Ye ô « yegheyang ashuèñ » ya tobe mevakh ye abim ô bele ?

1. A tobe mevakh ye abim môr a bele da yili ya, ye naa, za dzam daa yili ki ?

YE Ô ne é môr a tobe mevakh ye abim a bele ? É môr a ne mevakh ye abim a bele, a tobe mesan, a wôrane fe mvoa, éyong a bembe ébe biboran a bele éndagha. Aa wôrane ki éwiñ nge ki n’nem abé amu é biôm bia dzeng ñe. Vedaa, amben éyong bi ne mevakh ye abim bi bele, daa yili ki naa, biaa bis ki aval éning da wulu bia. Ya dzam té, déé se ki abé naa bi kômô bo abuiñ, éyong bia sèhane Jehôva (Bero. 12:1 ; 1 Tim. 3:1). Vedaa, biaa dzimle ki mevakh nge meyem bia kômô maa so ki avôô aval bi mba bi yane de.

2. Za mbia be-mam me ne boban nge bii se ki mevakh ye abim bi bele ?

² Nge bii se ki mevakh ye abim bi bele, bi ne sum naa bia ñong mbia minkighan. É bôr béé se ki mevakh ye abim be bele, be ne sèñ édedèè abuiñ mewala, nfa ye naa be bele akum baa yi ki. Édi é ne éngôngoo é ne naa, bekristen bézing be nga dzip mono ya é biôm bife be nga kômô. É ne bo naa, bébién be nga dzô naa, ‘ma yiène a do’, ‘me yaneyang abuiñ’, mé dughane mono té ôsu.’ Vedaa, aval wup ôsese da ve Jehôva n’nem abé, da ve fe ñe éyôla mvin (Mink. 30:9). É bôr bevoo be nga sili mo ôsi amu ye naa, baa dzi be ve ayem be va kômô ya ke kuiñ be va vane likh naa baa sèhane ki fe a Jehôva (Begal. 6:9). Za aval mbo-ésèñ Jehôva a vehang ñe éning dèñ, a ne tem naa a bo aval dzam té ? Adzô é ne bo naa, môr té aa mbaa ki fe a too mevakh ye abim a bele.

3. Za bebela a sili n’nem, bia yeghe Bephilippien 4:11, 12 ?

³ Bia besese bi ne yeghe a tobe mevakh ye abim bi bele. Ntôô Pablo nge ki Paul a nga tsili naa, a nga « yeghe a tobe mevakh ye abim [a] bele, kaa bis étéñ [dèñ] » (a lang Bephilippien 4:11, 12). A nga tsili bifiè bité a too a mbokh. Vedaa, éé dzi dzimle mevakh mèñ. A « nga yeghe ashuèñ » ya tobe mevakh ye abim a mbe a bele. Nge bi ven mengu’u naa bia tobe mevakh ye abim bi bele, bifiè Pablo, ya é mam a nga lôt, ma ban bia naa, bia fe bi ne tobe mevakh ye abim bi bele. Biaa yiène yane naa da ye bia bo ébubu a tobe mevakh ye étéñ daa. Ndaane de, bia yiène yeghe a tobe mevakh ye abim bi bele. Za aval ? N’yeneghane mefulu mézing ma ye bia vole naa bi yeghe ashuèñ ya tobe mevakh ye abim bi bele.

A YEGHE A VE AKIBA

4. Za aval fulu ye a ve akiba da likh naa bi tobe mevakh ye abim bi bele ? (1 Bethessalonicien 5:18).

⁴ Fulu ye a ve akiba da ve naa bi tobe mevakh ye abim bi bele (a lang 1 Bethessalonicien 5:18). Éfônan, éyong bia ve faa akiba ya é mam bi bele éning, é ne ndzukh naa bi yep a n’nem akal é biôm bia kômô bele, ve biaa bele. Éyong bia ve mengu’u mesese maa ébe meyem bi bele ékôan éndagha, bia ye bembe naa bi yem bo ésèñ bi bele, ndaane naa, bia dang kele min’nem ôyôp naa be ve bia minféféñ meyem mefe. Biaa yaghane ki de naa, Mintsili mia lere éban é ne naa, bi tsini naa bia ve akiba éyong bia yaghlane Jehôva ! A bele fulu ye a ve akiba da ye bia vole naa, bi wôran « é mvoa Nzame édi da lôr n’woghane mam ôsese » (Beph. 4:6, 7).

