AYEGHLE 26
DZIA 123 Bia sukh Édjié Jehôva asi
Boghe asili ñuu éyong ô ne kaa wokh mam mézing
« Bii se ki mane wokh Éñi a bele mengu’u mese » (JOB 37:23).
É DZAM BIA YE YEN
Amben biaa yem ki é mam mese ma ye boban, bi ne tsini naa bia zômô mindzukh éyong bia bembe ébe é mam bia yem, ye ve mebun maa ébe Jehôva.
1. Éyong Jehôva a nga vele bia, a nga likh naa bi ne bo za mam, amu dzé ki a nga vele bia aval té ?
JEHÔVA a nga vele bia, é likh bia naa, bi tem, bi yeghe mam, bi veme n’woghane mam waa, ye bo mam ya fakh. Amu dzé a nga vele bia aval té ? A nga vele bia aval té amu a kômô naa bi « yen n’yemane Nzame » ye naa, bi sèhane ñe ya ngu’u ya nfasane waa (Mink. 2:1-5 ; Bero. 12:1).
2. (a) Meniè mevé bi bele ? (Job 37:23, 24). (A daghe fe évaghle). (b) Aval avé bia buane de éyong bia yebe meniè maa ye asili ñuu ?
2 Amben be nga vele bia naa bi ne yeghe mam, vedaa, bi bele meniè nfa é mam bia yem (a lang Job 37:23, 24). Ntamane yen éfônane Job. Jehôva a nga sili Job abuiñ minsili mi nga vole ñe a wokh naa aa mbe ki é yem abuiñ mam. Dzam té é nga ve ñe asili ñuu ye vole fe ñe naa a songhane ôtemgha wèñ (Job 42:3-6). Bia fe bia buane de, éyong bia yebe ye asili ñuu naa, biaa yem ki mam mesese. Aval asili ñuu té da ve naa bi tobe mebun naa, Jehôva a ye bia lere é dzam ébién bia yiène yem nfa ye naa, bi ñong mbemba minkighan (Mink. 2:6).
Bi ne ñong abuan éyong bia yem é mam bi ne kaa yem, aval ane é nga lôran a Job (A daghe éfaghle 2)
3. Mam mevé bia ye yen ayeghle di été ?
3 Ayeghle di été, bia ye yen é mam mézing bi ne kaa yem ye mindzukh mi ne so ayat. Bia ye fe yen amu dzé é ne mbeng naa bi taa yem mam mézing. A yen mam meté, da ye wône mebun maa naa, Jehôva « Éñi a ne kaa ékop nfa n’yeman, » a kare bia é dzam ébién bia yiène yem (Job 37:16).
BIAA YEM KI ÉYONG AMANEGHA DA YE SO
4. Aval ane bia lang de nten Matthieu 24:36, za dzam biaa yem ki ?
4 (A lang Matthieu 24:36). Biaa yem ki éyong amanegha ye émo di da ye so. Amben Yésu éyong a mbe a si va, éé mbe ki é yem « môs ye awalaa ». Ôsu, éde a nga dzô mintôô mièñ naa, Jehôva, Éñi a dang yem tam, a baghle mam mézing « ébe é tam émién a nga tele » nge ki édjié dèñ asi (Bisè mintôl 1:6, 7). Jehôva a bele ntaane mam akal amanegha ye émo di. Vedaa, bii tele ki étéñ da ve bia naa bi tugha faa yem éyong amanegha té da ye so.
5. Za aval é ne bia name éyong biaa yem ki é tam amanegha da ye so ?
5 Éyong bia siman é dzam Yésu a nga dzô, biaa yem ki abim tam bia ye bera yane, ya ke kuiñ amanegha da ye so. Dzam té é ne ve naa bi taa dzibi nge ki naa bi sili mo ôsi, dang-dang nge é ntoo ôbekh-bekh tam ave bia yane é môs Jehôva. Nge ki naa, é ne bo ndzukh naa bi zômô é pogho da so bia ébe bôr be ye menda me-bôr maa, nge ki ébe bôr befe (2 Pierre 3:3, 4). Bi ne tem naa, é mba bia bo ébubu naa bi yane kaa sili mo ôsi ye zômô é pogho é bôr bevoo, nge bi mbe bi yem é môs ôbién amanegha da ye so.
