Sɛ Yehyia Ɔhaw Mpo A, Hɛn Asomu Botum Adwe Hɛn

1. Sɛ wɔka “Nyankopɔn n’asomdwee” a, ɔkyerɛ dɛn, na sɛ yɛwɔ asomdwee a ɔtse dɛm a, ɔboa hɛn dɛn? (Philippifo 4:6, 7)

ASOMDWEE bi wɔ hɔ a wiadze no nnyim ho hwee. Ebɛn asomdwee a? Ɔyɛ “Nyankopɔn n’asomdwee.” Dɛm asomdwee yi yɛ akomatɔyamu a yenya osian anyɛnkofa a no mu dzen a yɛnye hɛn sor Egya Jehovah wɔ no ntsi. Sɛ yɛwɔ Nyankopɔn n’asomdwee a yɛtse nka dɛ yɛwɔ bambɔ. (Kenkan Philippifo 4:6, 7.) Afei so, ɔma yɛnye hɛn nuanom a wɔdɔ Jehovah no ntamu yɛ kama paa. Bio so, ɔma yɛnye “asomdwee Nyankopɔn” no nya ebusuabɔ a no mu yɛ dzen. (1 Thess. 5:23) Sɛ yehu hɛn sor Egya no yie, yɛgye no dzi, na yetsie no a, Nyankopɔn n’asomdwee bɛma hɛn akoma atɔ hɛn yamu ber a yerihyia ɔhaw no.

2. Ebɛnadze ntsi na yebotum agye edzi paa dɛ Nyankopɔn bɛma hɛn n’asomdwee?

² Ɔtɔ da a yarba tum tsew si beebi a yɛwɔ no, atoyerɛnkyɛm bi si, basabasayɛ kɔ do wɔ ɔman a yɛwɔ mu no mu anaa wɔsoɛr tsia hɛn. Sɛ yerihyia ɔhaw ahorow a ɔtsetse dɛm a, aso yebotum enya Nyankopɔn n’asomdwee ma ayɛ yie? Ɔyɛ nokwar, ɔhaw yi mu biara botum ama yaabɔ hu. Naaso Jesus hyɛɛ n’ekyirdzifo nkuran dɛ: ‘Mma hom akoma nntu, eso mma ɔmmbɔ hu.’ (John 14:27) Enyigyesɛm nye dɛ hɛn nuanom dze asɛm a Jesus kae yi yɛ edwuma. Ɔmmfa ho ɔhaw akɛse a worihyia no, Jehovah aboa hɔn ma hɔn asomu adwe hɔn.

DZA ƆBƐMA HƐN ASOMU ADWE HƐN BER A YARBA BI ATSEW ESI BEEBI A YƐWƆ NO

3. Sɛ yarba bi tsew si beebi a yɛwɔ no anaa ɔtserɛw wɔ wiadze nyina a, ebɛn kwan do na obotum asɛɛ hɛn asomdwee?

³ Sɛ yarba bi tsew si beebi a yɛwɔ no anaa ɔtserɛw wɔ wiadze nyina a, obotum asesa hɛn asetsena koraa. Hom mma yɛnhwɛ ɔhaw a COVID-19 yarba no dze baa nyimpa pii do. Wɔyɛɛ nhwehwɛmu bi, na hɔn a wobisabisaa hɔn nsɛm no mu fa kɛsenara kaa dɛ aber a yarba no bae no nna wonntum nnda. Yarba no maa ɔhaw ahorow bi tse dɛ dadwen a ɔhyɛ nkorɔfo do, nkorɔfo a hɔn adwen mu yɛ hɔn basaa, nsanom, ndubɔnnom, basabasayɛ a ɔkɔ do wɔ fie, nye nkorɔfo a wɔpɛ dɛ woku hɔnho no gyee nsamu koraa. Sɛ yarba bi tsew si beebi a ewɔ no a, ebɛnadze na ibotum ayɛ amma dadwen annhyɛ wo do na eenya Nyankopɔn n’asomdwee?

