Melere Juan

Éyong ntôô Juan nge ki Jean a mbe a mbokh ékôr mang ya Patmos, Yésu a nga lere ñe nsama minleran 16 nge ki bivaghle, bi tsinane mam me ye melu ma zu. Minlerane mité mi nga lere aval éyôla Jehôva da ye tobe nfuban, aval Édjié Nzame da ye so, ye fe aval nkômane wèñ wa ye dzaleban a si va ane é ntoo dzôp été.

Nlerane mboo y’été, Jean a nga yen ane Jehôva a too éto édjié duma déñ ayôp, ya bemvene 24 be to-toane ñe minfeng, be baghe minfum bitôp ya mintôm bidjié mi too mboane ya kông minlô miaba. Veleves ya édung zalang dé kuiñ éto édjié dzèñ. Bemvene 24 ba kure Jehôva mebong asu bé kang fe ñe. Nleran ôfe été, Jean a nga yen ane mûra nsama bôt be ye mesi-mesi, meyong-meyong, minkobe- minkobe be nga ve Jehôva ékang. Yésu, é moan ntôma Nzame, a baghle be ye lere fe be zen ye mendzim me y’éning. Dene vèè, nleran fe été, Jean a nga yen ane Yésu a sum djié ane Kéza a dzôp été ya bemvene 24. Nleran ôvoo été, Jean a nga yen ane Yésu a lumane baa dragon, éñi ane Satan ye mbia minsisim mièñ. Yésu a nga tsirane be a dzôp été ane a nga wua be a si.

Ane Jean a nga bera fe yen mbemba évaghle ye Ntôma Nzame ya be 144 000 be tele nkôô Sion. A nga yen fe angele é yele bébéñ si, é dzô bôr naa be ko Nzame wong ya ve ñe duma.

Nleran ô nga berane vèè, Jean a nga yen alumane Armagedón. É tam alumane té, Yésu ye bizima bièñ ba wunu émo Satan. Nleran wa sughlan vèè, Jean a nga yen ane ña élat é ntoo a dzôp été ya fe a si. Satan ye é mvong dzèñ bese be maneyang dzang. Bôr bese, a dzôp été ye a si va, be nga kang-hang ve Jehôva, ya ñong éyôla dzèñ ane nfufup.