Moisés ba Aarón be nga ke dzô Faraón mbana Nzame wi : “Nge ô bo kaa likh naa ayong dam é ke, ma ye lôm betábanos nge ki betaon é si duè.” Minsama betábanos mi nga mane dzèñ menda Beegipcios, minkukum ye minjijèñ. Si ése é mbe ndzalane ye betábanos. Ve, betábanos béé mbe ki a Gosén, é vôm Bisraelitas be mbe bé tobe. Atéé ye ébubua nii té, bibubua bi mbe bi name fave Beegipcios. Faraón a nga dzaa naa : “Dzaaghe Jehôva naa a vèè minlo mité. Ayong duè é ne ke.” Ve, éyong Jehôva a nga vèè betábanos, Faraón a nga tsen nkighane wèñ. Ye Faraón a nga ye ñong ayeghle été ?

Jehôva a nga dzô naa : “Nge Faraón a bo kaa likh naa ayong dam é ke, betsit Beegipcios ba ye koan ye wu.” É môs ô nga berane vèè, betsit be nga sum wu. Ve, betsit Bisraelitas béé dzi ki wu. Amben aval té, Faraón a nga tsini naa a bo melo, kaa ki kômô likh naa be ke.

Ane Jehôva a nga dzô Moisés naa, a bulan ébe Faraón ye wua asup ayôp. Asup é nga venghane mbulghu ô nga dzèñ vôm asese ye mane berebe meñuu Beegipcios. Mbulghu té ô nga ve Beegipcios ye betsit beba meveng me mbe édedèè mintèñ. Mben aval té, Faraón a nga tep naa, a likh naa Bisraelitas be ke.

Jehôva a nga bera lôm Moisés ébe Faraón ya mbana wi : “Ye ô ngene wa tep naa wa likh naa ayong dam é ke ? Ôkiri, granizo nge ki grêle a ye ku a si.” É môs ô nga beran, Jehôva a nga lôm granizo, nzalang ya nduan. A mbe aval môra ôkôs a ke kuane naa daa be ki tare boban Egipto. Bilé bisese ye mefup me nga mane wu ntup, ve se ki a Gosén. Faraón a nga dzô naa : “Dzaaghe Jehôva naa a tele dzam té ! Éyong té mi ntoo ke.” Ve, niène granizo a nga tebe, éde Faraón a nga tsen nkighane wèñ.

Ane Moisés a nga dzô naa : “Éndagha, bitanda bia ye mane dzi biloa bisese ôkôs granizo ô va likh.” Baakuru nge ki bizukh bitanda bi nga mane dzi é dzôm ésese é mbe mefup ye fe bilé. Faraón a nga dzaa naa : “Dzaaghe Jehôva naa a lôm bitanda bité vôm afe.” Ve, amben éyong Jehôva a nga tele bitanda, Faraón a nga tsini naa a bo nlô-abé.

Jehôva a nga dzô Moisés naa : “Sameghe wo étun dzôp.” Étéñ té ébién, dzôp é nga mane bo édedèè dzibi. Beegipcios béé mbe ki yen dzôm ézing nge ki môr ézing, tang melu melal. Bisraelitas étam ébe be mbe be bele éyèè menda meba été.

Faraón a nga dzô Moisés naa : Wa ye ayong duè mi ne ke. Lighane fave betsit benan e va.” Moisés a nga dzô naa : “Bia yiène ñong betsit bèè naa bi ve be é Nzame wèè.” Faraón a nga bira wokh abé. Ane a nga yônane naa : “Keng ma ôyap ! Nge me bera wô yen, ma ye wô wiñ.”

Moisés a nga kiagh Faraón naa aa ye ki fe dzeng naa a bera ñe yen. Ve, kaa naa a ke, a nga dzô Faraón naa : “Ézizang alu, mintôô misese mi ye Egipto, atéé ye ndôma Faraón, ya ke kuiñ bendôma minkôm, mia ye wu.”

Jehôva a nga dzô Bisraelitas naa be dzi ngura aval bidzi. A nga dzô naa : “Wighane n’nôm ntôma nge ki n’nôm ékela, ô bele mbu mboo, ye ve ôyôm mekî mbéñ wônan. Bereghane wô ô nduan ye dzi wô ya nfem ô ne kaa levadura nge ki levure. Mi baghe bitôp, mengôp mebo ye nkoghane naa mia ke. Alu di, ma ye mina kôre.” Ye mi ne simane nté mbé Bisraelitas be nga yiène tobe mevakh été ?

Ézizang alu, é angele Jehôva a nga ke menda mesese me ye Egipto. Mintôô befam be mbe bé wu, menda mesese méé mbe ki me bele mekî añii ye mimbèñ. Ve, angele a mbe é lôr menda me mbe me bele mekî ayôp. Menda me-bôr me ye Egipto, a bo minkukum nge ki minjijèñ, mesese me nga dzimle moan awu. Ve, é boan Bisraelitas béé dzi ki wu.

Amben é ndôma Faraón émièn a nga wu. Faraón éé mbe ki fe zôme. Avôô-avôô, a nga dzô Moisés ba Aarón naa : “Kenghan. Kôrôghane é vôm wi. Kenghan ye kang é Nzame wônan. Toaghane biyem bienan ye ke !”

Atoo naa ngom-ndan é mbe abôm a dzôp été, Bisraelitas be nga kuiñ Egipto atan, be too ntaane menda me-bôr ye memvokh. Été, befam Bisraelitas 600 000 ye abuiñ binenga ye boan. Ya fe naa, abuiñ bôr befe be nga ke ya bo, naa baa fe be kang Jehôva. Bisraelitas be nga tobe fili !

Nfa ye naa be siman aval Jehôva a nga kôre be, besese be mbe bé dzi ngura aval n’nam ôvoo, kada mbu. Be mbe bé luè n’nam té naa, Pascua nge ki Pâque.