4. Jesus kaa nsɛm ahorow bi a obesisi wɔ ewiei mber no mu ho asɛm. Ebɛnadze ntsi na iyi a yenyim no ma hɛn asomu dwe hɛn?

⁴ Jesus kaa dɛ sɛ wiadze no rokɔ n’ewiei a yarba ahorow bɛba “mbeambea.” (Luke 21:11) Ebɛn kwan do na iyi a yenyim no ma hɛn asomu dwe hɛn? Sɛ yarba bi tsew si beebi a, ɔnnyɛ hɛn nwanwa koraa. Mbom ɔma yehu dɛ dza Jesus kae no ara na ɔreba mu no. Dɛm ntsi ɔsɛ dɛ yɛdze afotu a Jesus dze maa hɔn a wɔtse ewiei mber mu no yɛ edwuma. Ɔkaa dɛ: ‘Hom nhwɛ na hom akoma enntu.’​—Matt. 24:6.

5. (a) Dɛ mbrɛ Philippifo 4:8, 9 ma yehu no, ebɛnadze na ɔsɛ dɛ yɛbɔ ho mpaa aber a yarba bi atsew esi beebi a yɛwɔ no? (b) Sɛ itsie Bible akenkan a wɔbɔ tsie no a, ɔbɔboa wo dɛn?

⁵ Sɛ yarba bi tsew si beebi a, obotum ama yaayɛ basaa na yaabɔ hu mpo. Dɛm na ɔtoo hɛn akyerɛbaa bi a wɔfrɛ no Desi.b COVID-19 kum no wɔfa, no nua bi na no dɔkta. Nna osuro dɛ annhwɛ a na oenya yarba no bi ma ɔdze akɛsan ne maame a ne mfe akɔ enyim no. Afei so, nna osuro dɛ yarba no ntsi bi a na n’edwuma efi ne nsa, na sɛ ɔba no dɛm a ɔbɛyɛ dɛn edzidzi na oeetua ne dan kaw. Iyinom nyina maa ɔyɛɛ basaa ma nna ɔda a ɔnnda. Naaso Desi n’asomu dwee no. Ebɛnadze na ɔboaa no? Ɔbɔɔ ne haw no ho mpaa na ɔkaa kyerɛɛ Jehovah dɛ ɔmboa no ma n’akoma ntɔ ne yamu na ɔndwendwen nsɛm a ɔbɛhyɛ no nkuran ho. (Kenkan Philippifo 4:8, 9.) Akyerɛbaa no tsiee Bible akenkan a wɔbɔ tsie. Na iyi maa ɔtsee nka dɛ kwan bi do no Jehovah nye no “rekasa.” Ɔkaa dɛ, “Mbrɛ nna hɔn a wɔrekenkan Bible no hɔn ndze tse no maa m’akoma tɔɔ me yamu na metsee nka dɛ Jehovah dwen moho.”​—Ndw. 94:19.

6. Sɛ eyɛ ankorankor adzesua na ekɔ asafo nhyiamu a, ɔbɔboa wo dɛn?

⁶ Sɛ yarba bi tsew si beebi a ewɔ no a, ɔnnyɛ aber nyina na ibotum ayɛ ndzɛmba a nna etaa yɛ no. Naaso, sɛ ɔba no dɛm mpo a, kɔ do ara yɛ w’ankorankor adzesua na kɔ asafo nhyiamu dabaa. Suahu ahorow a ɔwɔ hɛn nwoma nye video ahorow mu no ma yehu dɛ, hɛn nuanom so rihyia ɔhaw a ɔtsetse dɛmara naaso wɔkɔ do som Jehovah nokwar mu. (1 Pet. 5:9) Sɛ ekɔ asafo nhyiamu a, ɔbɔboa wo ma eenya ndzɛmba pa pii efi Bible mu a ibotum adwendwen ho. Obotum so ama eenya hokwan a ibotum dze ahyɛ afofor nkuran na hɔn so wɔahyɛ wo nkuran. (Rom. 1:11, 12) Sɛ edwendwen mbrɛ Jehovah sii boaa n’asomfo binom a nna wɔyar, wɔbɔ hu anaa wɔtse nka dɛ wɔayɛ ankonam no ho a, ɔbɛhyɛ wo gyedzi dzen. Nnyɛ ɔno nko, ɔbɛma agye edzi paa dɛ Jehovah bɔboa woara so ma eegyina dza irihyia no ano.

