Minféféñ mi-bobedzang bebèñ mi ye a Tsîn Ékôan
É NGOAN awôm é too alu 5 ye mbu 2024, be nga kare môra fuèñ Ésulan ye mbu : Be nga nomane bobedzang Jody Jedele ya Jacob Rumph ane minféféñ mi bobedzang mi ye a Tsîn Ékôan Bengaa Jehôva. Bobedzang bebèñ beté be sèhaneyang Jehôva ya sôsôe ébe abuiñ mimbu.
Jody Jedele ya ngal, Damaris
Moadzang Jedele a nga byale a Missouri, EE.UU. A nga vem a bebela été. É mvong dzèñ é mbe é too é vôm Bengaa Jehôva be mbe avitsang. Ya dzam té, a nga yem abuiñ bobedzang be ye abuiñ mesi be nga bo bé zu fep vôm té, naa ba zu vole kanghle mbemba fuèñ. Édzing deba ya é sôsôe wôba be nga bira ñe name. A nga duban a too étong, é Ngoan awôm é too alu 15, ye mbu 1983. A mbe é bira dzing ésèñ minkanghle, éde niène a nga mane besikôlô, ane a nga sum naa a sèñ ane mpwaghe-mefan é Ngoan ébuu ye mbu 1989.
É tam moadzang Jedele a mbe étong, bebyèñ bèñ be mbe bé ke éñe ya kal dzèñ naa be ke fep Betel. Minfeban mité mi nga ve bong beté naa be bele nsonghane ye a kômô ke sèñ a Betel. Bese bebèñ be nga dzale fe nsonghane té. Moadzang Jedele a nga siène a Betel ya wallkill é Ngoan ébuu ye mbu 1990. A nga tare sèñ nfa é Departamento a tsiè adzô nfuban, ôsu vaa éde be nga lôm ñe éñi ba tsiè mam mebiang.
Tam té, bébéñ vaa, bikôan bi nga kobe paña bi nga bira vem, bi mbe fe bi yi befam. Éde moadzang Jedele a nga ñii évoo ye été ye sum naa a yeghe paña. Avitsang tam ôsu vaa, ane a nga yem Damaris, é kal dzaa é mbe mpwaghe-mefan, ba ñe be mbe Circuito mboo. Avitsang tam ôsu vaa, be nga lughan, ane Damaris a nga ke kuane ñe a Betel.
Mbu 2005, be nga likh Betel naa ba ke kale bebyèñ beba be nga sèhane Jehôva ya sôsôe. Ébe tam té, be mbe bé sèñ ane bepwaghe-mefan. Moadzang Jedele a nga vole ane n’yeghle ya sikôlô bepwaghe-mefan, a nga sèñ fe a Comité de enlace con los hospitales nge ki Comité de liaison hospitalier é vôm be mbe, ye sèñ fe ébe bisèñ melong me ye Ékôan.
Mbu 2013, be nga bera bane moadzang ya kal dzaa Jedele, a Betel naa be ke vole ésèñ melong ye a Warwick. Atéé ye éyong té, be nga sèñ a Patterson ya fe a Wallkill. Moadzang Jedele a nga sèñ a Departamento Local de Diseño y Construcción nge ki Départament pour le service local développement/construction, ya fe Servicios de Información sobre Hospitales nge ki Service d’information hospitalier.É Ngoan lal ye mbu 2023, be nga nomane ñe mbu-fekh akal ésèñ Minkanghle. Éyong a simane meyem mese a beleyang, a dzô naa : « Éyong ba kee wa minféféñ meyem, biyong bizing ô ne bele meyep a n’nem. Ve, tam té éde wa yiène simane naa ô ve mebun muè ébe Jehôva amu naa éñe a likh naa bi tobe nkoghane naa bi dzale é dzam a kômô naa bi bo. »
Jacob Rumph ya ngal, Inga
Moadzang Rumph a nga byale a California, EE.UU. Éyong a mbe mong, ñiè a nga mane vuèbe a nsisim été, ve a nga ve mengu’u naa a yeghle ñe bebebela be ya Biblia. Ya fe naa, mimbu misese a nga bo é ke fep ñiè ésaa wèñ, éñi a mbe sôsôe ngoan Bengaa. É mvam dzèñ té, éde é a nga vole ñe naa a vee nkômane wèñ akal bebela. Éde éyong a mbe a bele mimbu 13 a nga dzaa naa a kômô bo ayeghle ya Biblia. É Ngoan ébuu é too alu 27 ye mbu 1992, éñe a nga duban. Asughlan, ñiè a nga bera biñ ngu’u, ya naa é mvong dzèñ ngum, é nga sum naa da vem nsisim été, ya duban.
Éyong a mbe étong, moadzang Rumph a nga yen naa bepwaghe-mefan be mbe édedaa mevakh. Éde niène a nga mane besikôlô, a nga sum naa sèñ ane mpwaghe-mefan mbu 1995. Mbu 2000, a nga ke tobe a Ecuador naa a ke sèñ é vôm be mbe bé yi avole. Ô wéñ éñe a nga yem Inga, mpwaghe-mefan ya Canadá. Éde ya tam, ba ñe be nga lughan. Be nga sum éning deba ane minlughan é moan kisôan ézing ya Ecuador édi é mbe é bele moan angôs bekare fuèñ. Ému a ntoo môra ékôan é ne ngu’u.
Ya tam, moadzang ya kal dzaa Rumph be nga nomane bo ane bepwaghe-mefan ngura aval. Ôsu vaa, ane be nga sum naa ba daghe bikôan. Mbu 2011, be nga bane bo abaa sikôlô 132 ya Galaad. Niène be nga mane sikôlô, be nga sèñ abuiñ mevôm me ya si, be nga buane fe ya abuiñ meval meyem, ane a sèñ a Betel, a sèñ ane minlôman, ya sèñ fe ane bedeghe bikôan. Moadzang Rumph a va bele fe maa naa a bo n’yeghle é sikôlô bekare fuèñ be ye Édjié.
Akal môra ôkoan COVID-19, moadzang ya kal dzaa Rumph be nga dughan Estados Unidos. Be nga bane bo a Betel a Wallkill, é vôm be nga kômane moadzang Rumph a Departamento a tsiè adzô minkanghle. Ya tam, be nga bera be lôm Ntem Ékôan ya Ecuador. Ô wéñ, moadzang Rumph a nga sèñ ane mvole ya Ntem Ékôan. Mbu 2023, be nga lôm bo a Warwick. É Ngoan ôsua ye mbu 2024, be nga top moadzang Rumph naa a ke sèñ mbu-fekh akal ésèñ minkanghle. Éyong a binan ébe mevôm a ve ke a sèñ, a dzô naa : « É dzôm da likh naa ésèñ é bo mbeng aa se ki é vôm wa sèñ, ve a ne é bôr mina be-bo mia sèñ ».
Bia bira dzing é môra ésèñ bobedzang bebèñ beté ba bo, ya fe naa bia « tsini naa [bia] bira ve aval bôr té ngang » (Beph. 2:29).