Isaac a mbe a bele mimbu 40, éyong a nga lukh Rebeca. A mbe é bira ñe dzing. Ye tam, be nga byèñ boan befam bebèñ, mimbias.

Ntôô ô mbe éyôla naa Esaú, éberan ñe ki a mbe éyôla naa Jacob. Esaú a mbe é dzing a tobe a nseng, ye naa, a mbe môra mbo-nsôm. Ve, Jacob ñe a mbe é dzing a tobe a nda.

Metam meté, éyong ésaa boan a mbe é wu, ntôô éwô ô mbe wé ñong é ngap da dang abuiñ nfa mesi ye mono. Mboane té éwô be mbe bé luè naa, élikh. Nfa é nda-bôr Isaac, élikh é mbe fe dé tsinane mengiagh Jehôva a nga bo Abrahán. Esaú éé mbe ki é bis mengiagh meté, ve, Jacob ñe a mbe é yem naa me mbe édedèè éban.

Môs ézing, Esaú a nga ñii a nda a too édedèè mvoaran, amu a nga bo nsôm ngura nté môs. A nga wokh mbemba énum bidzi Jacob a mbe é yam, éde a nga dzô ñe naa : “Me nga wuang zèñ ! Seng ma abim évele n’nam wa yam alé !” Ane Jacob a nga yalane ñe naa : “Ôwé ma ye wô de ve. Vedaa, tareghe me kiagh naa, wa ye me kee élikh duè.” Éde Esaú a nga dzô ñe naa : “Maa bis ki élikh dam. Ô ne de ñong. Ma kômô fave a dzi.” Ye wa tem naa, é dzam Esaú a nga bo alé, é mbe faa mboane ô ne fakh ? Momo, wéé mbe ki fakh. Esaú a nga tep é dzôm é ne tang nden, étom éfela bidzi.

Éyong Isaac a nga bo édedèè n’nôm, éde tam é nga kuiñ naa a borane ntôô moan wèñ. Ve, Rebeca a nga vole Jacob, éñi a mbe éberane naa éñe a ñong éborane té. Éyong a nga yem dzam té, Esaú a nga wokh édedèè abé, éde a nga kômane naa a ye wiñ mbias wèñ. Amu Isaac ye Rebeca, be nga kômô kamane Jacob, éde be nga dzô ñe naa : “Keng, ye ke tobe ébe ñang-ndôm wiè, Labán, ya ke kuiñ ôlun Esaú wa lôt.” Jacob a nga bèè melepgha bebyèñ bèñ be nga ve ñe. Éde a nga tup naa a kôre éning dèñ.

Jehôva a nga kiagh Jacob naa, a ye kame ñe aval fe a nga bo de ye Abrahán ba Isaac. Jacob a nga ke tobe é si ba luè naa Harán, e wéñ, a nga lughan, a byèñ abuiñ boan, ya bele édedaa abuiñ akum.

Ya tam, ane Jehôva a nga dzô Jacob naa : « Buleghan é si duè. » Éde Jacob ya é nda-bôr dzèñ be nga sum môra ékena té naa, ba bulan é si deba. Éde a zen, bebo-bisèñ bèñ bézing be nga zu ñe dzô naa : “Moanñong Esaú a zu tubane wa ye befam 400 nsama wèñ été !” Jacob a mbe é ko wong naa, Esaú a nga kômô bo éñe ya é nda-bôr dzèñ abé. Éde a nga yaghlane Jehôva é dzô ñe naa : “Éngôngoo, kôreghe ma ébe é mo moadzang.” É môs ô nga berane vaa, ane Jacob a nga lôm naa be ke das Esaú abuiñ betsit, a lang été, mintôma, bikela, biñak, bikamelo, ya bidzakas.

Alu té ébién, Jacob a too étam, éde a nga yen angele ! Éde angele a nga sum naa a yiran nge ki a sing ye ñe. Be nga sing ya ke kuiñ melene me kiri. Amben Jacob a nga dzukh, éé dzi ki ñe likh. Éde angele a nga dzô ñe naa : « Lighe ma naa me ke. » Ane Jacob a nga yalane ñe naa : “Momo ! Wéé se ki ke, kaa naa ô borane ma !”

Asughlan, ane angele a nga borane Jacob. Aval té éde Jacob a nga yem naa, Jehôva aa nga ye ki likh naa, Esaú a bo ñe abé.

Kiri té, Jacob a nga yen ane Esaú a mbe é zu ôyap ye befam 400. Jacob a nga ke tebe é nda-bôr dzèñ ôsu, ye sum naa, a kur moanñang mebong asu biyong zangbwa. Esaú a nga ke mbii ébe Jacob ye wubane ñe. Ane bobeñang bebèñ beté be nga sum yi, ye bera ve naa mvoa é bo ézizang deba. Ébe wa, wa tem naa za dzam Jehôva a nga wôran, éyong a nga yen aval Jacob a nga kôm ntsiè té ?

Ôsu vaa, ane Esaú a nga bulan é nda dzèñ, Jacob ñe a tsini ékena dèñ. Jacob a mbe a bele bendôma 12. Be mbe biyôla naa : Rubén, Simeón, Leví, Judá, Dan, Neftalí, Gad, Aser, Isacar, Zabulón, José, ya Benjamín. Ndôma dzaa ye été, José, éde Jehôva a nga top naa a kôre ayong dèñ. Ye wa yem aval avé ? Bia ye de yen meyeghle ma zu.