Niène Adam ba Ève be nga kôrô afup Éden, ane be nga bele abuiñ boan. Ntôô moan fam wôba, Caín, a nga bo mbéñ bidzi, ye naa é ndôma bèè deba Abel, ñe a nga bo mbaghle mintôma.

Môs ézing, Caín ba Abel be nga ve Jehôva bivevee. Ye wa yem é dzôm é ne évevee ? A ne ngura aval das ba ve Nzame. Jehôva a nga bira dzing évevee Abel, ve, éé dzi ki dzing édi Caín. Dzam té é nga ve naa Caín a wokh édedèè ôlun. Jehôva a nga bame Caín naa, ôlun a mbe é wokh ô mbe ve naa, a bo é dzam é ne abé. Vedèè, Caín éé dzi ki ñe bèè.

Ndaane de, Caín a nga dzô Abel naa : “Za ye ma afup.” Nté be mbe étam afup, ane Caín a nga bime moanñang ye wiñ ñe. Za dzam Jehôva a nga ye bo ? Jehôva a nga ve Caín akira naa a ke ôyap ya é nda-bôr dzèñ. Ye naa, Caín éé nga ye ki vaghle bera bulan é nda-bôr dzèñ été môs ézing.

Za ayeghle bi ne ñong été ? Bi ne sum wokh ôlun nge mam maa bobane ki aval bia tem naa ma yiène boban. Nge bi yen naa ôlun bia wôran n’nem été wa vem, nge ki naa é bôr bevoo ba bame bia amu ba yen naa bia wokh ôlun, bia yiène dzigha songhane bia bebién, ye djié é mam bia wôran, nfa ye naa, awôrane dèè éde é za bia djié.

Amu naa Abel a nga dzing ñe ye bo é mam me mbe sôsôe, éde Jehôva aa ye ki ñe vuène tam ézing. Nzame a ye ve naa, Abel a bera ning éyong a ye ve naa si ése ngura é bo paraíso.

Ya tam, bôr be nga bo abuiñ a si. Abuiñ ye ébe be, be mbe mbia be-bôr. Amben bangele bézing a dzôp été, baa be nga sum fe bo abé. Be nga likh étobgha deba a dzôp été, naa ba zu a si. Ye wa yem amu dzé be nga bo de ? Be nga bo de nfa ye naa be ñong meñuu boan be-bôr, ye sum lukh binenga.

Bangele beté be nga byèñ boan ye binenga beté. É boan be nga byèn ye be, be nga vem ye bo édedèè ngu’u ye nget. Be mbe bé bo é bôr bevoo é mam me ne abé. Jehôva éé mbe ki likh naa, mam meté me tsini naa ma boban. Éde a nga kikh naa, a ye mane wiñ mbimbia be-bôr ye Ndôn mendzim, da yili naa é môra mveng é nga mane dzale si ésese ngura.

Ve, môr mboo été, a mbe é selane ye é bôr bevoo. Môr té a mbe é dzing Jehôva. A mbe éyôla naa Noé. A mbe a bele minenga ye bendôma belal, Sem, Cam, ye Jafet, ye naa, kada môr ye été, a mbe a bele é minenga wèñ. Jehôva a nga dzô Noé naa, a long mura arca nge ki arche, nfa ye naa, éñe, ye é nda bôr dzèñ be tobe nkôran éyong Ndôn mendzim da ye so. Arca a ne môra nkôm éwala, é ne yeng mendzim ayô. Jehôva a nga dzô fe Noé naa, a mane ñinghle a arca té été, abuiñ betsit naa, baa fe, be ning éyong Ndôn mendzim da ye bo.

Avôô-avôô, ane Noé a nga sum long arca. É nga ñong Noé ye é mvong bôr dzèñ, bébéñ mimbu 50 naa be mane ñe long. Be nga long arca fave ane Jehôva a nga dzô be naa be bo de. Nté té, Noé a nga bame bôr naa Ndôn mendzim da ye bo. Ve, môr ézing éé dzi ki ñe bèè.

Asughlan, ane é tam be nga yiène ñii a arca été é nga kuiñ. N’yeneghan é dzam é nga boban ôsu vèè.