Môr ézing a mbe é kang Jehôva, a mbe a too é si be mbe bé luè naa Uz. A mbe éyôla naa Job. A mbe a bele édedaa abuiñ akum, ya fe môra nda bôt. A mbe mbemba fulu ye fe naa, a mbe é vole minjijèñ, minkus ye boan-beñu. Ve, ye fave amu naa Job a mbe é bo é mam me mbe sôsôe éde aa nga ye ki vaghle tubane mindzukh môs ézing ?

Job aa mbe ki é yem de, ve, Satan, éñi a ne Debele, a mbe é momo ñe. Jehôva a nga dzô Satan naa : “Ye ô biliyang faa mbo-ésèñ wom Job ? A si ése ngura, môr ézing éé se ki ane éñe. A bèè ma, a bo fe é mam me ne sôsôe.” Éde Satan a nga yalane ñe naa : “É ne faa bebela naa Job a bo wa mewokh. Wa kamane ñe ye borane ñe. Wa ve ñe si ya betsit. Nge ô vaghle ñe vaa biôm bité, aa ye ki fe wô bera kang.” Jehôva a nga yalane ñe naa : “Ô ne bobele Job. Vedaa, waa yiène ki ñe wiñ.” Amu dzé Jehôva a nga likh naa Satan a bobele Job ? A ne amu a mbe a bele ndzi-n’nem naa, Job aa nga ye ki vus ya ñe.

Satan a nga sum naa a bobele Job ya abim bibubua bi-mam bizing. Ôsusua, a nga tare lôm é bôr bézing ba luè naa, Besabeos nge ki Besabéen naa, be ke wup betsit ye bidzakas Job. Éde fe nduan é nga dzighi mintôma Job. Nsama bôr ôfe, Becaldeos nge ki Bechaldéen, be nga wup bikamelo bièñ. Bebo-bisèñ be mbe bé kale betsit beté, baa be nga wiñ fe bo. Ôsu vaa, ane ébubua é nga dang ébi bivoo bisese é nga boban. É boan Job besese be nga mane wu éyong nda é nga ku be ayô, é vôm be mbe bé bo fet. Job a mbe édedaa éwiñ, ve, éé dzi ki sim naa a kang Jehôva.

Satan a mbe é kômô naa, Job a tugha bera dzukh, éde é nga ve naa bura mintsang mi mane ñe kuiñ ñuu ngura. Job a mbe é bira wokh mintéñ. Aa mbe ki é yem amu dzé mam meté mese me mbe mé lôrane ñe. Vedaa, Job a nga tsini naa a kang Jehôva. Nzame a nga yen mam meté mese ye naa, Job a nga bira ñe ve n’nem mbeng.

Éde Satan a nga lôm befam belal naa be ke bobele Job. Be nga dzô ñe naa : “Ô nga yiène bo nsem ye shuale wô. Éde alé Nzame a ve wa akira.” Job a nga yalane be naa : “Méé dzi ki bo é dzam ézing é ne évus.” Ve, éde a nga sum tem naa, Jehôva éñe a nga bo naa a tubane mindzukh mité mise. A nga dzô naa Nzame éé mbe ki sôsôe ya ñe.

Échiè ndôman Elihú a mbe é bèè a mvoa été ane be mbe bé kobe. Éde a nga ñong nkobe ye dzô naa : “É mam mina bese mi va dzô méé se ki bebela. Jehôva a ne édedaa ôyap-yô aval bii se ki wokh. Éé se ki vaghle bo é dzam é ne abé môs ézing. A yen mam mesese ye vole fe bôr éyong be ne mindzukh été.”

Éde Jehôva a nga kobe a Job. A nga dzô ñe naa : “Ô mbe vôm mbé éyong me nga bo dzôp ya si ? Amu dzé wa dzô naa méé se ki sôsôe ? Wa kobe, vedaa, waa yem ki amu dzé mam ma boban.” Job a nga yebe évus dèñ, éde a nga dzô naa : “Me mbe évus été. Me nga wokh ba kobe adzô duè, ve éndagha me nga tugheyang wô yem. Wéé se ki voar a bo dzam ézing. Djuiighe ma akal é mam me nga dzô.”

Éyong mebobelane meté me nga lôt, Jehôva a nga ve naa Job a bera bele akum a lôr abim a mbe a bele melu ô mvus. Job a nga ning ayap ye fe mevakh été. Jehôva a nga borane Job amu naa a mbe ñe mewokh amben éyong déé mbe ki ébubu akal dèñ. Ye wa ye bo ane Job ye tsini naa wa kang Jehôva, a bo é dzam ésese é ne bo ?

Egipto, be nga yem é nda-bôr Jacob ane Bisraelitas. Niène Jacob ye José nge ki Joseph be nga mane wu, nféféñ Faraón ô nga sum djié. A mbe é ko wong naa, Bisraelitas be dang ngu’u a lôr Beegipcios. Ane Faraón a nga venghane Bisraelitas minkôm. A nga yemle be naa be bo beladrillos nge ki bebrique ye sèñ ngu’u mefup été. Ve, nté sese Beegipcios be nga yemle be naa be sèñ ngu’u, nté sese té, éde é nomo Bisraelitas é nga vem. Amu Faraón éé nga dzing ki do, éde a nga dzô naa be wiñ é boan befam besese ba byale ayong Israel été. Ye mi ne simane nté mbé Bisraelitas be mbe bé ko wong ?

Minenga Israelita ézing, a too éyôla naa Jokébed, a mbe a bele mbeng moan fam. Nfa ye naa a kamane ñe, a nga furu ñe ékara été ye shuale ñe bejuncos nge ki beroseau be ye ôshuiñ Nilo nge ki Nil. Miriam, moan té, kal, a nga lighi bébéñ naa a yen é dzam é nga ye boban.

É ngoan Faraón a nga zu woban ôshuiñ, ane a nga yen ékara. A nga kuane moan-moan é yi été, ane a nga yen ñe éngôngoo. Miriam a nga sili ñe naa : “Ye wa kômô naa me ke dzeng é minenga a ne ñe ñiè akal duè ?” Éyong é ngoan Faraón a nga dzô naa ôwé, ane Miriam a nga ke ñong Jokébed, ñia moan. É ngoan Faraón a nga dzô ñe naa : “Ñonghe é moan ñi, ñièghe ñe akal dam ; éde ma ye yaane wa.”

Éyong moan a nga bo ñamôrô, Jokébed a nga ke a ñe ébe é ngoan Faraón, éñi a nga yô ñe naa Moisés, ye yale ñe ane é moan wèñ. Moisés a nga vem ane é moan kéza, ye naa, a mbe bo é dzam ésese a mbe é kômô. Ve, Moisés éé dzi ki vaghle vuène Jehôva. A mbe é yem naa, a mbe moan Israelita, se ki moan Egipcio. Éde a nga top naa a sèhane Jehôva.

Éyong a nga kuiñ mimbu 40, Moisés a nga kikh naa a vole ayong dèñ. Éyong a nga yen moan Egipcio é yit moan nkôm Israelita, Moisés a nga bime Egipcio té aval ngu’u é nga ve naa a wu. Moisés a nga shuale mbim wèñ nseleghe été. Éyong Faraón a nga yem de, a nga dzeng naa a wiñ Moisés. Ve, Moisés a nga tup a si Madián. Jehôva a nga kale ñe wéñ.