Jehôvah a nga top Josué

Moisés a nga wulu ya ayong Israel tang abuiñ mimbu. Éde é tam awu dèñ é nga yir bébéñ. Jehôva a nga dzô ñe naa : “Se ki wa, wa ye ñii ya Bisraelitas é Si ngiagh. Ve, ma ye wô lere si té.” Éde Moisés a nga dzaa Jehôva naa a top nféféñ ntebe ôsu nfa ye a kale ayong. Jehôva a nga yalane ñe naa : “Keng dzô Josué naa, éñe a ne ntopbane naa a bo nféféñ ntebe ôsu.”

Moisés a nga yaane ayong naa, awu dèñ abong té é ntoo bébéñ, éde Jehôva a nga top Josué naa éñe a wulu ya be ya ke kuiñ é Si ngiagh. Éyong té Moisés a nga dzô Josué naa : “Ô taa ko wong. Jehôva a ye wô vole.” Ôyôm tam ôsu vaa, ane Moisés a nga bere nkôô Nebo ayôp, é vôm Jehôva a nga lere ñe é si a nga kiagh Abrahán, Isaac, ya Jacob. Moisés a mbe a bele mimbu 120 éyong a nga wu.

Jehôva a nga dzô Josué naa : “Kighaneye ôshuiñ Jordán, ye ke ñii a Canaán. Ma ye wô vole, fave ane me nga vole Moisés. Langhe Atsing dam môs misese. Ô taa ko wong. Boghe ngengaa. Kenghe ye dzale é mam mese me va dzô wô naa ô bo.”

Josué a nga lôm bedong bebèñ é kisoan ba luè naa Jericó. Nlang wa zu, bia ye tugha yeghe é dzam é nga bobane wéñ. Éyong be nga bulan, éde be nga dzô naa tam té éde é mbe mvèñ naa be ñii a Canaán. É môs ô nga berane vaa, éde Josué a nga dzô ayong naa, é mane vaa bibem. Éde a nga lôm befara be mbe be baghe Arca nge ki Arche ye élat ôsu, ôshuiñ Jordán. Ôshuin ô mbe abôm ya ndeme. Ve, niène be nga tele mebo meba mendzim été, éde ôshuiñ ô nga tebe naa wa sighi, mendzim me mane fe kôt ! Befara be nga wulu ya ke kuiñ ézizang ôshuiñ, éde be nga tebe vôm ôvoo kaa fe bera wulu, ya ke kuiñ ayong ngura é nga mane kighane ôshuiñ. Ye wa tem naa, akengha té é nga simane be é dzam Jehôva a nga bo akal deba Évele mang ?

Asughlan, niène mimbu mité mise mi nga mane lôr, éde Bisraelitas be nga ñii a Si ngiagh été. Be mbe long menda ye bekisoan. Be mbe fe bèñ minfin, mefup mevino ya bilé bia wum bibuma. A mbe é si da kuiñ meñang ya wing.