15 Na vosa vakayalovinaka e vakaseavutaka na cudru,+
Ia na vosa kaukaua e vakatubura na cudru.+
2 Na yamena na vuku e vakayagataka vinaka na ka e kila,+
Ia na gusuna na lialia e tavusoya na ka lialia.
3 Na mata i Jiova e tiko ena veivanua kece,
E vakaraici ira tiko na ca kei ira na vinaka.+
4 Na yame lewai vinaka e kau ni bula,+
Ia na vosagaga e vakavuyalolailai.
5 O koya e lialia e beca na veivakavulici nei tamana,+
Ia na tamata yalomatua e muria na veivakadodonutaki.+
6 Na vale ni yalododonu e levu kina na iyau,
Ia na iyau ni tamata ca e vakaleqai koya ga.+
7 Na tebenigusudra na vuku e tukuna na ka era kila,+
Ia na lomadra na lialia e sega ni va ya.+
8 Na nodra isoro na tamata ca e sevaka o Jiova,+
Ia na nodra masu na yalododonu e taleitaka o koya.+
9 E sevaka o Jiova na ivalavala ni tamata ca,+
Ia e lomani koya e saga me cakadodonu.+
10 Na veivakavulici ena ca beka vei koya e biuta na sala,+
Ia o koya e cata na veivunauci ena mate.+
11 Na iBulubulu kei na vanua ni rusa e tu ena mata i Jiova.+
Sa qai wacava na lomadra na luve ni tamata!+
12 Na dauveivakalialiai e sega ni taleitaki koya e vakadodonutaki koya.+
Ena sega ni tarogi ira na vuku.+
13 Ni marau na lomada e vinaka kina na matada,
Ia ni rarawa na lomada eda lomabibi kina.+
14 Na loma ni tamata yalomatua e qara na kilaka,+
Ia na gusuna na lialia e kania na ka lialia.+
15 E ca na nona siga kece o koya e vakaloloma tu,+
Ia o koya e marau na lomana e kana magiti tiko ga.+
16 E vinaka na ka lailai ni tu vata kei na rerevaki Jiova+
E ca ni levu na iyau qai tu vata kei na nuiqawaqawa.+
17 E vinaka na veleti kakana draudrau e tu vata kei na loloma+
E ca na bulumakau uro e tu vata kei na veicati.+
18 Na tamata cudrucudru e vakatubuveiba,+
Ia o koya e berabera ni cudru e tarova na veiba.+
19 Na sala ni vucesa e vaka na bai votovotoa,+
Ia na sala ni yalododonu e vaka na gaunisala tautauvata.+
20 Na gone vuku e vakamarautaki tamana,+
Ia na tamata lialia e beci tinana.+
21 Na yalowai e marautaka na ka lialia,+
Ia na tamata yalomatua e lako vakadodonu.+
22 E seva na ka e nanumi ni sega na veivosaki,
Ia e vakavatukana na sasaga ni levu na daunivakasala.+
23 E marau na tamata ni donu na ka e tukuna,+
Kei na vosa ena gauna donu e yaga dina!+
24 Na sala ni bula e lako cake vei koya e yalomatua,+
Me gole tani kina mai na iBulubulu e toka e ra.+
25 Ena basuka o Jiova na nona vale na viavialevu,+
Ia ena maroroya na iyalayala ni nona vanua na yada.+
26 E sevaka o Jiova na nona inaki na tamata ca,+
Ia na vosa rogo vinaka e savasava vua.+
27 O koya e rawatubu vakailawaki e kauta mai na leqa ina nona vuvale,+
Ia o koya e cata na veivaqumi ena bula tiko ga.+
28 Na loma ni tamata yalododonu e vakasama mada qai vosa,+
Ia na gusudra na tamata ca e tavusoya na ka ca.
29 O Jiova e yawaki ira na tamata ca,
Ia e rogoca na nodra masu na yalododonu.+
30 Na serau ni mata e vakamarautaka na lomada,
Na irogo vinaka e vakabulabulataka na sui.+
31 O koya e rogoca na ivunau ni bula
E toka dei ena kedra maliwa na vuku.+
32 O koya e bese ni vakavulici e cata na nona bula,+
Ia o koya e rogoca na veivakavulici e rawata na yalomatua.+
33 Na rerevaki Jiova e vakavulica e dua me vuku,+
E tarava mai na yalomalumalumu na lagilagi.+