Jehôva éñe a ne é « môra mevakh maa »

1-2. (a)Za étéñ abuiñ bôr ba tubane de ému ? (b)Za dzam bia ye fas ayeghle di été ?

ABUIÑ bôr ému ba ve mengu’u, ba vaghle fe abuiñ mam, nfa ye naa be tobe mevakh. Ve, amben mengu’u ba ve, baa kuiñ ki naa be bele mevakh. Abuiñ bôr é ne édedaa éwiñ amu ba wôrane naa, mam maa kômbane ki akal deba. Daa é ne fe kuiñ naa, bôr be ye ayong Jehôva baa be wôrane fe aval té. Amu naa bi nga ning-hang « melu me ye asughlan », bia bi ne fe bele mindzukh mi ne « ayèñ a zômô » mi ne bia likh naa bi tobe éwiñ (2Tim. 3:1).

² Ayeghle di, bia ye yen é mam me ne likh naa bi tobe éwiñ, ya édi é ne bia vole naa bi bera bele mevakh nge bi va dzimle mo. Ve, ôsusua, n’yenghane za faa a ne Tsîn da ve bia naa bi bele ña mevakh ya ña mesan.

TSÎN YE MEVAKH YA MESAN MA BEM

3. Za dzam avele da lere bia nfa Jehôva ? (A daghe fe bivaghle).

³ Jehôva a ne mevakh éyong ése. A kômô fe naa bia bi bo fe mevakh ya mesan. Ya dzam té, biaa yaghane ki naa avele dèñ da lere mesan mèñ, é mbemba si bi too, abuiñ minsin bia yen, é mbemba metsap betsit ba bo, ya abuiñ bidzi. Nzame a dzing faa bia, a kômô fe naa bi buan éning !

Moan zoa : Image © Romi Gamit/Shutterstock ; boan Bepingüinos bebèñ : Vladimir Seliverstov/500px via Getty Images ; boan bekaban : Rita Kochmarjova/stock.adobe.com ; Bedelfines bebèñ : georgeclerk/E+ via Getty Images

4. (a)Aval avé Jehôva a ne tsini mevakh amben a yen mindzukh mi ne éning ? (b)Za das Jehôva a ve bia besese ? (Bya 16:11).

⁴ Amben Jehôva a ne « Nzame mevakh », a yen éwiñ ya ndzukh ôsese ô ne éning (1Tim. 1:11). Ve, éé dzi likh naa dzam té é séghe ñe mesan mèñ. A yem naa mindzukh mité mi ne ngura tam, ye naa émién a furuyang é tam mia ye man. A tsini fe naa a zômô ya édzip, ya ke kuiñ é môs a ye man éwiñ ésese, ya mindzukh mbèmbèè. Éde Jehôva a tugha wokh étéñ bi tele, a kômô fe bia vole. Za aval a vole bia ? É dzôm évoo a ve bia, a ne das ye a tobe mesan (a lang Bya 16:11). Daghe aval Jehôva a nga kabane das té ya é moan wèñ Yésu.

5-6. Amu dzé Yésu a ne mevakh ?

⁵ Avele ésese Jehôva, Yésu éñe a dang mevakh. Amu dzé ? N’tamane yen mekalgha mebèñ. (1)« A ne éfônan é Nzame bi ne kaa yen », ye naa a tugha lere mefulu Ésaa, meval mesese (Becol. 1:15). (2)Yésu a nga lôr abuiñ tam baa Ésaa, éñi a ne Tsîn ña mevakh.

⁶ Yésu a tobe mevakh é bo, é dzam ése Ésaa a sili ñe (Mink. 8:30,31 ; Jean 8:29). Asughlan ye é sôsôe ésèñ wèñ éde a bele ayebe ya akièbgha Jehôva (Mat. 3:17).

