Lot a mbe é ning ya Abraham, ñang-ndôm wèñ, é si Canaan. Nté té, Abraham ba Lot be nga bele abuiñ biyem aval é nga ve naa, béé mbe ki fe be bele afôô akal besese. Abraham a nga dzô Lot naa : “Bii se ki fe ning nsama vôm mboo. Éngôngoo, topghe nfa wa kômô ke, éyong té ma, ma ye ke nfa ôvoo.” Ke dzam té é nga lere naa Abraham éé mbe ki é simane fave émièn, nga ?

Lot a nga yen mbemba éfus-si bébéñ kisoan ézing be nga luè naa Sodoma. Éfus-si té é mbe é bele abuiñ mendzim ye biloa. Éde a nga top éfus-si té ye ke wéñ ye é nda-bôr dzèñ.

Bôr be ya Sodoma ye éba be ya Gomorra, é kisoan é mbe ñe bébéñ be mbe mbia be-bôr. Bebela a ne naa, be mbe édedaa mbia be-bôr aval é nga ve naa, Jehôva a kikh naa a mane tsam bekisoan beté. Ve, Nzame a nga kômô kôre Lot ye é nda-bôr dzèñ, éde a nga lôm bangele bebèñ naa be ke ñe dzô naa : “Avôô ! Kôrôghane é kisoan ñi ! Jehôva a nga zuang de tsam.”

Lot éé dzi ki kôrô étéñ té ébién. A nga tsini naa a bo nking. Ane bangele be nga biñ Lot, ngal ya bengoan bebèñ beba binam, ye kulu be a kisoan atan, bé dzô be naa : “Mareghane mbii ! Kôreghane bining bienan, mi taa ki daghe a mvus. Nge mi bo de, mia ye wu !”

Éyong be nga kuiñ é kisoan be mbe bé luè naa Zoar, Jehôva a nga ve naa nduan ye azufre nge ki sufre be nong a Sodoma ye Gomorra. Bekisoan bebèñ beté be nga mane tobe ntsaman. Éyong é minenga Lot a nga bo Jehôva melo ye daghe a mvus, ane a nga venghane nkum nku ! Ve, Lot ya bengoan bèñ be nga tobe nkôran amu be nga bo Jehôva mewokh. Be nga yiène tobe édedèè éwiñ amu naa, é minenga Lot a nga bo melo. Ve, be mbe mevakh naa be nga bèè melepgha Jehôva a nga ve bo.

Abraham a nga yeghle ndôma dzèñ Isaac naa, a dzing Jehôva ye ve mebun mèñ ébe mengiagh mese Jehôva. Ve, éyong Isaac a mbe a bele bébéñ mimbun 25, Jehôva a nga sili Abraham naa a bo é dzôm ézing é nga ye bo édedèè ndzukh. A mbe za dzam ?

Nzame a nga dzô Abraham naa : “Éngôngoo, ñonghe akikh moan duè ye ve me ñe ane atunegha nkôô ézing ô ne si Moria.” Abraham éé mbe ki é yem amu dzé Jehôva a nga sili ñe naa a bo de. Ve, a nga bo Jehôva mewokh.

Ékuna kikiri é môs ô nga berane vèè, Abraham a nga ñong Isaac ye bebo-bisèñ bebèñ ye ke nfa Moria. Niène be nga wule tang môs melal, ane be nga sum yen minkôô ôyap. Abraham a nga dzô bebo-bisèñ bèñ naa, be yane nté éñe ya Isaac ba ke ve atunegha. Abraham a nga kee Isaac ndzaa naa a baghe de, éñe ki a nga toa ôkeng. Isaac a nga sili ésaa naa : “É tsit bia ye ke ve atunegha é ne vé ?” Abraham a nga yalane naa : “A ndôma dzam, Jehôva a ye bia de ve.”

Éyong be nga kuiñ nkôô, ane be nga mane long altar nge ki autel. Ane Abraham a nga tsini Isaac mo ye mebo ye bui ñe altar ayô.

Abraham a nga toa ôkeng. Ane é angele Jehôva a nga luè ñe a dzôp été é dzô naa : “Abraham ! Ô taa bo moan mbia dzam ! Éndagha, me nga yemang naa ô bele mebun ébe Nzame, amu naa ô mbaa nkoghane naa wa ve ndôma duè ane atunegha.” Ane Abraham a nga yen n’nôm ntôma ô yeme ye minlakh é boan bilé été. Éde a nga dzigha tsii Isaac ye ve n’nôm ntôma té ane atunegha évang ndôma dzèñ.

Atéé ye môs té, éde Jehôva a nga sum luè Abraham naa mvuiñ dzèñ. Ye wa yem amu dzé ? Abraham a nga bo é mam mesese Jehôva a nga dzô ñe naa a bo, amben éyong éé mbe ki é wokh amu dzé Jehôva a nga sili ñe naa a bo de.

Jehôva a nga baalé Abraham é ngiagh dèñ naa : “Ma ye borane wa, ye naa, ma ye ve naa é boan buè, nge ki é mvong duè é fuiñ.” Dzam té é nga yili naa, Jehôva a nga ye borane mbemba be-bôr besese ngalan é nda-bôr Abraham.