Tabernáculo akal ékang Nzame

Éyong Moisés a mbe nkôô Sinaí, Jehôva a nga dzô ñe naa a long ngura aval ébem ba luè naa tabernáculo, é vôm Bisraelitas be mbe ñe ve ékang. Be nga yiène ñe long aval da ve naa be ne ke ya ñe, é vôm sese ba ke.

Jehôva a nga dzô Moisés naa : “Dzôghe ayong naa be kee é dzôm sese be ne kee nfa ye naa be long tabernáculo.” Bisraelitas be nga kee kông, miang, cobre, mekoa me ne mimbeng, ya abuan. Be nga kee fe lana, lino, bikôp bitsit, ya abuiñ biôm bife. Be mbe édedèè añep, aval é nga vane ve naa, Moisés a dzô be naa : “Abim té da yiène ! Mi taa bera so dzôm ézing.”

Abuiñ befam ya binenga be mbe akeng, be nga vole bisèñ bi ye tabernáculo. Jehôva a nga ve be fakh naa be bo ésèñ té. Abim bôt é nga bo ñong, éba bevoo be mbe bé lat nge ki a tsing. Bôt befe be mbe bé buiñ mekoa, a ñeme kông, ya sè bilé.

Ayong é nga long tabernáculo aval Jehôva a nga dzô be naa be bo do. Be nga bo mbemba cortina nge ki rideau naa a kane tabernáculo bidzina bibèñ : Nfufup vôm, ya é vôm wa dang nfufup. Arca ye élat a mbe é vôm wa dang nfufup été, a mbe mboane ya élé acácia, ya kông. É biôm bi mbe nfufup vôm bi mbe : Candelabro nge ki porte-lampes a mbe mboan ya kông, teblé, ya altar akal a dzighi incienso. Ntsangha cobre, ya môra altar akal atunegha bi mbe bi tele a nseng. Arca ye élat é nga simane Bisraelitas é ngiagh be nga bo Jehôva naa ba ye ñe kang. Ye wa yem é dzam é ne élat ? A ne ngura aval ngiagh.

Jehôva a nga top Aarón ya é boan bèñ naa be sèñ a tabernáculo ane befara. Be nga yiène kale tabernáculo ya bo fe Jehôva metunegha wéñ. Fave Aarón, é fara n’nen, éñe a nga yiène ñii é vôm wa dang nfufup. A mbe é bo do éyong évoo ébe mbu, naa a ve metunegha akal minsem mièñ, minsem mi ye é nda-bôt dzèñ ya minsem mi ye ayong Israel ngura.

Éyong Bisraelitas be nga mane long tabernáculo, a kuane naa é lôrang ngura mbu atéé ye éyong be nga kôrô Egipto. Éndagha, be mbe be bele é vôm be mbe ve Jehôva ékang.

Jehôva a nga ve naa tabernáculo a mane dzèñ ya é duma dèñ, ya furu nkut a tabernáculo ôyô. Nté sese nkut ô mbe a tabernáculo ôyô, Bisraelitas be mbe be tele vôm té kaa fônghan. Ve, éyong nkut ô mbe wé kôrô a tabernáculo ôyô, Bisraelitas be mbe bé yem naa ba yiène kôrô vôm té. Be nga yiène mane puèñ tabernáculo ya ke ba béé nkut.