6. Amu dzé é ne mbeng naa, biaa yem ki éyong amanegha da ye so ?
6 É ne bebela naa, éyong Jehôva aa kare ki bia é môs ôbién amanegha da ye so, a ve bia maa ya lere naa, bia sèhane ñe amu bia dzing ñe, ye fe amu bia tobe ñe mebun. Biaa kômô ki sèhane Jehôva fave ya ke kuiñ amanegha ye émo di, bia kômô fe sèhane ñe mbèmbèè. Ndaane naa bi tare bembe ébe « é môs Jehôva », é ne mvèñ naa bi bembe ébe é dzam môs té wa ye bo. Dzam té da ye bia vole naa bi tugha bera yir Jehôva bébéñ, bi ve mebun maa ébe ñe, ye bo é dzam ésese bi ne bo naa bi ve ñe n’nem mbeng (2 Pierre 3:11, 12).
7. Za dzam bia yem ?
7 É ne mvèñ naa, bi bembe ébe é dzam bia yem ; naa melu me ye asughlan me nga sum mbu 1914. Jehôva a nga ve naa, minkulane medzô mi ya Biblia mi dzô, se fave mbu té, ve ya dzô fe é mam me nga ye boban a si ése ngura a sum ye mbu té. Dzam té da ye ve naa, bi tobe ndzi-n’nem naa « é môs n’nen Jehôva ô ntoo bébéñ » (Soph. 1:14). Bia yem fe ésèñ Jehôva a kômô naa bi bo, da yili naa, bi kar abim bôr besese bi ne de bo, « mbemba fuèñ ye Édjié Nzame » (Mat. 24:14). Ba kanghle fuèñ té bébéñ mesi 240 a lôr minkobe 1 000. Déé se ki éban naa bi yem « môs ye awala » naa, bi bo é ngap daa ye ayông, nfa ésèñ é ne édedaa éban té.
BIAA YEM KI AVAL JEHÔVA A NE BO MAM
8. « Ésèñ é Nzame a ne bebela » da tsinane za dzam ? (Ecclésiaste 11:5).
8 Se ki éyong ése éde bia yem « ésèñ é Nzame a ne bebela » (a lang Ecclésiaste 11:5). Nsama bifiè bité, bia tsinane ye é dzam Jehôva a ve naa é boban, nge ki é dzam a likh naa é boban, nfa ye naa, a dzale nkômane wèñ. Bii se ki yem ya bebela amu dzé Jehôva a ne likh naa dzam ézing é boban nge ki aval ébién a ye bia vole (Bya 37:5). Aval ane beyem-mam be ngene kaa mane tugha wokh aval moan a vem abum ñia été, aval daa fe, bii se ki mane wokh n’yemane Jehôva.
9. Za aval bi ne sum naa bia tem, amu biaa yem ki aval Jehôva a ye bia vole ?
9 Bi ne sum naa bia ko wong naa bi ñong minkighane mizing, amu biaa yem ki aval Jehôva a ye bia vole. Bi ne sum naa bia ko wong naa bi dzimle mam mézing bining bia nfa ye naa bi veme ésèñ minkanghle daa, ane a ning moan éning, nge ki a ke é vôm ba yi avole bekare fuèñ be ye Édjié Nzame. Nge ki naa, bi ne sum a sili bia bebién nge bi ngen faa bi bele ayebe Nzame, nge biaa kuiñ ki naa, bi dzale minsonghane mi ya nsisim mia, nge bi ne kaa yen bibuma bi ye ndzukh ésèñ bia bo minkanghle, nge ki éyong bia tubane mindzukh ébe ayem ézing be va ve bia Ékôan Jehôva été.
10. A bo kaa yem aval Jehôva a ye bo mam, da vole bia naa bi bele mefulu mevé ?
10 A bo kaa yem aval Jehôva a ye bo mam, da vole bia naa bi bele mefulu ane, asili ñuu ye yem meniè maa. Da ve naa, bi yem naa, metemgha ye mezen Jehôva ma dang ôyap ôyô a lôr émaa (Esaïe 55:8, 9). Bia yeghe fe a ve mebun maa mese ébe Jehôva ye yaghbe ébe ñe nfa ye naa, mam me wulu bia mbeng. Éyong mam ma wulu bia mbeng minkanghle nge ki ébe ayem ézing be va ve bia Ékôan été, da likh naa bi ve Jehôva ôlughu (Bya 127:1 ; 1 Becor. 3:7). Nge mam me bo kaa wulu aval bi va yane de, bia yiène simane naa, Jehôva a yen asese (Esaïe 26:12). Bia bo é ngap daa, ye naa, bia ke ôsu ye ve mebun naa, Jehôva ñe a ye fe bo é ngap dèñ. Bi ne tobe ndzi-n’nem naa, a ye bia lere é zen bia yi, amben aa bo ki de ya akengha aval a mbe é bo de biyong bizing melu ô mvus (Bisè mintôl 16:6-10).
