Ye ô bele mebun ?

Bia yiène bele mebun nge bia kômô ve Jehôva n’nem mbeng. Ve, Biblia a dzô naa « mebun me se ki é dzôm bôr besese be bele » (2 Beth. 3:2). Éyong ntôl Pablo nge ki Paul a nga dzô dzam té, a mbe é kobe « mbia be bôr, ye be bo abé » be mbe bé tsible ñe. Ve daa, é dzam a nga dzô nfa mebun é ne fe bebela nfa bôr befe. Amben ba yen mendem ma lere de, abuiñ bôr baa kômô ki yebe naa, é Nzame a nga vele mam mesese a ne (Bero. 1:20). É bôr bevoo ba dzô naa, baa ba buni naa dzôm ézing, nge ki naa môr ézing, a bele é ngu’u da dang. Ve daa, se ki mebun meté étam, é me ma ve naa bi ve Jehôva n’nem mbeng.

É ne éban ébe bia naa, bi tobe ndzi-n’nem naa Jehôva a ne, ye naa, é ñe a ne éñi a boran é bôr be bele mebun me ne ngu’u ébe ñe (Behéb. 11:6). Naa bi bele aval mebun meté, bia yi avole nfufup nsisim Nzame. Nge bia kômô naa Jehôva a ve bia nfufup nsisim wèñ, bia yiane ñe wô dzaa meyaghlan été (Luc 11:9, 10, 13). É dzam éfe é ne éban, é ne bia vole naa bi bele nfufup nsisim bining bia, a ne éyong bia lang éfiè dèñ Biblia ; amu naa betsili Bible, be nga tsili ñe ngalane nfufup nsisim Jehôva. Bi ne binan ébe é dzam bia lang, ye dzeng naa bi dzale é dzam bia yeghe. Éyong bia bo de, bia ve naa nfufup nsisim Jehôva, ô bele afôô bining bia été, ye vole bia naa bi bele aval mebun ma ve ñe n’nem mbeng.