7. Aval avé bi ne bele ña mevakh ?

⁷ Bia fe bi ne bele ña mevakh éyong bia yir Jehôva, Tsîn ye ña mevakh, bébéñ. Nge bia bira lôr tam bi yeghe é mam ma daghe Jehôva, ye dzeng fe naa bi vu ñe, da ye likh naa, bi dang bera bele mevakh. Bi ne fe bele mevakh éyong bia bo nkômane Nzame ya fe éyong bia yem naa, bi bele ayebe dèña (Bya 33:12). Vedaa, za dzam bi ne bo, nge bia yen naa bi ne mban a dzimle mevakh maa ? Ye dzam té da yili naa, bi dzimleyang ayebe Nzame ? Momo ! Bi ne bôr a bikop, ye naa abuiñ biyong, bia dzukh amu naa bia wokh mintéñ, bi ne éwiñ, ye naa bi bele depresión. Jehôva a wokh do (Bya 103:14). N’tamane yen é mam mézing me ne bia dzip mevakh, ya fe aval bi ne bera bele mevakh maa éyong bi va dzimle mo.

Ô TAA LIKH NAA DZÔM ÉZING É DZIP WÔ MEVAKH

8. Aval avé mindzukh mi ye éning mi ne bia name ?

⁸ N’wuwup nomo 1 : Mindzukh mi ye éning. Ye wa tubane mindzukh mia so amu bitsible, bibubua bi-mam, azuèñ, ôkoan, nge ki n’nôm ? Bi ne dzimle mevakh maa éyong bia tuban aval mindzukh mité. É ne dang bo akal mindzukh bii se ki bo dzam nfa ye naa étéñ dzaa é tsen. Biblia a mem naa « éwiñ da ve naa nsisim ô tobe ntsaane » (Mink. 15:13). Babis, é mvene ézing a nga dzimle moanñang, ya bebyèñ bèñ bebèñ fave mimbu minii, a dzô naa : « Me nga wôrane naa me mbe étam, kaa ki avole. Biyong bizing, me nga yiène zômô naa méé dzi ki lôr mbemba tam ya moadzang, ya bebyèñ bam kaa naa be wu. » Mindzukh mi ye éning mi ne bia ve naa bi wôran atekh nsôn, ya ôsiman.

9. Dzé é ne bia vole naa bi bera bele mevakh ? (Jérémie 29:4-7,10).

⁹ Dzé é ne bia vole naa bi bera bele mevakh maa ? Bi ne bera bele mevakh éyong bi ne aval bôr ba yen mam aval me ne, bi ve fe akiba. Émo, da tsini ôsimane ye naa, éning daa, da yiène bo mbeng-mbeng nfa ye naa bi bo mevakh. Ve, dzam té déé se bebela. Éfônan, Jehôva a nga lôm Bejudíos be mbe minkôm a Babilonia, naa be yebe nféféñ étéñ be mbe be tele, be mbe minkôm éza si, ye naa be bo é dzam ése be mbe bo ndzukh étéñ be mbe be tele alé (a lang Jérémie 29:4-7,10). Ayeghle é ne ya ? Dzenghe naa ô yebe étéñ ô tele, wé ve fe akiba akal é mbemba be-mam ô bele éning duè. Simghane naa, Jehôva a ye wô vole é zen duè (Bya 63:7 ; 146:5). Effie, éñi a nga dzukh accidente é nga likh ñe mbômbokh, a dzô naa : « Me nga ñong abuiñ avole ébe é mvong bôr dzam, ébe ékôan ye fe naa Jehôva a nga sukh ma asi. Ya dzam té, me nga wôran ane é môr a ne kaa yem mbeng nge me sili mo ôsi. Ma kômô lere Jehôva ya memvuiñ mam naa, ma ve akiba ya é môra avole be va ve ma. »

10. Amu dzé bi ne tobe mevakh amben bia tubane mindzukh ?

¹⁰ Amben éyong éning déé se ki aval bi va kômô, nge ki éyong mbimbia be-mam ma lôrane bia nge ki bôr be ye é mvong dzaa, bi ne tsini naa bia tobe mevakhb (Bya 126:5). Amu dzé ? Amu naa mevakh bi bele, maa so ki ya étéñ bi tele. María, mpwaghe mefan ézing, a dzô naa : « Éyong wa tubane mindzukh, a tsini naa wa bele mevakh daa yili ki naa, wa vuène é mam wa wôran. Ndaane do, da yili naa waa vuène ki mengiagh Jehôva. Ésaa waa a ye bia vole naa bi kame mevakh maa. » Simeghane naa, kaa bis étéñ mindzukh wa lôr éndagha, mindzukh misese bia tubane mio, mi bele tam. Amben étéñ duè é ne édedaa ndzukh éndagha, daa ye ki tobe mbèmbèè. Avitsang tam, Jehôva a ye vaa é dzam ésese da ve bia naa bi dzukh ya naa bi tobe éwiñ.

