iKarua ni Samuela

5 Toso na gauna era lako yani na yavusa kece e Isireli vei Tevita i Epironi,+ era kaya: “Raica! O keimami na suimuni kei na lewemuni.*+ 2 Ena veigauna sa oti ni tui tiko o Saula, o kemuni ga oni dau liutaki ira yani na Isireli ena ivalu.*+ E qai tukuna vei kemuni o Jiova: ‘O na vakatawai ira na noqu tamata na Isireli, o na liutaki ira na Isireli.’”+ 3 Era mani lako kece yani na qase ni Isireli vua na tui e Epironi, ni veiyalayalati oti kei ira+ o Tui Tevita ena mata i Jiova e Epironi. Era lumuti Tevita sara me tui Isireli.+

4 E yabaki 30 o Tevita ena gauna e buli kina me tui qai veiliutaki me 40 na yabaki.+ 5 E liutaki Juta mai Epironi me vitu na yabaki ono na vula, e veiliutaki mai Jerusalemi+ me 33 na yabaki me lewai Isireli taucoko kei Juta. 6 E lako i Jerusalemi na tui kei ira na nona tamata mera valuti ira na Jepusaiti+ era tawana tiko na vanua. Era vakatanini Tevita: “O na sega ni lako mai ke! Era na cemuri iko mada ga na mataboko kei na gera.” Era nanuma, ‘Ena sega ni lako mai ke o Tevita.’+ 7 Ia e valuta o Tevita na koro kaukaua o Saioni, sa Koro i Tevita+ ena gauna qo. 8 E mani kaya o Tevita ena siga oya: “O ira na mokuti ira na Jepusaiti mera curu ena ikeliniwai mera mokuti ira ‘na gera kei na mataboko,’ e cati ira o Tevita!” Oya na vuna e tukuni kina: “Era na sega ni lako mai vale na mataboko kei na gera.” 9 E lai vakaitikotiko o Tevita ena koro kaukaua, e qai vakatokai* me Koro i Tevita. E tara vale wavoki sara o Tevita mai na Buke*+ me gole i loma.+ 10 E kaukaua tiko ga o Tevita+ ni tokoni koya o Jiova, na Kalou ni lewe vuqa.*+

11 E tala eso na italai o Tui Airami+ e Taia vei Tevita, e vakauta tale ga na kau sitari,+ e talai ira na matai ni kau kei ira na matai ni vatu mera tara na lalaga, era tara sara na vale* i Tevita.+ 12 E kila o Tevita ni sa vakataudeitaki koya o Jiova me tui Isireli,+ e vakacerecerea tale ga na nona matanitu+ ena vukudra na nona tamata na Isireli.+

13 E kauta o Tevita eso tale na watina kei na watina lalai+ mai Jerusalemi ni lesu mai Epironi, e sucu e levu tale na luvena tagane kei na luvena yalewa o Tevita.+ 14 Qo na yacadra na luvena era sucu e Jerusalemi: o Samua, o Sopapi, o Necani,+ o Solomoni,+ 15 o Ipiari, o Ilisua, o Nefeki, o Jafia, 16 o Ilisama, o Eliata, kei Elifeleti.

17 Nira rogoca na kai Filisitia ni sa lumuti o Tevita me tui Isireli,+ era lako cake na kai Filisitia kece mera vaqarai Tevita.+ Ni rogoca qori o Tevita e lako sobu ina idrodro.+ 18 Era lako yani na kai Filisitia, ra qai yatuni ena Buca o Refeimi.+ 19 E tarogi Jiova sara o Tevita,+ e kaya: “Meu lako cake meu valuti ira na kai Filisitia? Oni na soli ira e ligaqu?” E mani tukuna vei Tevita o Jiova: “Lako cake, au na soli ira dina na kai Filisitia e ligamu.”+ 20 E mani lako o Tevita i Peali-pirasimi qai mokuti ira e kea. E tukuna sara: “E vakadrukai ira na kequ meca o Jiova+ e mataqu me vaka na tacoka ni wai.” Qori na vuna e vakatoka kina na vanua oya me o Peali-pirasimi.*+ 21 Era biuta tu e kea na kai Filisitia na nodra matakau qai kauta tani o Tevita kei ira na nona tamata.

22 Oti era lako cake tale yani na kai Filisitia mera yatuni ena Buca o Refeimi.+ 23 E tarogi Jiova sara o Tevita, ia e kaya o koya: “Kua ni lako cake vei ira. Mo lako yani e dakudra, mo ravuti ira donuya na veibeaka.* 24 Ni o rogoca ga na rorogo ni tayabe ena ulu ni veibeaka, mo yavala sara, ni liu vei iko o Jiova me mokuta na nodra mataivalu na kai Filisitia.” 25 E cakava sara qori o Tevita me vaka ga e vakaroti koya kina o Jiova, e mokuti ira na kai Filisitia+ mai Kipa+ me yaco sara i Keseri.+