7. Ebɛnadze na ibotum esua efi ɔsomafo John hɔ?

⁷ Bɔ mbɔdzen dɛ enye wo nuanom bedzi nkitaho. Sɛ yarba bi tsew si beebi a yɛwɔ na yɛnye hɛn nuanom Christianfo hyia mu mpo a, bi a no ho behia dɛ yɛtsetsew hɛn ntamu. Sɛ ɔba no dɛm a, bi a yɛbɛtse nka dɛ ɔsomafo John. Nna ɔpɛ dɛ ɔnye ne nyɛnko Gaius hyia enyim na enyim. (3 John 13, 14) Naaso, John hun dɛ mber kakra botwa ansaana oehu Gaius. Dɛm ntsi John yɛɛ dza obotum. Ɔkyerɛɛw krataa kɛmaa Gaius. Sɛ ɔnnyɛ aber nyina na ɔbɛyɛ yie ama wo dɛ enye wo nuanom behyia enyim na enyim a, ibotum afrɛ hɔn wɔ tɛlefon anaa video kɔɔl do. Ibotum so asɛnd hɔn tɛst mɛsegye. Sɛ enye wo nuanom dzi nkitaho a, ɔremma nntse nka dɛ ayɛ ankonam na w’akoma so bɔtɔ wo yamu. Sɛ dadwen hyɛ wo do a, ka ho asɛm kyerɛ asafo mu mpanyimfo no, na mboa biara a wobefi ɔdɔ mu dze ama wo no gye to mu.​—Isa. 32:1, 2.

DZA ƆBƐMA HƐN ASOMU ADWE HƐN BER A ATOYERƐNKYƐM BI ESI

8. Sɛ atoyerɛnkyɛm si a, ebɛn kwan do na obotum asɛɛ w’asomdwee?

⁸ Sɛ nsu eyir afa beebi a ewɔ, asaasewosow bi esi anaa gya atɔ beebi a ewɔ no a, dadwen botum ahyɛ wo do mber tsentsen bi. Sɛ ɔhaw a woesi no ama wo dɔfo bi ewu anaa w’egyapadze asɛɛ a, bi a wo werɛ bɔhow, ebɛtse nka dɛ innyi ɔboafo biara anaa bi mpo a wo bo bofuw. Naaso iyi nnkyerɛ dɛ w’enyi gye asetsena mu ndzɛmba ho paa anaa innyi gyedzi. Ɔhaw a wɔato wo no dze ɔyɛ yaw, ntsi bi a nyimpa binom bɔhwɛ kwan dɛ ebɛyɛ w’adze wɔ kwan a ɔmmfata do. (Job 1:11) Naaso ɔmmfa ho ɔhaw akɛse yi nyina ekyir no, w’asomu botum adwe wo. Ebɛnadze ntsi na yɛreka dɛm?