11. Za dzam bia yem naa é ne bia vole ?
11 A binan ébe n’yemane bi bele naa Jehôva a ne édzing, sôsôe ye fakh. Bia yem naa, a bira dzing é dzam bia bo akal dèñ ye fe akal bobedzang ye bekal baa. Bia yem fe naa, éyong ésese, Jehôva a boran é bôr be ne ñe sôsôe (Behéb. 11:6).
BIAA YEM KI É DZAM DA YE BOBAN ÔKIRI
12. Za dzam nten Jacques 4:13, 14 wa dzô naa, biaa yem ki ?
12 (A lang Jacques 4:13, 14). Bebela a ne naa, biaa yem ki é dzam da ye lôrane bining bia ôkiri. Émo di été, bia tuban « é tam ya é mam bi vaa yane ki » (Eccl. 9:11). Ya dzam té, bii se ki yem nge mam ma ye wulu aval bi va ta mo nge ki naa, da ye kuane bi ngen bi tèè naa bi dzale mo.
13. Aval avé bi wôla wôrane biyong bizing amu naa bi ne kaa yem é mam mesese ma ye bobane melu ma zu ?
13 É ne bia bo ndzukh naa bi zômô mindzukh amu naa, bi ne kaa tugha yem é dzam da ye bobane melu ma zu. Dzam té é ne bobane ya ? Bi ne yep a n’nem nfa é dzam é ne boban, ye naa, dzam té é ne ve naa bi dzimle mevakh maa. Bibubua bi-mam, ya é mam ma sia bobane kaa naa bi va yane mo, me ne bia bira ve n’nem mintéñ ye likh naa bi tobe éwiñ. Ya naa, éyong é mam bi mba bi yane me ne kaa dzalban, é ne bia sulu ñuu ye ve naa, bi sili mo ôsi (Mink. 13:12).
14. Za dzam bia yiène bo, ya yem nfa ye naa bi bele ña mevakh ? (A daghe fe bivaghle).
14 A bo é dzam ésese é ne lôrane bining bia, bi ne lere naa bia sèhane Jehôva amu naa, bia dzing ñe. Minlang mi ya Biblia mia lere bia naa, biaa yiène ki yane naa Jehôva a kame bia ébe mindzukh misese bia tubane mio, ya naa, aa tare ki mane ta aval éning dèè da ye bo. A yem naa mevakh maa méé tsii ki ébe é mam ma ye lôrane bia melu ma zu. Ndaane de, mevakh maa me tsii ébe a dzeng é zen a lere bia, ye bo ñe mewokh (Jér. 10:23). Éyong bia yaghbe ébe ñe é tam bia ñong minkighan, a ne ane bia dzô naa : « Nge a ne nkômane Jehôva, bia ye ning ye bo dzam ôsi, dzam ôkaa » (Jacq. 4:15).
A dzeng naa Jehôva a wulu ya bia ye bo ñe mewokh da ve naa bi tobe ña nkaman (A daghe bifaghle 14-15)b
15. Za mam bia yem nfa melu ma zu ?
15 Biaa yem ki é dzam da ye bobane kada môs, vedaa, bia yem naa, Jehôva a nga kiagh bia éning é ne mbèmbèè, é ne bo a dzôp été nge ki a si va. Bia yem naa, éé se ki kobe minaa, ye naa, dzam ézing déé se ki kame ñe naa a dzale mengiagh mesese mèñ (Tite 1:2). Éñe étam a ne « dzô é dzam da ye bo asughlan, ye naa, atéé ye abuiñ metam ô mvus, é mam maa be ki boban ». Dzam té é mbe bebela melu ô mvus, da ye fe bo bebela melu ma zu (Esaïe 46:10). Bia yem ya bebela naa, dzam ézing déé se ki kame Jehôva naa a dzing bia (Bero. 8:35-39). A ye bia ve fakh, a ye bia fôlô, a ye fe bia ve ngu’u ya zômô ndzukh ôsese bi ne tubane wô éning daa. Bi ne tobe ndzi-n’nem naa, Jehôva a ye bia vole ye borane bia (Jér. 17:7, 8).
BII SE KI MANE WOKH NTÉ MBÉ JEHÔVA A TUGHA BIA YEM
16. Za dzam Jehôva a yem nfa waa, ye naa, dzam té da ve naa bi wôrane ya ? (Bya 139:1-6).
16 (A lang Bya 139:1-6). Mvele waa a yem é mam mesese ma daghe bia. A yem amu dzé bia tem ye wôrane ngura aval. A yem é mam bia dzô ye éma me ne bia min’nem été. A yem fe é mam mesese bia bo, ye amu dzé bia bo mo. Kéza David a nga dzô naa, Jehôva a ne nkoghane tam ése naa a vole bia, ye naa, a bele fe ngu’u ya bo de. Za dzam wa wôran éyong wa yem naa, Nzame mengu’u mese, Éñi a dang ôyap ôyô, ya Mvele mam mese a bira wô bis ? David a nga dzô naa : « Ma bira kam aval n’yemane té. Ô ne ôyap ôyô a lôr n’woghane mam wom » (Bya 139:6, atoan).
