Éyong bedong Bisraelitas be nga ke a kisoan ya Jericó, be nga ke tobe é nda minenga ézing a mbe éyôla naa Rahab. Éyong kéza ya Jericó a nga yem de, ane a nga lôm bizima é nda Rahab. A nga shuale bedong ndzii, ye lep bizima zen éfe. A nga dzô bedong beté naa : “Ma ye mina vole amu ma yem naa Jehôva a ne ya mina, ye naa mia ye ñong kisoan. Éngôngoo, boghane me ngiagh naa, mia ye kôre é nda-bôr dzam.”

Bedong be nga dzô Rahab naa : “Bia kiagh wô naa, mbia dzam aa ye ki biaane môr ézing a ne é nda duè été.” Be nga dzô ñe naa : “Tsinighe évele nkoo é wunu wiè, éyong té wa, ya é nda-bôr duè mina ye tobe nkôran.”

Rahab a nga likh naa bedong be sis é wunu wèñ ngalane nkoo. Be nga ke minkôô été ye sobe tang môs milal kaa naa be dughan ébe Josué. Ane Bisraelitas be nga kighane ôshuiñ Jordan ye kômane naa ba ñong si. Jericó a mbe é kisoan ôsua be nga ñong. Jehôva a nga dzô be naa be kuarane kisoan éyong dèè ébe môs tang môs misaman. É môs zangbwa, be nga kuarane kisoan tang biyong zangbwa. Éde befara be nga long tong, bizima bia bi nga yônan ôyap yôp abim be mbe de bo. Minfin mi ye kisoan mi nga mane sulan ! Ve, é nda Rahab é mbe nlonghan nfa mboo ya nfin ye ôngôô, é nga lighi é tele. Rahab ya é nda-bôr dzèñ be nga tobe nkôran amu be nga ve mebun meba ébe Jehôva.

Fuèñ ye é dzam é nga boban a Jericó é nga mane miaman ébe meyong mevoo me ya Canaán. Bekéza be ye meyong meté be nga mane kôane nfa ye a lumane ya Bisraelitas. Ve, Begabaonitas be mbe be bele n’yenane mam ôfe. Be nga boar bitôp bi mbe mintukh ye n’ñaban, éde be nga ke yen Josué ye dzô ñe naa : “Bia so é si é ne ôyap. Bi va wokh mam nfa Jehôva ye fe é mam mese a nga bo akal denan a Egipto ye fe a Moab. Kiagh bia naa, waa ye ki lumane bia, nfa waa, bia ye bo bebo-bisèñ buè.”

Josué a nga yebe é dzam be nga dzô ñe éde a nga kiagh be naa, aa ye ki lumane be. Melu melal ôsu vaa, éde a nga yem naa, béé mbe ki bôr be ye é si é ne ôyap. Be mbe bôr be ye a Canaán. Ane Josué a nga sili Begabaonitas naa : “Amu dzé mi va dukh bia ?” Éde be nga yalane naa : “Bi mbe bi ko wong ! Bia yem naa Jehôva éñe a luman akal denan. Éngôngoo, mi taa bia wiñ.” Josué a nga dzale é ngiagh a nga bo be, éde éé dzi ki be wiñ.

Kaa naa abuiñ tam é lôt, éde bekéza betan be ya Canaán be nga téé ya bezima beba naa, ba ke lumane ya Begabaonitas. Josué ya nsama bezima wèñ be nga wulu ngura nté alu, naa be ke ba kôre. Aluman é nga sum kiriri ôsu vaa. Becananeos be nga sum tup ébe minfa mise. É vôm ôse be mbe bé ke, Jehôva a mbe é bo naa bura mekoa me mveng me ku be ô ñuu. Ane Josué a nga dzaa Jehôva naa nlô-dzôp ô tebe vôm mboo kaa fônghane. Amu dzé Josué a mbe dzaa Jehôva aval dzam té, kaa naa nlô-dzôp ô tareyang tebe vôm mboo kaa fônghane ? Amu naa Josué a mbe a bele mebun ébe Jehôva. Nlô-dzôp wéé dzi ki ke dzoghbe ô si ya ke kuiñ ane Bisraelitas be nga mane wun bekéza Becananeos ya minsama bezima mieba.