5. Amu mekalgha mevé Bisraelitas be nga yiène ve akiba ? (A daghe fe évaghle).

⁵ N’tamane yen é dzam é nga lôt ya Bisraelitas. Abuiñ biyong, be nga kè Jehôva naa, béé mbe ki be bele bidzi be nga tare buane bio Egipto (Nla. 11:4-6). É ne été, éning éyang été déé mbe ki ébubu. Dzé é mbe ba vole naa be tobe mevakh ye abim be mbe be bele ? Be nga yiène fas ye ve akiba akal é mam a kuè Jehôva a bohang akal deba. Egipto, é vôm be mbe be belane be ya nget, be too fe minkôm, Jehôva a nga so bibubua awôm akal Begipcios éde fe a nga kôre be. Niène Bisraelitas be nga tobe nkôran, be « nga mane ñong Begipcios » abuiñ akum, ane kông, ngôs ya bitôp (Akô. 12:35, 36). Niène be nga sum naa ba dzirane bo nfa Évele mang, ya akengha, Jehôva a nga kap mendzim ô zang. Éyong be nga bo fe ékena éyang, Jehôva a nga ve fe bo bidzi môs misese, ya maná. Éde, éñe ntsiè ô mbe vé ? Bisraelitas béé mbe ki mevakh ye abim be mbe be bele se amu naa be nga yi bidzi, a mbe amu naa, baa dzi ki ve akiba ye abim be mbe be bele.

6. Za meval bi ne yeghe a bele fulu ye a ve akiba?

⁶ Éndagha, dzé é ne wa vole naa ô yeghe a ve akiba ? Ôsusua, ñonghe tam ébe kada môs naa ô tem é mam wa buane mo. Ô ne fe tsili mam mebèñ nge melal wa ve me akiba (Min. 3:22, 23). Édi bèè, va akiba. Tebeghe ôsu nfa ye a ve é bôr bevoo akiba amu é mbemba be-mam ba bo akal duè. É dzam wa yiène tele ôsu, é ne a bo mban a ve Jehôva akiba (Bya 75:1). Édi lal, tobghe ane memvuiñ, é bôr ba yem a ve akiba. A ve akiba da kôban ; a bo kaa yem a ve akiba, daa, da kôbane fe (Deut. 1:26-28 ; 2 Tim. 3:1, 2, 5). Éyong bia bembe naa bia ve akiba, da ye bo ndzukh naa, bi wôrane naa bii se ki mevakh ye abim bi bele.

7. Aval avé Aci a nga yeghe naa a ve akiba ye naa, asughlan é mbe ya ?

⁷ N’tamane yen é dzam é nga lôrane Aci, éñi a too Indonesia. A mem naa : « Metam môra ôkoan COVID-19, me nga sum naa ma vaghan étéñ dam ya édi bobedzang ye bendôm bam be ye ékôan. Asughlan, me nga sum bo é môr a ne kaa tobe mevakh ye abim a bele » (Begal. 6:4). Dzé é nga vole ñe naa a tsen ôtemgha wèñ ? Aci a dzô naa : « Me nga sum naa ma lang abim biboran me mbe me bele kada môs, ye binan ébe abim abuiñ mam me nga wun amu ye naa me mbe môr mboo ye Ékôan Jehôva. Éyong té, éde me nga ve Jehôva akiba. Asughlan, me nga wôran ña mevakh ye abim me mbe me bele. » Nge wa wôrane naa, wéé se ki mevakh ya étéñ duè, ye ô ne bo é dzam Aci a nga bo, nfa ye naa, ô bele fulu ye a yem a ve akiba ?