9. Ebɛn asɛm na Jesus kae dze siesiee hɛn adwen wɔ atoyerɛnkyɛm a obesisi ho?

⁹ Ma asɛm a Jesus kae no ntsena w’adwen mu. Hɔn a wɔnnsom Jehovah no dze, wɔdwen dɛ atoyerɛnkyɛm ronnto hɔn da. Naaso hɛn dze, yenyim dɛ atoyerɛnkyɛm akɛse pii besisi. Na yɛhwɛ kwan mpo dɛ bi besisi wɔ beebi a yɛwɔ no. Jesus kaa kyerɛɛ n’ekyirdzifo dɛ ‘asaasewosow akɛse’ nye atoyerɛnkyɛm ahorow besisi ansaana ewiei no aba. (Luke 21:11) Afei so ɔkaa dɛ “emumuyɛ bɔdɔɔ so,” na ampaara so ndɛ nsɛmbɔndzi, basabasayɛ nye ewudzifo a wɔtow hyɛ nkorɔfo do kuku hɔn no rokɔ do. (Matt. 24:12) Naaso Jesus annka da dɛ dɛm ɔhaw ahorow yi bɔto hɔn a wɔnnsom Jehovah no nkotsee. Nokwasɛm nye dɛ atoyerɛnkyɛm ato Jehovah n’asomfo anokwafo pii. (Isa. 57:1; 2 Cor. 11:25) Ɔsɛ dɛ yɛma ɔtsena hɛn adwen mu dɛ Jehovah remmfa anwanwa kwan do mmbɔ hɛnho ban mmfi atoyerɛnkyɛm nyina ho. Naaso ɔbɛma hɛn dza yehia biara ama hɛn akoma aatɔ hɛn yamu na hɛn asomu so aadwe hɛn.

10. Ebɛnadze ntsi na sɛ yesiesie hɛnho ma atoyerɛnkyɛm ndɛ a, ɔkyerɛ dɛ yɛwɔ gyedzi? (Mbɛbusɛm 22:3)

¹⁰ Sɛ yenyim dza yɛbɛyɛ ansaana atoyerɛnkyɛm bi esi a, ɔremma yɛmmbɔ hu aber a esi no. Naaso sɛ yɛyɛ dɛm a, aso ɔkyerɛ dɛ yennyi Jehovah no mu gyedzi anaa? Ɔnntse dɛm koraa. Mbrɛ ɔtse nye dɛ, sɛ yesiesie hɛnho ma atoyerɛnkyɛm a, ɔkyerɛ dɛ yɛwɔ Jehovah no mu ahotodo dɛ ɔbɔhwɛ hɛn. Ebɛnadze ntsi na yɛreka dɛm? Bible no tu hɛn fo dɛ ɔsɛ dɛ yesiesie hɛnho ma atoyerɛnkyɛm bi a obotum esi. (Kenkan Mbɛbusɛm 22:3.) Jehovah nam n’ahyehyɛdze no do kɔ do ara hyɛ hɛn nkuran dɛ yensiesie hɛnho mma atoyerɛnkyɛm. Ɔyɛ dɛm dze nam nsɛm a ɔba wɔ hɛn magazine mu, asafo nhyiamu nye nkaabɔ ahorow a ɔba wɔ ne ber mu no do.c Ana yɛgye Jehovah dzi? Sɛ dɛm a, yebesiesie hɛnho ndɛ ansaana atoyerɛnkyɛm bi esi.

11. Ebɛnadze na isua fi dza Margaret yɛe no mu?

¹¹ Ma yensusu akyerɛbaa bi a wɔfrɛ no Margaret n’asɛm no ho. Aber a gya tɔɔ beebi a ɔwɔ no, aban mpanyimfo kaa kyerɛɛ no dɛ ontu mfi hɔ. Nna nyimpa piinara na woruguan. Dɛm ntsi nna kaar na nyimpa pii abɔ apee do ma obi nnkɔ na obi aba. Nna hɔ nyinara ayɛ wusiw kumbɔɔ ma ntsi nna Margaret nntum mmpue mmfi ne kaar no mu. Naaso hwee annyɛ no osiandɛ nna onyim dza ɔbɛyɛ. Nna ɔwɔ maap bi hyɛɛ ne baag ketseketse bi mu. Dɛm maap no boaa no ma ohun kwan fofor a obotum afa do eguan efi beebi a ɔwɔ no. Nna wɔafa dɛm kwan no do mpo da mbrɛ ɔbɛyɛ a sɛ atoyerɛnkyɛm bi si a, obotum afa hɔ eguan. Enyigyesɛm nye dɛ, hwee annyɛ Margaret osiandɛ nna onyim dza ɔbɛyɛ.

