dzô naa be nga ve ñe é dzôm é nga dang mbeng be mbe be bele. Nfa wiè, dzôm té éde é nga dang éban ya aval bitéñ ô mbe ô tele tam té. Za dzôm ô ne ve Jehôva éndagha ? É dzôm da dang mbeng wa ve, da yiène vaghane ya étéñ ô tele ému, abim ô ne bo éndagha. Nge ô yene mam aval té, ô ne bele ndzi-n’nem naa é dzôm wa ve Jehôva éndagha é ne aval daa, ane édi ô nga ve ñe ô mvus. Tam té, ô nga ve ñe é dzôm é nga dang wa mbeng, éndagha wa ve fe ñe é dzôm da dang mbeng ô bele.

Ô NE VE NAA É BÔR BEVOO BE ÑONG ABUANE YA WA

Adzô duè, ô ne fe da yen nfa ôfe : Se fave naa wa yen mimbu muè ane é dzôm da ve wa menié, ô ne fa dzeng naa ô yen mio ane ntam. Ya dzam té, ane é kristen a ntoo ñamôrô, éndagha ô ne bo mam mézing wéé mbe ki bo éyong ô mbe étong. Éfônan, ô ne bo é mam ma :

A kaban é mam ô nga lôr éning duè ya é bôr bevoo. Tame fas bifiè bia kuane bio a Biblia été :

Kéza David : « Me mbe étong éndagha me ntoo ñamôrô, vedaa méé dzi ki yen sôsôe môr ézing a too nlaman, nge ki naa é boan bèñ ba dzeng nfem » (Bya 37:25).

Josué : « Éndagha, daghan ! Me ntoo naa ma ye wu, mina, mia yem ya n’nem ôse wônan, ya é ñuu se denan naa, éfiè évoo ézing ye é mbemba mengiagh Jehôva é Nzame wônan a nga kobe, déé dzi ki vus. Mesese me va dzalban ébe wa. Éfiè ézing ya été déé dzi ki vus » (Jos. 23:14).

Éyong ézing, waa ô kobeyang fe aval bifiè bité. É dzam David ba Josué be nga dzô, éñil môr ye été a nga kobe ya é mam émién a nga lôr éning dèñ. Amu naa besôsôe bebo-bisèñ Jehôva beté be nga kobe é mam bébién be nga yen, ya é mam be nga wokh ébe abuiñ mimbu ya dzam té, bifiè bieba bi mbe dang bele ngu’u.

Nge wa ô va sèhane fe a Jehôva ébe abuiñ mimbu, wa ô ne fa kobe nfa biborane bi ne éyong môr a bo de, ya aval ô va yen de nfa wiè. Ye wa siman éyong ézing ô nga yen ane Jehôva a borane ayong dèñ ? É ne mbeng, naa ô kare do é bôr bevoo ! Dzam té é ne sili é bôr bevoo n’nem ôsi, aval ane wamièn wa wôrane fe do. Ya dzam té, éyong bôr befe ba ye wokh é mam ô lôrang ébe ésèñ Jehôva, ô ne ba ve édedaa abuiñ ngu’u (Bero. 1:11, 12).

Aval éfe ô ne ve é bôr bevoo ngu’u, a ne éyong wa ke bisulan a Nda bikôan, a ke kuiñ abim ô ne bo. Ô wéñ, wa ye buan, ô ne fe ve naa bekristen bevoo baa fe, be ñong abuan. Connie, éñi bi va tare tu ô mvus, a dzô naa : « A ke bisulane da likh naa me taa sulu. Ya abim édzing sese ma ñong a Nda bikôan, aval avé me mbe sulu ? Ma dzeng naa me lere é bôr bevoo édzing, me ve fe bong bedas. Ma banebe fe naa me tsini naa ma bo mam me ye nsisim nsama ya bendôm ya bobedzang bam. »

