Moisés a nga ning a Madián tang mimbu 40. A nga lughan ye byèñ boan. Môs ézing, atoo naa a mbe é baghle mintôma nkiè fam wèñ, bébéñ nkôô Sinaí, a nga yen éyaghane dzam. Moan élé biyo a mbe é yông nduan, ve kaa dzikh ! Éyong Moisés a nga yir naa a zu yen amu dzé, éde a nga wokh king dé so moan élé té, dé dzô naa : “Moisés ! Ô taa yir bébéñ. Vèèghe mengôp muè, amu é si ô tele alé é ne nfufup.” A mbe Jehôva éñe a mbe é kobe ngalan angele.

Moisés a nga ko wong, ane a nga buru asu dèñ. King té é nga dzô naa : “Me va yen mindzukh Bisraelitas. Ma ye be kôre é mo Beegipcios ye ke a bo é si é ne mbeng. Wa, wa ye kulu ayong dam Egipto.” Ye miaa tem naa, dzam té é nga yiène bo Moisés éyaghane nga ?

Moisés a nga sili naa : “Za dzam ma yiène dzô, éyong ayong da ye me sili é môr a va lôm ma ?” Nzame a nga yalane naa : “Dzôghe be naa, Jehôva, é Nzame Abrahán, é Nzame Isaac ye é Nzame Jacob éñe a va lôm wa.” Ane Moisés a nga dzô naa : “Ve, nge be bo kaa me bèè ?” Jehôva a nga kee Moisés mendem me nga ye ñe vole. A nga dzô Moisés naa a wua ntum wèñ ô si. Ane ntum ô nga venghane ñô ! Éyong Moisés a nga biñ ñô étun ngiem, ane é nga bera venghane ntum. Jehôva a nga dzô naa : “Éyong wa ye bo akengha té, da ye ban naa ma me va lôm wa.”

Moisés a nga dzô naa : “Maa yem ki kobe.” Jehôva a nga kiagh ñe naa : “Ma ye wô dzô é dzam wa yiène dzô, ye naa, ma ye lôm Aarón, moanñong, naa a vole wa.” Amu a mbe é yem naa Jehôva a mbe ya ñe, ane Moisés a nga ñong ngal ye bendôma bèñ ye bulan Egipto.

Be nga yemle Bisraelitas naa be sèñ ngu’u ane minkôm. Jehôva a nga lôm Moisés ba Aarón ébe Faraón ya mbana wi : “Lighe naa ayong dam é ke, nfa ye naa, be kang ma éyang été.” Faraón a nga yalane ya éngung naa : “Maa bis ki é dzam Jehôva a dzô, ye naa, maa ye ki likh naa Bisraelitas be ke.” Ane Faraón a nga yemle be naa be tugha bera sèñ ngu’u. Jehôva a nga ye ve Faraón akira. Ye wa yem aval avé ? A nga ve naa, bibubua awôm bi boban Egipto. Jehôva a nga dzô Moisés naa : “Faraón a bèè ki ma. Ôkiri, kikiri, a ye tobe nsakh ôshuiñ ye Nilo nge ki Nil. Keng é vôm a ne ye dzô ñe naa, amu wéé dzi ki likh naa ayong dam é ke, mendzim mesese me ye Nilo ma ye venghane mekî.” Moisés a nga bo mewokh ye ke kuane Faraón. Faraón a nga daghe Aarón é bime Nilo ye ntum wèñ, éde ôshuiñ ô nga venghane mekî. Ôshuiñ ô nga sum num abé, bekoas be nga wu ye naa, a ke kuane naa, mendzim ba ñu méé mbe ki fe. Amben aval té, Faraón a nga tep naa a likh naa Bisraelitas be ke.

Melu zangbwa ôsu vèè, Jehôva a nga bera lôm Moisés ébe Faraón ya mbana wi : “Nge ô bo kaa likh naa ayong dam é ke, Egipto da ye dzèñ ya minkongha.” Aarón a nga bere ntum wéñ ôyô, ane minkongha mi nga sum dzèñ Egipto. Bôr be mbe bé kuane minkongha menda meba été, binong bieba ayôp, ye fe mevôm ba yam bidzi été. Minkongha mi mbe vôm ase ! Faraón a nga sili Moisés naa, a dzaa Jehôva naa a tele ébubua té. Faraón a nga kiagh naa, a ye likh naa Bisraelitas be ke. Ane Jehôva a nga tele ébubua, ye naa, Beegipcios be nga kôane minkongha mi mbe minwuan, mengôs-mengôs. Si é nga sum num abé. Ve, tam té fe, Faraón éé mbe ki é kômô likh naa ayong é ke.

Ane Jehôva a nga dzô Moisés naa : “Aarón a yiène bime si ye ntum wèñ, éde mbulughu wa ye venghane biñôñong.” Étéñ té ébién, biñôñong bi nga mane dzèñ vôm ase. Bôr be ye ayong Faraón, be nga dzô ñe naa : “Ébubua di da so ébe Nzame.” Amben aval té, Faraón éé nga kômô ki likh naa Bisraelitas be ke.