12. Ebɛnadze ntsi na ɔsɛ dɛ yedzi akwankyerɛ a ɔbɔ hɛnho ban no do?

¹² Sɛ atoyerɛnkyɛm bi si a, etumfo no botum aka akyerɛ hɛn dɛ yɛnhyɛ dan mu, yentu mfi beebi a yɛwɔ no anaa yɛnyɛ ndzɛmba afofor bi a ɔbɔbɔ yɛnye afofor ho ban. Naaso awerɛhosɛm nye dɛ, binom twentweɔn hɔn ananadze dɛ wɔdze akwankyerɛ no bɛyɛ edwuma osiandɛ wɔmmpɛ dɛ wogya hɔn egyapadze hɔ. Hɛn Christianfo so ɛ, ɔsɛ dɛ yɛyɛ hɛn adze dɛn? Bible no tu hɛn fo dɛ: ‘Hom mbrɛ homho adze mma nyimpa tumdzi nyina wɔ Ewuradze ntsi, dɛ ɔhempɔn a ɔyɛ otsitsir anaa ambradofo a ɔsoma hɔn.’ (1 Pet. 2:13, 14) Nyankopɔn n’ahyehyɛdze no so ma hɛn akwankyerɛ a ɔbɔ hɛnho ban. Wɔtaa hyɛ hɛn nkuran dɛ yɛmfa hɛn tɛlefon nɔmba mma asafo mu mpanyimfo no mbrɛ ɔbɛyɛ a sɛ atoyerɛnkyɛm bi si a, wobotum nye hɛn edzi nkitaho. Aso edze wo nɔmba ama hɔn? Yebotum so enya akwankyerɛ dɛ yɛnhyɛ dan mu anaadɛ yentu mfi beebi a yɛwɔ no. Afei so akwankyerɛ no bi ma yehu mbrɛ hɛn nsa botum aka ndzɛmba a yehia ber a atoyerɛnkyɛm bi esi, dza yebotum ayɛ dza aboa afofor nye ber a yebotum akɔboa. Sɛ yɛammfa dɛm akwankyerɛ yinom annyɛ edwuma a, obotum dze hɛn nkwa nye asafo mu mpanyimfo hɔn nkwa ato esian mu. Kaa dɛ dɛm mbarimba anokwafo yi na wɔhwɛ hɛn akra do. (Heb. 13:17) Margaret kaa dɛ, “Megye dzi paa dɛ akwankyerɛ a asafo mu mpanyimfo nye Jehovah n’ahyehyɛdze no dze mae a medze yɛɛ edwuma no na ɔgyee me nkwa.”

13. Osian ɔhaw ahorow bi ntsi, enuanom binom etu efi hɔn efie mu. Ebɛnadze na ɔboa hɔn ma hɔn enyi gye na hɔn asom dwe hɔn?

¹³ Hɛn nuanom pii na atoyerɛnkyɛm, akodzi anaa basabasayɛ a ɔrokɔ do wɔ hɔn man mu ntsi, woetu efi hɔn efie mu. Naaso ne nyina ekyir no, wɔagye ato mu dɛ ndzɛmba asesa, na wɔbɔ hɔnho mbɔdzen yɛ pii wɔ Jehovah no som mu. Wɔkɔ do ‘ka asɛmpa no’ dɛ mbrɛ tsetse Christianfo a ɔsoɛrtsia maa wɔpetsee no yɛe no. (Andw. 8:4) Asɛnka edwuma no boa hɔn ma wɔmmfa hɔn adwen nnsi ɔhaw a wɔaba mu no do na mbom wɔdze si Nyankopɔn n’Ahendzi no do. Iyi ntsi hɔn enyi gye na hɔn asomu so dwe hɔn.