JEHÔVA A YEN É SÔSÔE ÉSÈÑ WIÈ MÔRA DZAM

Minfufup mintsili mi ne ndzalane ya bifônan é bôr be mbe be bele menié, ve éba Jehôva a mbe é dzing. Bi ne tame simane Simeón, mvene ya Israel, éñi a mbe a taa éyong Yésu a nga byale. Éyong a nga bo é ke a templo, é ne bo naa a nga bo é yen ane é bôr be nga dang bitong be nga bo ésèñ ô wéñ. Ve, Simeón a nga ñong mam aval ya ? Aval moan môr a yen mam, tam ézing a mbe tem naa amu a ntoo ñamôrô a kuane naa éé se ki fe abuiñ éban é mis Jehôva. Ve, Jehôva a nga yen mam aval éfe. A nga yen naa Simeón a mbe « sôsôe, ya naa a nga ko ñe wong », ya naa a nga borane fe ñe é likh ñe naa a yen Yésu éyong a mbe moan. A ke kuiñ naa, Jehôva a nga belane Simeón naa a kobe nkulan-adzô nfa Mesías ! (Luc 2:25-35). Bebela, Jehôva éé dzi ki dagha naa Simeón a kuane naa a ntoo ñamôrô, nge ki naa é ñuu dzèñ é maneyang takh. Ve, a nga yen naa a mbe é môr a bele mebun me ne ngu’u, « nfufup nsisim ô mbe ñe ô ñuu ».

Wa ô ne fe tobe ndzi-n’nem naa Jehôva a yen môra dzam, é sôsôe ésèñ wa bo amben ô bele menié. É mis mèñ, metungha ma « dang mbeng éyong môr a ve abim a bele, se ki abim aa bele ki » (2 Becor. 8:12).

Ya dzam té ôsiman, dzenghe naa ô bembe ébe é dzam ô ne bo. Éfônan, za aval minkanghle ô ne tsini naa wa sukh amben avitsang tam ? Ye ô ne vole é bôr bevoo wé luè bo nkoo bisusuakh ? Boan mendem me édzing me ne bele abuiñ ngu’u ébe bekristen bevoo, a dang-dang éyong minboane mité mia so ébe é môr a sèhaneyang Jehôva abuiñ tam.

Bevoo bézing be bele menié akal meñuu meba. Daghe nlang y’éning ézing wa so Africa del este, ô ne nkaalé : « É nga yili éning dèñ ».

Simghane naa éfônan y’éning sôsôe duè, ya mebun muè, é ne ve é bôr bevoo mengu’u. Ô ne éfônane nfa ye a zômô, éde ô ne tobe ndzi-n’nem naa « Nzame éé se ki ékôar-koat naa a vuèn ésèñ, ya édzing mi va lere éyôla dèñ, ya naa, mi va tsini naa mia sèhane minfufup » (Behéb. 6:10).

DZENGHE NAA Ô BO ABIM ÉSESE Ô NE BO NAA Ô TOBE AYÔNG

Besikôlô ba lere naa abuiñ befam ya binenga be ne beñabôrô ba dzeng naa be vole é bôr bevoo be ne mvoa, be bele mbemba ôsiman, ya naa, éning deba é ne ayap.

Ôwé, a bo mbemba be-mam daa ye ki vèè mindzukh mise mia so éyong môr a ntoo n’nôm. Niène ve Édjié Nzame étam, éde da ye mane vèè mindzukh misese mia so akal n’nôm ya awu, da yili naa étéñ bebo-minsem daa (Bero. 5:12).

Vedaa, ésèñ wa bo akal Jehôva, da sili fe naa ô vole bôr befe naa be yem ñe, da sukh ôyane wiè naa ô bembe, a ke kuiñ é ne ve naa ô tobe mvoa minsôn. A beñabôrô, yemghane naa Jehôva a yen môra dzam é mam mesese mia bo akal ésèñ dèñ, ya naa ékôan daa fe da baghle éfônane mebun denan.