Ma nkorɔfo nhu dɛ etse asɛm ase. Ntsi bisa woho dɛ: ‘Ana nkorɔfo nyim me dɛ meyɛ obi a metse asɛm ase, monntwe nsɛm mu tann, na megye afofor hɔn adwenkyerɛ to mu? Anaa wonyim me dɛ meyɛ katsee, me tsirmu yɛ dzen anaa m’asɛm yɛ dzen? Sɛ ɔbɛyɛ yie a, mitsie afofor hɔn adwenkyerɛ anaa?’ Mbrɛ yesi da ntseasee edzi no na ɔbɛkyerɛ mbrɛ yeesuasua Jehovah na Jesus ekodu. Sɛ hɛn tsebea sesa na yɛwɔ ntseasee a, yɛbɛgye ato mu. Nsesa a ɔtse dɛm no botum dze ahokyer a yɛnnhwɛ kwan abɔto hɛn do. Dɛ nhwɛdo no, yarba bi botum abɔ hɛn awerɛfir mu. Anaadɛ ɔman a yɛtse mu no ne sikasɛm botum ayɛ basaa, anaa wɔbɛsesa aban a ɔwɔ do no prɛko pɛr, na iyi botum aka hɛn asetsena paa. (Ɔsɛnk. 9:11) Sɛ asafo no sesa hɛn dwumadzi mpo a, obotum ayɛ dzen ama hɛn dɛ yɛbɛgye ato mu. Ndzɛmba anan bi botum aboa hɛn ma yaada ntseasee edzi na yɛayɛ nsesa ma ɔnye tsebea fofor a yɛakɔ mu no ehyia. Ndzɛmba anan no nye: (1) gye to mu dɛ ndzɛmba asesa, (2) fa w’adwen si ndzɛmba a ibotum ayɛ no do, (3) dwendwen ndzɛmba pa a woesi wɔ w’asetsena mu no ho, na (4) yɛ ndzɛmba boa afofor. w23.07 21-22 ¶7-8

Aber a Babylonfo no kɛfaa nkɔnhyɛnyi Daniel dɛ akowaa fii no kurow mu Jerusalem tɔnn kɔr Babylon no, nna ɔyɛ ɔbabun. Naaso Babylonfo no hyɛɛ no nsew dɛ Daniel yɛ soronko fi hɔn a wɔaka no ho. Wɔhwɛɛ ‘dza otua enyiwa,’ na wohun dɛ Daniel yɛ ‘aberantsɛba a onndzii dzɛm, na noho yɛ fɛw.’ Afei so, nna ofi ebusua tsitsir bi mu. (1 Sam. 16:7) Dɛm ndzɛmba a Babylonfo no hunii wɔ Daniel ho ntsi, wɔmaa no ntsetsee a nna ɔbɛma oetum asom wɔ ahemfie hɔ. (Dan. 1:​3, 4, 6) Nna Jehovah dɔ Daniel osian gyinae a osii dɛ ɔbɛyɛ dza ɔno Jehovah pɛ ntsi. Nokwasɛm nye dɛ, aber a Jehovah reka Noah na Job, mbarimba a nna wɔdze mfe pii asom no no ho asɛm no, ɔdze Daniel kaa ho. Ɔbɛyɛ dɛ dɛm aber no nna wɔaka kakra ma Daniel edzi mfe 20, anaaso dɛ nna oedzi mfe 20 na kakra. (Gen. 5:32; 6:​9, 10; Job 42:​16, 17; Ezek. 14:14) Daniel no nkwa nda nyina Jehovah dɔɔ no, osiandɛ nna n’abrabɔ da nsew.—Dan. 10:​11, 19. w23.08 2 ¶1-2

Sɛ epɛ dɛ etɔ dan bi a, ekyingye biara nnyi ho dɛ, warankasa bɔkɔ akɔhwɛ dan no nye mbrɛ no mu nyina tse mbrɛ ɔbɛyɛ a ebohu fie a daakye ebɛtsena mu no yie. Sɛ yɛrekenkan Bible no so a, yebotum ayɛ biribi a ɔtse dɛm. Sɛ ekenkan Bible no enyido enyido, na annyɛ ho nhwehwɛmu annkɔ ekyir a, ɔnodze ‘Nyankopɔn asɛm mu mfitsiasesɛm’ no nkotsee na ibohu. (Heb. 5:12) Tse dɛ mfatoho a yɛyɛe faa dan a epɛ dɛ etɔ ho no, sɛ ekenkan Bible no na ebɛtse ase a, ɔsɛ dɛ “ekɔ mu” kyerɛ dɛ, ɔsɛ dɛ ehwehwɛ mu yie ama eetum atse ase. Kwan kor a sɛ efa do sua Bible no a ɔbɔboa wo ma aatse ase nye dɛ ebɔhwɛ mbrɛ dza erekenkan no nye nsɛm afofor a ɔwɔ Bible mu no hyia no. Dza Bible no kyerɛkyerɛ a egye dzi nye siantsir a egye dzi no, bɔ mbɔdzen dɛ ebɛtse ase yie. Nsɛm bi wɔ Bible mu a, ɔyɛ dzen dɛ yɛbɛtse ase. Naaso sɛ yɛyɛ nsɛm a ɔtse dɛm no mu nhwehwɛmu kɔ ekyir a, ɔbɔboa hɛn ma yaatse Bible no ase yie. Ɔsomafo Paul hyɛɛ no nuanom Christianfo nkuran dɛ wɔnyer hɔnho nsua Nyankopɔn n’Asɛm no mbrɛ ɔbɛyɛ a wobotum ‘ehu nokwar no ne tɛtɛr, ne tsentsen, no krɔn nye mbrɛ no mu dɔ no.’ Sɛ wɔyɛ dɛm a, ɔbɛma ‘wɔagye ndwow na woetsintsim’ wɔ gyedzi no mu. (Eph. 3:​14-19) Dɛmara na ɔsɛ dɛ hɛn so yɛyɛ. w23.10 18 ¶1-3