Za abîm Bengaa Jehôva wa yeme ? Abong ézing be ne é vôm ô too, nda bisèñ dwiè, a sikolo wiè, nge ki é bôr mina be bo mina luè minlang mi yaa Kalare Nzame. Ve nsili ô ne naa, bi ne beza ? Amu dzé bia nyeghe bia kobe é bôr bevokh é mam bia yeghe ?

Bi ne ane é bôr bevokh bese. Bia so meyong mese. Abuiñ yaa bebia é mbe é bele n’yebe, é ba bevokh b’éé mbe ki be bele mebun ébe Nzame. Ve bia bese bi nga ñong éyong ya yeghe Kalare Nzame (Bisè Mintôl 17:11). É mam bi nga yen été me nga ve naa bi bele mebun ébe Nzame ane bi nga top naa é nye bia zu wume.

Ayeghle ya Kalare Nzame da so bia biboran. Ane é bôr bevokh bese, bia vus ye yen minzukh. Ve bia ve ngul mos ôse naa bi wule ane Kalare Nzame a sili. Mboane te wa ve naa éning dzaa é bo mbeng (Bya 128:1, 2). Akalgha te da ve naa bi kanghle é bôr bevokh mbemba be mam bia yeghe.

Mbemba mefulu bi bele ma so ébe Nzame. Melepgha bia ñong a Bible été, ma so bia mbemba éning, ma ve naa bi seme é bôr bevokh, keghe wup, évuvwuèñ nlem, anyep. Melepgha me te ma ve fe naa bi bo bebo bisèñ be ne sôsôe ye ngômele, ve yeme baghle menda me bôr élat été, ye nfuban nsisim. Afiang bo naa bia so meyong mese, bi ne dzôm dzaa amu « Nzame a se ki ôbangam », é ne été, bi ne ane é bôr bevokh. Ve, ékôan dzaa é ne ngura aval !​—Bisè Mintôl 4:13 ; 10:34, 35.

• Amu dzé bi ne dzô naa Bengaa Jehôva be ne ane bôr bese ?

• Za mefulu Bengaa Jehôva be nga yeghe a Kalare Nzame été ?

Melu mvus be nga luluè bia naa « Beyeghe Kalare Nzame ». Ve, mbu 1931, bi nga ñong éyôla « Bengaa Jehôva ». Bôr abuiñ be nga bune naa ane nféféñ n’yebe. Keghe yeme naa Nzame émyèn, antoo mimbu 2700 a nga luluè bebo bisèñ bèñ naa « Bengaa bam » (Ésaïe 43:10-12). Amu dzé bi nga ñong éyôla Bengaa Jehôva ?

Éyôla te da lere za a ne é Nzame waa. Éyong be nga tsili Kalare Nzame, éyôla Jehôva é mbe été biyong 7 000. Ve minféféñ minkonglan mi Kalare Nzame m’izing mi nga vaa éyôla Nzame ve furu biyôla bife. Nzame émyèn a nga kare Mose éyôla dzèñ, Jehôva, éé dzô naa : « éyôla dzam é dzaalé da tobe mbèmbèè » (Akore 3:15). Aval te Jehôva a nga ve nkane é zang dzèñ ye be Nzame befe. Bia yen mevakh naa bi beghe éyôla Nzame.

Éyôla te da lere ésèñ bia bo. Môra nsama befam ya binenga be mbe sôsôe melu mvus, a tare Abel, be mbe be bele mebun ébe Jehôva ye wume nye. Éyong mimbu mi nga lôre, Noé, Abraham, Sara, Mose, David y’éba bevokh be nga koghle môra « nsama Bengaa » (Behébreu 11: 4-12:1). Nganyiè aa kam môr a nda medzô, aval te fe bia kam be bebela ba deghe Nzame.

Yésu fe a ne moan Ngaa. Kalare Nzame émyèn a luè Yésu naa « nya nganyè » (Melere 3:14). Yésu émyèn a nga dzô naa : me nga yeghle bôr éyôla Nzame ve ki kanghle be be « bebela medzô » (Jean 17:26 ; 18:37). Beyeghe Yésu ba yiane beghe ya yeghle bôr éyôla Nzame. Bengaa Jehôva ba ve ngul ése naa be bo ésèñ te.

• Amu dzé beyeghe be Kalare Nzame be nga ñong éyôla « Bengaa Jehôva » ?

• Jehôva a nga tare bele Bengaa e si va éyong é vé ?

• Ngaa mbé aa dang bese ?

