Jeremaia
9 Me wai mada ga na uluqu,
Me ivurevure ni wainimata na mataqu!+
Meu qai tagi ena siga kei na bogi
Nira sa vakamatei na kainoqu.
2 Me dua mada ga na noqu burenivulagi ena vanua talasiga!
Meu qai biuti ira na kainoqu meu gole tani mai vei ira,
Nira dau veibutakoci kece,+
Na isoqosoqo dau veivakaisini.
3 Era loveca na yamedra me vaka na dakaititi,
E takalevu na lasu ena vanua, era sega ni yalodina.+
“Era cakava veitaravi na ka ca,
Era sega ni vakarorogo vei au,”+ e kaya o Jiova.
4 “Moni dui qarauna na wekamuni,
Moni kua ni nuitaka na tacimuni.
5 Era dui lawakitaka na wekadra,
E sega ni dua e vosa dina.
Era vakavulica na yamedra me vosa lasu.+
Era vakaocai ira ga ena caka ca.
6 O vakaitikotiko ena loma ni lawaki.
Ena vuku ni nodra lawaki era sega ni via kilai au,” e kaya o Jiova.
7 Ia qo na ka e kaya o Jiova ni lewe vuqa:*
“Au na vakawaicalataki ira meu tovolei ira,+
Na cava tale meu cakava vua na goneyalewa ni noqu tamata?
8 Na yamedra e gasau dau veivakamatei e vosataka na veivakaisini.
Ena gusuna e vosa veivakacegui na tamata vua na wekana,
Ia e lomana, e bukia na vere.”
9 “Au na sega ni tarogi ira ena ka qo?” e kaya o Jiova.
“Au na sega ni cudruva na matanitu va qori?+
10 Au na tagicaka, au na osivaka na veiulunivanua
Au na lagata e dua na sere ni lolosi ena vuku ni vanua veico ni veikau,
Ni vakamai me kua ni dua e lakova,
E sega ni rogoci kina na domo ni manumanu.
Era dro na manumanuvuka ni lomalagi kei na manumanu, era sa yali.+
11 Au na vukici Jerusalemi me ibinibini vatu,+ me qara ni jakoli.*+
Au na vakalala na veikoro e Juta me kua ni dua e tiko kina.+
12 O cei e vuku me kila qo?
O cei e vosa vua na gusu i Jiova me tukuna?
Na cava e rusa kina na vanua?
Na cava e malai kina me vaka na vanua talasiga,
Me kua ni dua e lakova?”
13 E kaya mai o Jiova: “Nira biuta na noqu lawa* au tauca e matadra, nira sega ni muria se rogoca na noqu vosa. 14 Ia era muria na lomadra ena yalokaukaua,+ era muria tale ga na ivakatakarakara kei Peali e vakavulici ira kina na tamadra mera cakava.+ 15 O koya gona, qo na ka e kaya o Jiova ni lewe vuqa, na Kalou ni Isireli, ‘Au na vakani ira na tamata qo ena kaugaga, au na vagunuvi ira ena wai poisoni.+ 16 Au na vakasavi ira ina veimatanitu era sega ni kila, o ira kei na tukadra,+ au na tala na iseleiwau me muri ira meu vakawabokotaki ira mada.’+
17 Qo na ka e kaya o Jiova ni lewe vuqa,
‘Moni vakasamataka na ka e yaco.
Moni kacivi ira mai na yalewa dau laga sere ni lolosi,+
Moni talatala vei ira na yalewa era daunitagi mera lako mai,
18 Mera vakusakusa mai mera lelevaki keda,
Me drodro mai matada na wainimata
Me tiri na wai mai na bekabekanimatada.+
19 Ni rogo mai Saioni na domo ni lele:+
“Oilei eda sa yanaraki!
Eda sa madua vakalevu!
Nida sa biuta na vanua, era sa basuka na noda itikotiko.”+
20 Ia moni rogoca na yalewa na vosa i Jiova.
Me rogoca na daligamuni na vosa ni gusuna.
Moni vakavulici ira na luvemuni yalewa ena tagi qo,
Mera veivakavulici ena ilagalaga ni sere ni lolosi qo.+
21 Ni sa cabe mai o mate ena noda katubaleka,
Sa curu ina noda valececere vakabai
Me muduki ira na gone mai gaunisala
Kei ira na cauravou ena rara ni koro.’+
22 Mo kaya, ‘Qo na ka e tukuna o Jiova:
“Ena lutu na yago ni tamata mate me vaka na maniwa ena delaniqele,
Me vaka na iyatu covuata e tamusuki oti e vakavoca na dautatamusuki,
Qai sega ni dua e kumuna.”’”+
23 Qo na ka e kaya o Jiova:
“Me kua ni sakitaka na tamata vuku na nona vuku,+
Me kua ni sakitaka na tamata kaukaua na nona kaukaua,
Me kua ni sakitaka na tamata vutuniyau na nona iyau.”+
24 “Ia o koya e sakitaka e dua na ka me sakitaka qo:
Ni yalomatua me kilai au,+
Ni o yau o Jiova, o koya e dei na nona loloma, e lewadodonu, e cakadodonu e vuravura,+
Niu taleitaka na ka qori,”+ e kaya o Jiova.
25 “Raica! Sa voleka mai na gauna,” e kaya o Jiova, “au na totogitaki ira era cili, ia era sega ni cili dina,+ 26 o Ijipita+ kei Juta+ kei Itomi+ kei ira na Amoni+ kei Moapi+ kei ira kece na tiko ena vanua talasiga+ era tasia na nodra kanavalavala, nira sega ni cili na matanitu kece qori, era sega tale ga ni ciliva na lomadra o ira taucoko na vuvale ni Isireli.”+