AYEGHLE 14

A kulu mesiman wa kômô tele ôsu

Behébreu 8:1

AKIGHE BES : Voleghe bebèè naa be tugha wokh ntun wiè, ye lere be ane ôsiman wa tele ôsu ô lare y’é dzam ô bele a nlem, ye nlô-adzô wiè.

Baghle ngura dzam a nlem. Tareghe deghe nge ntun wiè ô bele naa wa ve ve mefuéñ, naa bôr be yebe nféféñ ayeghle, nge ki naa be kômô bo é dzam wa dzô, é ne wa yiane bane vale. Boghe naa mesiman mese wa ye belane me me dzale é dzam é ne wô a nlem.

Silighe wamyéñ naa : « Minsili mivé nge ki bisôô bivé me ne tobane mie mia deghe adzô ma kômô tiê ? Minsili mivé nge ki bisôô bivé ba ye tare sili, mivé ki ba ye sughlane sili ? » Éde wa ye takh mesiman mwiè aval té e bo naa bebèè be yem béé, be yem wokh ye yebe ayeghle wa ve be.
Fitghe nlô-adzô ye ntun wiè. Nté ésese wa bo ntun, a baalé nlô-adzô nge ki bifia bi lare ye wô.
A kulu éndendang mesiman me ne éban ye ve naa me bo ébubu. Topghe foghe ve mesiman me lare ye nlô-adzô, éma ô ne tiê ye abim tam ô bele. Ô ta’a mane tiê mam mese, kulughe mesiman mesese me ne éban éndendang, éyong wa mane ngura ôsiman, tareghe sim keghe naa ô sum édi avokh, ô yem fe nyinghle ôsiman wa zu a nvus.

Ô ne tu mesiman wa ye belane me éyong wa nyinghle ntun wiè, naa ô vole bebèè a béé wa, nté ésese wa ye tebe ntun, nge ki a baalé me éyong wa mane ntun naa be simane me.