Kalare Nzame a nga bôm naa niane Christ a ye wu, bivus min’yebe mia ye nyii ézezang bechrétien ve mane sole be nya bebela yaa Kalare Nzame (Bisè Mintôl 20:29, 30). Dzam te é nga bobane aval é mbe ntsilan. Mbemba meyeghle Yésu me nga mane fulan ya bivus meyeghle éde é nga ve naa nya Chritianisme a zamane (2 Timothée 4:3, 4). Amu dzé bi ne dzô naa ému wi bi bele mbemba wokghane mam Kalare Nzame a tugha yeghle bia ?

Awola bebela ékuiñ-yang. Éyong y’asughlan « Jehôva a nga dzô naa n’yeman wa ye bo abuiñ » (Daniel 12:4). Mbu 1870, é moan nsama bôt a nga dzeng bebela a nga yen naa abuiñ meyeghle me yaa menda me nzame, maa so ki a Kalare Nzame. Éde be nga dzeng naa be yem é mam kalare te a nga yeghle atargha. Jehôva a nga vole be.

Ayeghle bible é ne édokh. Moan nsama bôr a nga yeyeghe Kalare Nzame aval ane bia bo ému : be nga fefas minlô medzô mi yaa Bible. Éyong ba bo keghe tugha wokh é fus ézing, be nga dzeng bifus bi fe bia ve é fus te ayili. Niane be kuiñ-yang king dzaa naa nwoghan ô te wa tobane ya bifus bivokh, be tsili de ngura vôm. Aval te da likh naa Bible émyèn a ve ayili ye lere éndendang. Dzam te é nga ve naa be yem be bebela b’ézing ane : éyôla Nzame, Édjié Nzame, nkôman Nzame akal si, dzé da lôre éyong môr a wu, ya mebun ma deghe awôme mimbîm. Be bebela be te be nga ve naa be kanane ye bivus min’yebe.​—Jean 8:31, 32.

Mbu 1879, beyeghe Kalare Nzame be nga yem naa éyong ya kule benya be bebela ékuiñ-yang. Be nga tare kule nsoe kalare ba luè naa : Ô momo a bôm é fuèñ ya Édjié Jehôva. Bi ngene bia kulu wo émuwi. Bia bôm fuèñ te a lôre mesi 240 ye minkobe 900. Keghe dzôm, aval abîm n’yeman te da be ki tare kuiñ a si éyong é fe !

• Niane Christ a nga wu, benya medzô ya Kalare Nzame me nga sughlane ya ?

• Aval avé éndedang é nga bera fèñ ?

E be mimbu a mimbu bi nga bebelane abuiñ minkulane mi bible. Ve bi nga simane naa bia yiane kule nféféñ ô fe ô ne vole bôr naa be « bele nya n’yeman medzô » me Nzame ane a kômô (1 Timothée 2:3, 4). Éde é nga bo naa mbu 1950 Traduction du monde nouveau a nga sum kuiñ nkobe nges. Nkonghlan Bible te ô ne sôsôe ye bebela ô too fe ébubu ya wokh a lôre minkobe 160.

Nkulan ô ne ébubu ya wokh. Éyong minkobe mia vem, abuiñ minkonghlan mi Bible mia so bifia bôr be ne keghe tugha yeme, keghe dang belane byo yaa nzukh a wokh. Éde, min’nôm mintsilan mi Bible be nga yen ô mvus mi nga ve naa be yeme wokh minkobe hébreu, araméen ye grec ya Bible.

Nkonghlane ô ne sôsôe y’aval Nzame a dzô. É bôr ba konghlane Kalare Nzame ba yiane tông mintsilan ya melu mvus. Baa yiane ki va éfia ézing nge ki a fure é fe. Ve, bia yen naa abuiñ minkonghlane mi Kalare Nzame miaa belane ki é nya éyôla Nzame, Jehôva.

É Bible aa ve Jehôva duma. (2 Samuel 23:2) É fôrô a ne afep di a si a lere naa melu mvus éyôla Jehôva é mbe min’nôm mintsilan été, éde Traduction du monde nouveau a nga fure éyôla te mevôm é mbe tang biyong 7 000 (Bya 83:18). Nkonghlane te ô nga ñong abuiñ mimbu. Ve, n’nem ô ne bia mevakh éyong bia lang wo amu wa yeme kule ôsiman Nzame. A bo naa ô bele nkonghlane te nkobe wiè nge ki ô fe, ñonghe fulu yaa lang Kalare Nzame mos ôse.​—Josué 1:8 ; Bya 1:2, 3.

• Dzé é nga ve naa bi kulu Traduction du monde nouveau ?

• Za fulu é ne ve naa bi yeme nkôman Nzame ?