DZA ƆBƐMA HƐN ASOMU ADWE HƐN BER A WƆSOƐR TSIA HƐN

14. Sɛ wɔsoɛr tsia hɛn a, ebɛn kwan do na obotum asɛɛ hɛn asomdwee?

¹⁴ Sɛ wɔsoɛr tsia hɛn a, ɔyɛ dzen ma hɛn dɛ yɛbɛyɛ ndzɛmba ahorow a ɔma hɛn asomu dwe hɛn no. Mbrɛ ɔtse nye dɛ, sɛ yetum hyia mu sua Jehovah ho adze, yɛyɛ asɛnka edwuma no na yɛyɛ ndzɛmba yɛtaa yɛ aber a yennsuro dɛ annhwɛ a na wɔakyer hɛn a, ɔma hɛn enyi gye paa na hɛn akoma so tɔ hɛn yamu. Naaso sɛ wɔmma hɛn kwan ma yenntum nnyɛ dɛm ndzɛmba yi a, obotum ama dadwen ahyɛ hɛn do. Anaadɛ hɛn akoma mpo botum etu osiandɛ yennyim dza obesi. Mfom biara nnyi ho dɛ yɛbɛtse nka dɛm. Naaso ɔsɛ dɛ yɛyɛ ahwɛyie. Jesus kaa dɛ sɛ wɔsoɛr tsia n’ekyirdzifo a, obotum ato hɔn fintsidua. (John 16:1, 2) Naaso ebɛnadze na ɔbɛma hɛn asomu adwe hɛn aber a wɔrosoɛr etsia hɛn no?

15. Sɛ wɔsoɛr tsia hɛn a, ebɛnadze ntsi na ɔnnsɛ dɛ yesuro koraa? (John 15:20; 16:33)

¹⁵ Bible no ka dɛ: ‘Hɔn a wɔpɛ dɛ wɔdze nyamesompa tsena ase wɔ Christ Jesus mu nyinara, wɔbɔsoɛr etsia hɔn.’ (2 Tim. 3:12) Aber a wɔbraa ɔsom edwuma no wɔ onua bi a wɔfrɛ no Andrei ne man mu no, nna ɔyɛ dzen ma no dɛ ɔbɛgye ato mu dɛ wɔbɔsoɛr etsia Jehovah n’asomfo nyina. Ɔkaa dɛ: ‘Adasefo pii na yɛwɔ ha, ntsi wobesi dɛn akyer hɛn nyina?’ Naaso dɛ nkyɛ adwen a onyae no bɛma n’asomu adwe no no, mbom ogyaa no adwendwen. Enuanom a wɔaka no dze, wɔdze hɔnho too Jehovah do na woennya adwen dɛ worunntum nnkyer hɔn. Nna wonyim dɛ wobotum akyer hɔn, naaso wɔamma asɛm no annhyɛ hɔn do dɛ Andrei. Adze a ɔboaa Andrei nye dɛ ɔdze noho nyina too Jehovah do koraa na onyaa adwen a enuanom no wɔ no bi. Iyi maa n’asomu dwee no. Ɔwɔ mu dɛ ɔda ho ara hyia ɔhaw, naaso n’enyi gye. Sɛ hɛn so yɛyɛ dɛm a, hɛn enyi bɛgye. Jesus kaa kyerɛɛ hɛn dɛ wɔbɔsoɛr etsia hɛn naaso ɔsaan so maa hɛn awerɛhyɛmu dɛ, sɛ ɔba no dɛm mpo a yebotum edzi nokwar.​—Kenkan John 15:20; 16:33.

