Bisraelitas be nga kôrô nkôô Sinaí ya ke éyang Parán, é vôm be mbe bé luè naa Cadés. Ô wèñ, Jehôva a nga dzô Moisés naa : “Lômghe befam 12, wa top môr mboo ébe kada nda-bôt, naa be ke dong si Canaán, é si ma ye kee Bisraelitas.” Éde Moisés a nga top befam 12, ya dzô be naa : “Ke-han a Canaán, ye daghe nge si é ne mvèñ naa bi ne bèñ bidzi. Daghan nge bôr be ye wéñ be ne ngu’u nge ki atakh, nge be too bibem nge ki bekisoan.” Ane bedong si 12 be nga ke a Canaán, Josué ba Caleb be mbe nsama té.

Niène melu 40 me nga lôt, ane bedong si be nga dughan. Be nga so be higos nge ki befigue, be granadas, ya tom. Bedong si be nga kare fuèñ naa : “Si té é ne mbeng, ve, bôr be ye wéñ be ne ngu’u, ya naa kada kisoan a bele môra ôngôô.” Éde Caleb a nga dzô naa : “Bi ne ñong bekisoan beté. Nkaane wéñ !” Ye mia yem amu dzé Caleb a nga dzô dzam té ? Amu éñe ya Josué be nga tobe mebun ébe Jehôva. Ve, bedong si bevoo be nga dzô naa : “Kaa ! Bôr be ye wéñ be ne édedèè ayap ya ben’nen ! Éyong ba vaghane bia ya bo, bi ne ane bitanda.”

Bisraelitas be nga sili mo ôsi. Be nga sum naa ba kè ye dzôhane mboo ya éñi mboo naa : “N’topghan é môr nfe a ye wulu ya bia ya dughane bia Egipto. Amu dzé bia yiène ke vôm té naa be mane bia wiñ ?” Éde Josué ba Caleb be nga dzô naa : “Mi taa biane Jehôva, mi taa ki ko wong. Jehôva a ye kame bia.” Ve, Bisraelitas béé nga kômô ki bèè dzam ézing. Be nga kômô vane wiñ Josué ya Caleb !

Éde, Jehôva a nga bo dzé ? A nga dzô Moisés naa : “Amben me maneyang bo mbemba be-mam akal Bisraelitas, ve, be ngen ba tsini naa ba biane ma. Éde, ma ye likh naa be tobe éyang été tang mimbu 40, ya ke kuiñ ane ba ye mane wu wéñ. Fave é boan beba, Josué ya Caleb, ébe ba ye ñii é si me nga kiagh bo naa ma ye be kee”.

Niène ôyôm tam ô nga lôt, nté Bisraelitas be mbe be too éyang, Coré, Datán, Abiram, ya bôr 250 befe, be nga ke Moisés é ngam ayat ye dzô ñe naa : “Bi voarang mina ! Amu dzé wa, wa yiène wulu bia, Aarón ñe a too fara n’nen ? Jehôva éé se ki fave ya mina, a ne fe ya bia besese.” Jehôva éé dzi ki dzing é dzam be nga dzô alé. A mbe ane éñe ba ke é ngam ayat !

Éde Moisés a nga dzô Coré ya é bôt be mbe ya ñe naa : “Za-han a tabernáculo ôkiri, ya so bebraserillos nge ki berécipient à feu benan, be too ndzalan ya incienso. Jehôva a ye bia lere é môt émièn a va top.”

Niène kiri é nga lene, Coré ya bôr 250 be nga ke kuane Moisés a tabernáculo. Ô wéñ, be nga dzighi incienso ane be ne befara. Éde Jehôva a nga dzô Moisés ya Aarón naa : “Tebeghan Coré ya befam bèñ ôyap.”

Amben Coré a nga ke yen Moisés a tabernáculo, ve, Datán, Abiram, ya é nda-bôt dzèñ be nga tep naa ba ke. Jehôva a nga dzô Bisraelitas naa be kôrô é vôm bibem Coré, Datán ya Abiram bi mbe. Étéñ té ébièn Bisraelitas be nga kôrô vèè. Datán, Abiram, ya é nda-bôt dzeba be mbe be tele nseng, é vôm bibem bieba bi mbe. Étéñ té ébièn, ane si é nga kuuban ézizang, éde be nga mane ku ébéñ ôsi ! A tabernáculo, é nduan é nga so ébe Jehôva é nga mane dzighi Coré ya bôr 250.

Éde Jehôva a nga dzô Moisés naa : “Ébe kada ayong, ñonghe ntum é môr a ne ntebe ôsu, ye tsili éyôla dèñ ntum ayô. Ve, ntum ayong Leví, wa yiène tsili éyôla Aarón. Wa yiène ñii mintum mité a tabernáculo été, ye naa, ntum é môr ma ye top wa ye fèè mesam.”

Niène kiri é nga lene, ane Moisés a nga mane ñong mintum ya lere mio betebe ôsu. Ntum Aarón ô mbe ô bele mesam, ya balmendras nge ki bamande be nga vèñ. Aval té éde Jehôva a nga lere naa a nga top Aarón ane fara n’nen.