É kalare a so ébe Tsîn Ékôan

A é bobedzang bia dzing :

Bia, bebo-bisèñ Jehôva, bia dzing Biblia, Éfiè dèñ. Bi ne ndzi-n’nem naa, éyong a kobe é mam me nga bobane melu ô mvus, a ne bebela, a ve mbemba melepgha akal minfa misese mi ye éning, ye naa, a ve bia mendem ma lere naa, Jehôva a dzing boan be-bôr (Bya 119:105 ; Luc 1:3 ; 1 Jean 4:19). Bia bira kômô vole é bôr bevoo a yen, bebebela be ne éban, be ne Éfiè Nzame été. Akal dzam té, éde bi ne édedaa mevakh naa bia kulu abakh, « Ma ñong meyeghle ye minlang mi ya Biblia ». Ve, lighane bia naa, bi tare mina dzô é mam mézing mia ye yen abakh té été.

Ôsusua, be nga kôman abakh té akal bong. Ve, be ne fe belane de naa be vole beñabôrô ba kômô yem abuiñ mam ma daghe Biblia. Ve, amu Biblia a ne abakh é ne akal môr ase, éde bia besese bia ye ñong abuan bi yen meyeghle me ne été. Meyeghle meté, me ne faa bia ve ña mevakh.

Dé belane minlang mi ya Biblia, abakh di, da kane nlang ye éning moan môr a sum ye avele ya ke kuiñ ôsu. Bi nga ve mengu’u mese naa, bi kanghle minlang mité, é tam ye aval mi nga boban, naa mi bo ébubu a wokh.

Ve, abakh di daa bo ki ve a kanghle minlang mi ya Biblia. Bi nga tugha fas mintsilan, ye bivaghle bi ne été nfa ye naa, minlang mité mi bo vevee, ye naa, mi kulan awôran é bôr ba kobe a bo été.

Abakh di, da vole bia a yen naa, Biblia a ne abakh da kobe a bia adzô befam ye é binenga be nga bo Jehôva mewokh, ya éba béé dzi ki ñe bo mewokh. Da vole fe bia, a ñong meyeghle ngalane bifônane bieba (Beromain 15:4 ; 1 Becorinthien 10:6). Abakh di é bele mengap 14. Kada ngap, da sum ye moan akighe bes ye meyeghle bi ne ñong été.

Nge ô ne mbyèñ, ô ne lang ayeghle évoo ya é moan wiè, éyong té mia ñe mia lèè minlang nfa bivaghle bi ne été. Akôrô ye vèè, mia ñe mi ne lang bifus bi ya Biblia bi ne tsîn ayeghle té. Voleghe é moan wiè naa, a yen élar é ne é zang é dzam a lang a Biblia été, ya ayeghle da kuiñ abakh été. Ô ne fe belane mboane té, éyong wa vole ñamôrô naa, a tugha wokh é fuèñ da so a Biblia été.

Bi bele ndzi-n’nem naa, abakh di da ye vole é bôr be bele mbemba étéñ n’nem, a bo bitong nge ki beñabôrô, a yeghe é dzam Biblia a dzô, ye dzale meyeghle me ne été, bining bieba. Asughlan, baa fe, ba ye ñe kang ane bôr be ye é nda-bôr dzèñ a dzing.