11. Za aval éfônan ntôô Pablo da ve wô ngu’u ?

¹¹ Nge é ne naa, bi sume-yang naa bia sili bia bebién naa, ye mindzukh bia tubane mio mia lere naa, bi dzimleyang ayebe Jehôva ? É ne bo éban naa bi simane besôsôe bebo-bisèñ Jehôva baa be nga tubane fe mindzukh mi mbe bo ayèñ a zômô. N’tamane yen éfônane ntôô Pablo. Yésu émién a nga top ñe naa a ke bebela « meyong aval ane ébe bekéza ya boan be ye Israel » (Bisè mintôl 9:15). Abaalé môra ayem ! Vedaa, Pablo a nga tuban abuiñ mindzukh (2 Becor. 11:23-27). Ye mindzukh mité mi nga lere naa a kuè Pablo a dzimleyang ayebe Jehôva ? Kaa dzôm ! Zelan, édzip dèñ é nga lere naa a mbe a bele éborane Jehôva (Bero. 5:3-5). Éndagha, simghane étéñ duè. Waa, wa zômô fe ya sôsôe, amben wa tubane mindzukh. Ya dzam té, waa, ô ne fe tobe ndzi-n’nem naa ô bele ayebe Jehôva.

12. Aval avé é ne bia dzip mevakh éyong bi va yi dzam ve, é kaa dzalban ?

¹² N’wuwup nomo 2 : É mam bia kômô me ne kaa dzalban (Mink. 13:12). Édzing ya akiba bia ve Jehôva, ma ve naa bi bele minsonghan ébe ésèñ bia bo ñe. Vedaa, nge minsonghane bi bele miaa vaghane ki ya étéñ bi tele, dzam té é ne likh naa bi wôran atekh (Mink. 17:22). Mpwaghe-mefan ézing a too éyôla naa Holly, a dzô naa : « Me nga kômô ke é sikôlô Bekare fuèñ be ye Édjié, a ke sèñ si éfe, nge ki a ke sèñ bisèñ melong bi ya Ramapo. Ve, bitéñ biam bi nga tsen, ya dzam té, méé mbe ki fe dzale minsonghane miam. É nga bira me sulu. É ne ôlun, éyong wa kômô bo mam, ve, wéé se ki ma bo. » Abuiñ bôr daa, da wôrane fe ane éñe.

13. Nge bitéñ biè bia sim abim bi ne bo, za minsonghane mia yiène, bi ne bele ?

¹³ Dzé é ne bia vole naa bi bera bele mevakh maa ? Simeghane naa Jehôva aa dzaa ki bia a lôr abim bi ne bo. Jehôva a yen naa bi ne éban amben biaa bo ki abim é bôr bevoo ba bo. Jehôva a kômô naa bi yem meniè maa, ye naa bi bo besôsôe (Michée 6:8 ; 1 Becor. 4:2). É dzam a dang bis, a ne aval bi ne n’nem été, a dang é mam bia bo. Ye da yiène naa bi dang sili bia bebién a lôr abim Jehôva a sili biac ? kaa dzôm ! Ya dzam té, nge bitéñ biè, bia sim abim bi ne bo ébe ésèñ daa akal Jehôva, bia yiène dzeng naa bi banebe ébe é dzam bi ne dzale. Ye ô ne bo é môr a vole bitong, nge ki éñi a wônô beñabôrô ? Ye ô ne ñong nsonghane naa wa bo wé ve môr mengu’u wé belane nkoo bisusuakh, nge ki wé tsili ñe mensaje nge ki message ? Jehôva a ye borane wa ya mevakh nté wa ve mengu’u naa ô dzale é mbemba minsonghane mia yiène mité ! Simeghane fe naa, nféféñ éning, wa ye bele abuiñ meval ô ne sèhane mo Jehôva aval wéé se mane siman ! Holly, éñi bi va tare tu ô mvus a nga man é dzô naa : « Ma wôran, ma simane fe mamién naa, “Mbèmbèè wa zu ma.” Ya avole Jehôva, me ne dzale minsonghane miam mizing nféféñ éning. »

