AYEGHLE 17

Yésu a mbe za aval môt ?

Mebakh akal nkulane

Éyong bia yeghe é mam Yésu a nga dzô ye bo é tam a mbe a si va, bia yen mefulu ma ve naa bi yir ñe ya Ésaa wèñ Jehôva bebéñ. Za aval mefulu m’ézing a mbe a bele ? Aval avé bi ne vu Yésu éning dèè ?

1. Aval avé Yésu a fônan Ésaa ?

Éyong a mbe a dzôp, Yésu a nga tugha daghe aval Ésaa wèñ a ne édzing a nga ke a bo mam, a ne a nga yeghe fe abuiñ mam ébe ñe tang baakuru mimbu. Dzam té éde é nga ve naa a simane, a wôran ya bo mam ane éñe. (A lang Jean 5:19.) Éde é ne naa, amu Yésu a tugha vu mefulu Ésaa, éde a mbe dzô naa : « É môt a yen-hang ma a yen-hang fe Tare. » (Jean 14:9) Nté sese wa ye ke wa yeghe aval môt Yésu a ne, aval té fe wa ye tugha yem Jehôva. Éfônan, aval Yésu a mbe é yen bôt éngôngol, dzam té da lere wa é dzam Jehôva a wôrane nfa wiè.

2. Aval avé Yésu a nga lere naa a dzing Jehôva ?

Yésu a nga dzô naa : « Naa émo é yem naa ma dzing Tare, ma bo é dzam Ésaa wom a dzô naa me bo. » (Jean 14:31) Éyong a mbe a si va, Yésu a nga lere naa a dzing Ésaa, a mbe é bo ñe mewokh amben éyong é mbe ñe nzukh naa a bo de. Yésu a nga dzing a kobe é mam Ésaa ya vole é bôt bevoo naa be bele élat ya Ñe.—Jean 14:23.

3. Aval avé Yésu a nga lere naa a dzing boan be-bôt ?

Bible a dzô naa n’nem Yésu ô mbe « ô tsii ébe boan be-bôt. » (Minkana 8:31, atoan é ne asi) Édzing dèñ é mbe dé ve naa a sukh é bôt bevoo asi ya vole bo, kaa yane naa be ve ñe dzôm ézing. Mekengha a nga bo me mbe mé lere naa éé mbe ki fave ngu’u, a mbe fe é yen é bôt bevoo éngôngol. (Marc 1:40-42) A nga belane bôt ya mbemba n’nem kaa ôbangam. Bifiè bièñ bi mbe bi fôle n’nem é bôt be mbe bé kômô ñe bèè ya n’nem ôse, a nga ve fe bo ôyan. Yésu a nga yebe naa a dzukh ya wu amu naa a mbe é dzing boan be-bôt. Ve, a nga dang dzing é bôt be mbe bé bèè meyeghle mèñ.—A lang Jean 15:13, 14.

A TUGHA FAS

Yeghe abuiñ mefulu nfa Yésu, ya yen aval bi ne lere édzing ya añep aval a nga bo do.

4. Yésu a dzing Ésaa

Éfônan Yésu da lere bia aval bi ne lere édzing dèè akal Nzame. A lang Luc 6:12 ya Jean 15:10 ; 17:26. Niène mia man lang bifus bi, éyong té mia lèè minlang mia daghe nsili wa zu wi :

Nge bia kômô vu Yésu, aval avé bi ne lere naa bia dzing Jehôva ?

Yésu a yeghlan. — Yésu a nga dzing Ésaa wèñ a ne a dzôp été, a nga kobe fe ya ñe éyong ésese meyaghlan été

5. É dzam Yésu a wôran akal boan be-bôt

Yésu a nga tele mekômgha é bôt bevoo ôsu ndaane émièn. Amben éyong a mbe mvoaran a mbe é ve é tam dzèñ ya é ngu’u dzèñ naa a vole bôt. A lang Marc 6:30-44, éyong té mia lèè minlang mia daghe minsili mia zu mi :

Nlang wi été, aval avé Yésu a lere naa a bis é bôt bevoo ?—Daghe bifus 31, 34, 41, ya 42.
Dzé é nga tsini Yésu naa a vole é bôt bevoo ? —Daghe éfus 34.
Akal Yésu a vu mefulu Jehôva, za dzam mefulu mèñ ma yeghle wa ébe Jehôva ?
Meval mevé bi ne lere naa bia vu Yésu nfa ya bis é bôt bevoo ?

Yésu a ve bizukh bi-bôt bidzi ye bo akengha ye belane minfem tan ye kôas ébèñ. Beyeghe ba kap bidzi bité befam, binenga ya bôan.

6. Yésu a ne añep

Yésu éé mbe ki a bele abuiñ biôm ô mo ve a mbe añep, éde a tsini fe bia naa bi bele fulu añep. A lang Bisè mintôl 20:35, éyong té mia lèè minlang mia daghe nsili wa zu wi :

Aval Yésu a dzô de, dzé é ne ve naa bi tobe mevakh ?

Daghane ÉNGENGENG, éyong té mia lèè minlang mia daghe nsili wa zu wi :

ÉNGENGENG : « Il y a plus de bonheur à donner » nge ki « Hay más felicidad en dar que en recibir »—Abong (4:00)

Amben bii bele ki abuiñ biôm ô mo, meval mevé bi ne ve é bôt bevoo ?

Ye ô va yem de ?

Bible a yeghle naa bia yiène yeghlane Jehôva ngalane éyôla Yésu. (A lang Jean 16:23, 24.) Éyong bia yeghlane aval té, bia lere naa bia yem é dzam Yésu a nga bo, naa a vole bia naa bi bo mengom Jehôva.

NGE MÔR ÉZING A DZÔ WÔ NAA : « Nzame aa bis ki minzukh bia tubane mio. »

Amu Yésu a vu mefulu Ésaa, aval avé mimboane myèñ mia lere naa Jehôva a bis bia ?

AKIGHE BES

Yésu a dzing Jehôva, a dzing fe boan be-bôt. Amu Yésu a ne ane Ésaa, nté sese wa ye bira ke wa yeghe a yem Yésu, aval té fe wa ye bira ke wa yem Jehôva.