BEMBEYE, TSINIGHE FE ASILI ÑUU

8. Za ôlam Baruc a nga ku été ?

⁸ Baruc, n’tsili bekalare nkulu medzô Jeremías, a nga ku ôlam abong tam. Baruc a mbe a bele ésèñ é mbe ayèñ, naa a nga yiène sukh Jeremías éyong ñil té a nga kanghle é fuèñ é mbe ngu’u akal n’nam ô mbe kaa yem a ve akiba. Ébe ngura tam, Baruc éé dzi fe bera bembe ébe ésèñ dèñ. Ndaane naa a bembe ébe é dzam Jehôva a nga yi naa a bo, da yene naa, Baruc a nga sum naa a bira siman émién, ye simane fe, é dzam a mbe é kômô bo. Jehôva a nga belane Jeremías naa a dzô Baruc naa : « Wa dzeng bura be-mam akal duè. Lighe naa wa dzeng mam meté » (Jér. 45:3-5). A ne ane Jehôva a mbe é dzô ñe naa : « Tobeghe mevakh ya étéñ ô tele éndagha ». Baruc a nga yebe n’songhane té, éde a nga tsini naa a tobe mesan naa a bele ayebe Jehôva.

9. Aval ane nten 1 Becorinthien 4:6, 7, wa lere de, za dzam asili ñuu da ye bia vole a yebe ? (A daghe fe bivaghle).

⁹ Biyong bizing, moan kristen a ne wôrane naa a yiène ayem ézing ékôan été. A ne bo naa, a bira yem a bo mam, a sèñ ngu’u, nge ki naa, a bele abuiñ n’yeman, nge ki faa, mam meté melal. Vedaa, be ne ve é bôr bevoo ayem a va kômô bele. Za aval a ne binan ébe adzô té ? A ne binan ébe é dzam ntôô Pablo a nga tsili, bia kuane de nten 1 Becorinthien 4:6, 7 (a lang). Ayem ésese ba ve bia, ye akeng ésese bi bele, da so bia ébe Jehôva. Jehôva aa ve ki bia mam meté amu naa bi ne édedaa éban a lôr é bôr bevoo. Asese té, a ne é mvam Jehôva a lere bia kaa naa bia yiène do (Bero. 12:3, 6 ; Beéph. 2:8, 9).

10. Za aval bi ne yeghe a bo asili ñuu ?

¹⁰ Bi ne yeghe a bo asili ñuu nge bi tugha binan ébe éfônane Yésu a nga likh bia. N’tamane yen é dzam é nga boban alu Yésu a nga sôp beyeghe bèñ mebo. Ntôô Juan a nga tsili naa : « Yésu, é yem [1] naa Ésaa a nga ve mam mesese é mo mèñ [2] naa, a nga so ébe Nzame ya [3] a mbe naa, a bulan ébe Nzame, [. . .] a nga sum naa a sôp beyeghe bèñ mebo » (Jean 13:3-5). Yésu a mbe wôrane naa éñe a nga yiène naa be sôp ñe mebo. Ve, nté sesese a mbe a si va, aa dzi vaghle wôrane naa, amu éñe a mbe é moan Nzame, a nga yiène mbemba nda, abuiñ mono, nge ki éning é ne ébubu (Luc 9:58). Yésu a mbe asili ñuu ; a mbe mevakh ye abim a mbe a bele. A nga likh bia mbemba éfônan (Jean 13:15).