16. Sɛ wɔrosoɛr etsia hɛn a, ebɛn akwankyerɛ na ɔsɛ dɛ yɛdze yɛ edwuma?

¹⁶ Sɛ wɔbra hɛn som edwuma no anaa wɔdze nsa to do a, hɛn nsa botum aka akwankyerɛ efi Bethel na asafo mu mpanyimfo hɔ. Akwankyerɛ a ɔtse dɛm no bɔ hɛnho ban, ɔma hɛn nsa kɔ do ka ndzɛmba ahorow a ɔbɛma yɛnye Jehovah ntamu ayɛ kama, na ɔma yɛkɔ do yɛ asɛnka edwuma no dɛ mbrɛ yebotum. Sɛ akwankyerɛ a wɔdze ama wo no, enntse ase mpo a, bɔ mbɔdzen na fa yɛ edwuma. (Jas. 3:17) Afei so, ɔnnsɛ dɛ eka enuanom no hɔnho nsɛm anaa nsɛm a ɔfa asafo no ho kyerɛ hɔn a wonnyi hokwan dɛ wɔtse no.​—Ɔsɛnk. 3:7.

17. Dɛ mbrɛ asomafo no yɛe wɔ tsetse Christianfo no aber do no, ebɛnadze na hɛn so yeesi hɛn bo dɛ yɛbɛyɛ?

¹⁷ Ndzɛmba etsitsir bi ntsi na Satan kɔ do nye Nyankopɔn no nkorɔfo ko no. No mu kor nye dɛ wɔkɔ do dzi Jesus ho dase. (Nyi. 12:17) Naaso mma mma Satan na no wiadze no nnhunahuna wo. Sɛ wɔsoɛr tsia hɛn na yɛkɔ do ka asɛmpa no na yɛkyerɛkyerɛ nkorɔfo a, ɔma hɛn enyi gye na hɛn asomu so dwe hɛn. Tsetse Christianfo no hɔn aber do no, Jewfo mpanyimfo no hyɛɛ asomafo no dɛ wongyaa asɛnka edwuma no. Naaso dɛm mbarimba anokwafo yi tsiee Nyankopɔn na wɔkɔr do yɛɛ asɛnka edwuma no. Na asɛnka edwuma no so maa hɔn enyi gyee paa. (Andw. 5:27-29, 41, 42) Ɔwɔ mu, sɛ wɔdze nsa to hɛn som edwuma no do a, ɔsɛ dɛ yɛyɛ ahwɛyie ber a yɛreyɛ asɛnka edwuma no. (Matt. 10:16) Naaso sɛ yɛyɛ dza yebotum biara wɔ asɛnka edwuma no mu a, hɛn asomu bɔdwe hɛn, osiandɛ dɛ yenyim dɛ yɛreyɛ dza ɔsɔ Jehovah n’enyi na yɛka nkwagye asɛm no kyerɛ nkorɔfo.

“ASOMDWEE NYANKOPƆN NO NYE WO BƐTSENA”

18. Woana na obotum ama yeenya asomdwee mapa?

¹⁸ Ɔsɛ dɛ yenya awerɛhyɛmu dɛ, sɛ yehyia ɔhaw a no mu yɛ dzen mpo a, hɛn asomu botum adwe hɛn. Mber a ɔtse dɛm mu no, ɔsɛ dɛ yɛkaa dɛ asomdwee a yehia no nye Nyankopɔn n’asomdwee. Dɛm asomdwee no dze, Jehovah nkotsee na obotum ama yeenya. Sɛ yarba bi tsew si beebi a ewɔ no, atoyerɛnkyɛm bi si anaa wɔsoɛr tsia wo a, fa woho nyina to no do. Mma nntwe woho mmfi Jehovah n’ahyehyɛdze no ho da. Fa w’adwen si ndzɛmba papa a Jehovah bɛyɛ ama wo daakye no do. Sɛ eyɛ dɛm a, “asomdwee Nyankopɔn no nye wo bɛtsena.” (Phil. 4:9) Yɛbɔhwɛ kwan a yebotum afa do aboa hɛn nuanom Christianfo a worihyia ɔhaw no ma woeenya Nyankopɔn n’asomdwee wɔ adzesua a odzi hɔ no mu.