14. Za dzam éfe é ne bia wup mevakh ?

¹⁴ N’wuwup nomo 3 : Nge a ne naa bia wôrane naa bia yiène bele mono nge mam mefe, nfa ye naa bi tobe mevakh. A nden, bi ne yen é bôr ba fônane naa be ne mevakh amu ba buane mbemba be-mam éyong ésese. Ya dzam té, bi ne sum naa bia tem naa nge bia bi bo fe é mam bia dzing, a kus é biôm bia kômô, a ke bikena abuiñ mevôm, bia ye bele ña mevakh. Déé se ki abé naa bi bo é mam bia buane mo. Jehôva a kômo naa bi buan é mbemba be-mam a nga vele akal daa. Vedaa, abuiñ bôr be nga dzeng naa be dzale minkômane mieba, éyong té be nga ñu tang ôsu naa, mam meté méé dzi ki ba ve mevakh. Eva, mpwaghe-mefan ézing, a dzô naa : « Éyong éning duè da kinghlane naa wa kômô dzale minkômane muè éyong ésese, waa ye ki vaghle dzèñ môs ézing ».A wôrane naa wa yiène bele abuiñ mono nfa ye naa ô tobe mevakh é ne likh naa ô wôran éwiñ nge ki naa, ô vane sulu.

15. Za ayeghle bia ñong ébe kéza Salomón ?

¹⁵ Kéza Salomón a nga vakh abuiñ mam naa a tobe mevakh. Éfônan, a nga kiakh abuiñ meval bidzi, a nga wokh abuiñ mbemba mezik, a nga kus é biôm bi mbe mbeng, bi too fe nku-abé. Ve, mam meté, méé dzi ki likh naa a tobe mevakh. A nga dzô naa : « Dzis, daa dzèñ ki naa da yen ; melo maa, maa dzèñ ki naa ma wokh » (Eccl. 1:8 ; 2:1-11). Bôr bézing ba tem naa nge be bele abuiñ mono, be ne bo é dzam ése ba kômô, ye naa ba ye bele mevakh. Ve, dzam té déé se ki bebela. Mam meté méé se ki bia vaghle ve ña mevakh.

16. Za aval a vole é bôr bevoo da vole bia naa bi bera bele mevakh ? (A daghe fe bivaghle).

¹⁶ Dzé é ne bia vole naa bi bera bele mevakh ? Yésu a nga yeghle naa : « A ve da dang so mevakh a lôr éyong bia ñong » (Bisè mintôl 20:35). Mvene ézing a too éyôla naa Alekos a dzô naa : « Ma banebe ébe é boan be-mam me ne bo akal é bôr bevoo. Nté se ma ve, maa dang ki bembe ébe mamién, ye naa ma wôrane mevakh. » Za dzam ô ne bo akal é bôr bevoo ? Nge wa yen naa môr ézing a dzukh ya dzam ézing, dzenghe naa ô ve ñe mengu’u. É ne bo naa, waa ye ki ve naa ndzukh wèñ ô man, ve ô ne ñe fong, wé bèè ñe wé tebe étéñ dèñ, wé lere fe ñe n’nem éngôngoo, ye simane fe ñe naa a kee Jehôva mimbagha mièñ (Bya 55:22 ; 68:19). Ô ne fe ñe vole naa a ve akiba amu naa, Jehôva éé dzi ki ñe lame (Bya 37:28 ; Esaïe 59:1). Ô ne fe bera bo dzam afe akal dèñ, ane a kus ñe bidzi, nge ki a bane ñe naa mi ke mia wulu. Ô ne ñe bane naa, mi ke minkanghle, dzam té é ne ñe ve ngu’u. Lighe naa ô bo é dzôm Jehôva a belane do. Éyong bia belan é tam dzaa naa bi vole é bôr bevoo, bia ye bele ña mevakh ! (Mink. 11:25).

17. Aval avé mevakh me bele élat ya Jehôva ? (Bya 43:4).

¹⁷ Bi ne bele ña mevakh nge bi tsini naa bia yir Ésaa waa a ne a dzôp été bébéñ. Biblia a ban bia naa, Jehôva éñe a ne é « môra mevakh » maa (a lang Bya 43:4). Ya dzam té, kaa bis é dzam bia tubane do éning daa, bi ne wôrane naa, bi ne nkaman. N’tsinighane naa bia banebe ébe Jehôva éñi a ne Tsîn ye mevakh maa ! (Bya 144:15).