11. Za aval a bo asili ñuu, é va vole Dennis naa a tobe mevakh ye abim a bele ?

¹¹ Dennis, éñi a too Países Bajos nge ki Pays-Bas, a va dzeng naa a vu asili ñuu Yésu, ve, déé dzi ki ñe bo ébubu. A dzô naa : « Biyong bizing, ma wôran éngung, ya naa méé se mevakh ye abim me bele, ane éyong ba ve môr nfe ayem me mba mé kômô ékôan été. Éyong dzam té da bo, ma yeghe nlô-adzô wa tsiè adzô asili ñuu. Évole dèè JW Library^®, me ke-yang ma ve mendem ébe bifus bizing bi ya Biblia bia tsiè adzô asili ñuu nfa ye naa, me kuane bio avôô, ye naa, me bera bi lang. Me limleyang fe nkoo bisusua wom été, mintun mizing mia tsiè adzô asili ñuu, ye naa, ma bèè mio mbana. Me va yeghe naa, ésèñ ésese bia bo é ne akal naa bi ve Jehôva duma, se bia bebién. Ñil môr ye ébe bia, a bele moan ngap ébe é dzam Jehôva a bo. » Nge ô sum naa, wa wôrane naa wéé se mevakh ya étéñ duè, ñonghe bitéñ mebo naa ô yeghe a bo asili ñuu. Dzam té da ye wônô élar duè ya Jehôva, da ye fe wô vole naa ô tobe mevakh ye abim ô bele (Jacq. 4:6, 8).

A BINAN ÉBE ÔYANE WIÈ

12. Za ôyan akal melu ma zu wa ve bia naa bi tobe mevakh ye abim bi bele ? (Esaïe 65:21-25).

¹² Bia dang tobe mevakh ya abim bi bele, éyong bia binan ébe é môra ôyan bi bele ôsu. Bifiè Jehôva émién, nkulu medzô Esaïe a nga tsili, bia yebe naa é ne ndzukh naa bi ning metam ma, ve bia ban fe bia naa, avitsang tam Jehôva a ye bia zu sulu mbeghe té (a lang Esaïe 65:21-25). Bia ye tobe mbemba nda, éñi é yeme. Bia ye bele mbemba ésèñ, bia ye fe dzi mbemba bidzi bia vole bia naa bi tobe mvoa. Biaa ye ki bera vaghle yep naa bi ne dzukh mbia be-mam ane bia bebién, ane é boan baa (Esaïe 32:17, 18 ; Ézéch. 34:25). Bi ne tobe ndzi-n’nem naa, ngiagh ése, ye mbemba mengiagh meté akal melu ma zu, ma ye dzalban.

13. Bitéñ bivé bi ne dzeng naa bi dang bembe ébe ôyane wèè ?

¹³ A dang-dang éndagha, bia yiène bembe ébe ôyane wèè. Amu dzé ? Amu bi ntoo « mesughlane melu » ye naa, bia besese bia tubane mindzukh mi ne « ayèñ a zômô » (2 Tim. 3:1). Jehôva a vole bia môs ôse, é lere bia zen, é ve bia ngu’u, ya nsukghane bia yi (Bya 145:14). Nfa mboo, ôyane bekristen waa, ô ne bia sukh metam me ne ndzukh. Éyong ézing, ô ne bele ndzukh naa ô dzale minkômane mi mono mi ye é nda bôr duè. Ye dzam té da yili naa, wa ye yirane éyong ésese naa ô ning ? Kaa dzôm ! Jehôva a kiayang naa, a ye wa ve a lôr abim wa yi a Paraíso (Bya 9:18 ; 72:12-14). É ne bo naa, wa bira dzukh ye ôkoan, nge ki naa, wa wôrane mvoaran, nge ki aval dzam éfe. Éñeng, ye é ñe dzam té da ye tsini aval té nge ki faa naa, waa ye wôrane mvoa môs ézing ? Kaa dzôm. Awu ya akoan, ba ye man nféféñ éning Nzame a kiagh (Mel. 21:3, 4). Ôyane té wa vole bia naa bi tobe mevakh ye étéñ bi tele, bi bo kaa wokh ôlun ye tobe éwiñ éndagha. Bi ne tobe mesan éyong bia tubane ékoar-koat nsang, nge ki éyong bia dzimle dzôm, bia zômô ôkoan, nge aval éndeghle éfe. Amu dzé ? Amu naa, kaa bis mindzukh bi ne tubane mio éndagha, bia yem naa, « étsible é ne akal abong tam » ya naa, nféféñ éning wa ye dzigha so bia avole é ne mbèmbèè (2 Becor. 4:17, 18).