17. Amu dzé é ne bia bo ndzukh a yebe naa Jehôva a tugha bia yem ?
17 É ne bia bo ndzukh a yebe naa Jehôva a ne ndzidzing Ésaa waa a bis bia, éyong ézing amu é nda-bôr bia so été, metum maa, nge ki é mam bi mbe bi bunu melu ô mvus. Nge ki, bi ne wôrane naa, bikop bi nga bo melu ô mvus bi ne édedaa abé aval da ve naa, Jehôva aa ye ki bia vaghle kômô a yem, ye naa, a tele bia édedaa ôyap. Amben David ñe a nga wôrane fe aval té (Bya 38:18, 21). Nge ki naa, é môr a dzeng ya n’nem ôse naa a tsen aval éning a bele nfa ye naa, a ning aval metsing Nzame ma sili de, a ne tem naa, « Nge Nzame a tugha faa me wokh, amu dzé a ne yane naa, me likh aval abo-dulu é ne me ndzukh a likh ? »
18. Amu dzé é ne éban naa bi yebe naa Jehôva a yem bia a lôr bia bebièn ? (A daghe fe bivaghle).
18 Bia yiène yeghe a yebe naa, Jehôva a yem biè a lôr bia bebièn ya naa, a ne yen é dzam é ne mbeng ébe bia a lôr bia bebièn. Vedèè, amben a yen bikop bia bo, a yem amu dzé bia wôrane ya bo mam aval té. A dzing bia (Bero. 7:15). Éyong bia yem naa Jehôva a yen aval bôr bi ne bo, da ye bia ve é ngu’u bia yi naa bi sèhane ñe sôsôe ya bo de ya mevakh.
Jehôva a vole bia naa bi wône mbunane waa ébe é mbemba éning a kiagh bia. Aval té éde a vole bia a zômô mindzukh mia sia biaane bia kaa naa bi va yane mio (A daghe bifaghle 18-19)c
19. Za dzam bia tugha yem nfa Jehôva ?
19 Bia yem naa Jehôva a ne édzing. Bii se ki sôô dzam té (1 Jean 4:8). Bia yem naa é mam mese a dzô bia naa bi bo ya é mam a dzô bia naa bi taa bo, a bo do amu a dzing bia ya naa, a kômô naa bi bele mbemba éning. Bia yem naa Jehôva a kômô naa bi bele éning é ne mbèmbèè. Amu Yésu a nga wu akal dèè, bi ne bele ndzi-n’nem naa bi ne sèhane Jehôva aval a kômô, ya aval da ve ñe n’nem mbeng (Bero. 7:24, 25). Bia yem fe naa, « Nzame a lôr min’nem miè, a yem fe mam mese » (1 Jean 3:19, 20). Jehôva a yen é mam mese ma lôrane bia ya naa, a bele ndzi-n’nem naa, bi ne bo nkômane wèñ.
20. Dzé da ye bia vole naa bi taa dang kele min’nem ôyô nfa é mam biaa yem ki ?
20 Jehôva éé dzi ki bia shuale é dzam a yem naa bia yiène yem. Éyong bia yebe dzam té ya asili ñuu, da ve naa bi taa kele min’nem ôyô nfa é mam biaa yem ki, ya bembe fave ébe é mam me ne éban. Éyong bia bo do, bia lere naa bi bele mebun ébe Jehôva « é Môr a tugha yem mam » (Job 36:4). Amben biaa tugha ki wokh mam mézing éndagha, bia yem naa Jehôva a ye tsini naa a yeghle bia minféféñ mi-mam, mbèmbèè. Da bo bia n’nem mbeng amu bia yem naa, biaa ye ki likh naa bia yeghe minféféñ mi-mam nfa é Nzame wèè (Eccl. 3:11).
DZIA 104 Nzame, vakh bia nsisim wiè
a Yésu a ye tebe ôsu alumane ye mbia émo Satan, amu dzam té éde bi ne dzô naa, éndagha, a nga yem-hang é tam ébién Armagedón a ye boban ye fe éyong a ye « man alumane dèñ » (Mel. 6:2, 19:11-16).
b AYILGHA BEFÔRÔ : Ésaa ézing ba ndôma dzèñ ba wiè biôm nfak mbii, aval da ve naa nda-bôr é tobe nkoghane nge ébubua dzam da sia boban.
c AYILGHA FÔRÔ : Moadzang ézing a tubane mindzukh a daghe ôsu ébe mevakh ma yane ñe nféféñ éning