14. Za aval bi ne wône ôyane waa ?

¹⁴ Amu naa, ôyan ô ne tsîn naa bi tobe mevakh ye abim bi bele, za aval bi ne wô wônô ? Aval ane môr a ne belane biyen naa a tugha yem a yen é mam me ne ñe ôyap, éde fe é ne bo éban naa, bi ñong bitéñ mebo ma yiène nfa ye naa bi wônô ôyane waa, ye naa, bi tugha yem a yen bia bebién a Paraíso été. Éyong bia yep a n’nem, tam ézing akal mam me mono, bi ne siman aval éning dèè da ye bo éyong biaa ye ki fe yi mono, éyong memvôla ma ye man, ye naa, bia besese bia ye bo aval daa. Nge bia yep nfa meyem me ye ékôan baa be bia ve, bi ne simane naa, ôsu, niène a ye bo naa bi ntoo besôsôe, ye naa, bi nga sèhaneyang Jehôva bizukh mimbu, biaa ye ki fe yi biôm bité (1 Tim. 6:19). Mesumgha, é ne bia bo ndzukh naa bi binan ébe ôsu waa kaa naa bia yep ya é mam bia lôr éndagha. Vedaa, ya tam, éyong bia bira tem nfa é mbemba éning Jehôva a kiayang bia ôsu, da ye bia ve naa, bi dang bembe ébe ngiagh té ndaane ébe mindzukh bia tubane mio ému.

15. Za dzam wa yeghe ébe é dzam Christa a dzô ?

¹⁵ N’tamane yen aval ôyan ô va vole Christa, éñi a ne nlughane ya Dennis, éñi bi va tare tu ayô. A dzô naa : « Me bele ôkoan minsôn, éwi ô ne ve a ke abé, wé likh fe me naa, me wulu éto mimbobokh, ye naa ma lôr abuiñ mewala me ye ô môs, me bôô énong. Ma wokh mintéñ môs misese. É dokira wom a ndaghe me dzô naa, aa taa ki naa mam ma ye kômban. Ve, étéñ té ébién me nga simane naa, “Aval a yen ôsu, da selan ye aval ma yen wô”. Ma bembe ébe ôyane wom, éwi wa ve ma mvoa ôtemgha. Ému, a ne bo naa ma zômô éning émo di été, ve, ma ye buane de ngum, nféféñ éning ! »

« É BÔR BA KO ÑE WONG, BAA YI KI DZÔM ÉZING »

16. Amu dzé kéza David a mbe tsili naa é bôr ba ko Jehôva wong, « baa yi ki dzôm ézing » ?

¹⁶ Amben éyong bi ne mevakh ye abim bi bele, bia ye tsini naa bia tubane mindzukh. Kéza David a nga dzimle boan belal. Be nga somane ñe ékoar-koat, be nga kong ñe, be nga dzirane fe a ñe tang abuiñ mimbu naa ba kômô ñe wiñ. Vedaa, nté a mbe é zômô meboblane meté, a nga dzô é dzam da daghe Jehôva di : « É bôr ba ko ñe wong, baa yi ki dzôm ézing » (Bya 34:9, 10). Amu dzé a mbe dzô dzam té ? Amu David a mbe é yem naa, amben Jehôva aa kame ki naa a tubane mindzukh éning, a nga ye ñe ve é dzam a mbe é yi éyong ése (Bya 145:16). Ane David, bia fe bi bele ndzi-n’nem naa, Jehôva a ye bia sukh ébe mindzukh mise bia tubane mio. Bi ne tobe mevakh ye étéñ daa.

17. Amu dzé ô bele nkôman ô ne ngu’u naa wa yeghe a tobe mevakh ye abim ô bele ?

¹⁷ Jehôva a kômô naa ô tobe mevakh ye abim ô bele (Bya 131:1, 2). Ya dzam té, vakh mengu’u naa ô yeghe a tobe mevakh ye abim ô bele. Nge ô ven mengu’u naa ô yeghe a ve akiba, a tsini naa wa bembe ye a bo asili ñuu, ye wônô fe ôyane wiè, wa ye kuiñ naa ô dzô naa : « Ôwé, me ne mevakh ye abim me bele ! » (Bya 16:5, 6).