Nodra Cakacaka na Yapositolo

25 O koya gona, ni oti e tolu na siga nona yaco yani o Fesito+ ina yasayasa o Sisaria, e gole cake sara i Jerusalemi. 2 Era mani vakatukutukutaki Paula vua na iliuliu ni bete kei na nodra turaga na Jiu.+ Era vakamasuti Fesito 3 me talatala mada me lako mai Jerusalemi o Paula me rawarawa kina nodra vakamatei koya nira na waraki koya lo toka e gaunisala.+ 4 E qai kaya o Fesito ni sa na tiko mada ga mai Sisaria o Paula, o koya ga sa na vakarau lako i kea. 5 E kaya o koya, “O ira ga na nomudou iliuliu, me keimami lako vata sobu mera qai lai beitaki koya e kea ke dua na ka ca me beitaki kina.”+

6 Ni oti e walu se tini na siga nona tiko vata kei ira, sa qai lako sobu i Sisaria. Ena siga tarava sa lai dabe sara ena idabedabe ni veilewai qai vakarota me kau yani vua o Paula. 7 Ni yaco yani o Paula, era lai tu wavokiti koya sara na Jiu era lako sobu mai Jerusalemi, era beitaki koya ena levu sara na cala bibi, ia era sega ni vakadinadinataka rawa.+

8 E mani kaya o Paula ena vuku ni nodra veibeitaki: “Au sega sara ga ni valavala ca ena neimami Lawa na Jiu, ena valenisoro, se vei Sisa.”+ 9 Ia e kaya vei Paula o Fesito ena nona via vakayalovinakataki ira na Jiu:+ “O via lako cake i Jerusalemi mo lai lewai mai kea ena vuku ni veibeitaki qo?” 10 E qai kaya o Paula: “Au sa mai tu qo ena mata ni idabedabe ni veilewai i Sisa, na vanua e dodonu meu lewai kina. E sega ni dua na ka ca au cakava vei ira na Jiu, me vaka ga oni kila vinaka. 11 Keu daucaka cala au qai cakava e dua na ka e dodonu meu mate kina,+ au na tu vakarau meu mate. Ia ke sega ni dina na ka kece era beitaki au kina, e sega ni dua e tu vua na dodonu me soli au vei ira. Au vinakata me rogoci au o Sisa!”+ 12 Ni vosa oti o Fesito vei ira na daunivakasala, sa qai kaya: “O kerea me rogoci iko tale o Sisa, o sa na kau vei Sisa.”

13 Ni oti e vica na siga, erau yaco yani i Sisaria o Akaripa* na tui kei Perinaise* me rau lai sikovi Fesito. 14 Oti e vica na siga nodrau tiko e kea, sa qai vakamacalataka o Fesito vua na tui na veika e baleti Paula, e kaya:

“E tiko qo e dua na tamata a biuta tu e valeniveivesu o Filikesa. 15 Niu se tiko mai Jerusalemi, era mai tukuni koya vei au na iliuliu ni bete kei ira na nodra qase na Jiu,+ ra qai kerea meu lewai koya me totogitaki. 16 Au qai kaya vei ira, e sega ni ivakarau vakaRoma me soli yani e dua vei ira na beitaki koya, ni bera ni sotavi ira sara ga na veibeitaki qai soli vua na gauna me vosa ena ka e beitaki kina.+ 17 Nira yaco gona yani, au sega tale ni wawa. Au sa dabe sara ga ena idabedabe ni veilewai ena siga e tarava au qai vakarota me kau mai na tamata ya. 18 Nira mai vosa na veibeitaki, era sega ni beitaki koya ena ka ca me vaka na ka au nanuma.+ 19 Era veiba ga kei koya ena ka e vauca na nodra lotu+ kei na ka e baleta e dua na tamata sa mate na yacana o Jisu, ia e kaya tiko ga o Paula ni bula tiko.+ 20 Niu sega ni kila se meu walia vakacava na leqa qo, au mani tarogi koya ke vinakata me lako i Jerusalemi me lai lewai ga mai kea ena veika e beitaki kina.+ 21 Ia ni kerea o Paula me waraka ga na lewa ni empara,+ au mani vakarota me tiko ga me yacova na noqu talai koya cake vei Sisa.”

22 E qai kaya vei Fesito o Akaripa: “Au via rogoca sara ga na tamata qori.”+ Mani sauma vua: “Oni na rogoci koya nimataka.” 23 Ena siga tarava, ni rau curu yani ena valenisoqo o Akaripa kei Perinaise, na nodrau ivukivuki e vaka sara ga ni rau dua na ka, rau curu vata kei ira na komada ni mataivalu, kei ira na turaga dokai ena koro. Sa qai vakarota o Fesito me kau mai o Paula. 24 E kaya o Fesito: “Tui Akaripa kei kemuni kece na turaga, sa tu qo e matamuni o koya era vakatukutukutaka vei au na Jiu kece ena vanua qo kei ira e Jerusalemi ena nodra kailavaka voli ni sega ni yaga me bula tale tiko.+ 25 Ia au raica ni sega sara ga ni dua na nona cala me mate kina.+ O koya gona, ni kerea me rogoci koya tale na empara, au sa mani vakatulewataka meu na talai koya yani. 26 Ia au se sega ni vakadeitaka e dua na ka meu vola vua na noqu Turaga. Au kauti koya mai kina e matamuni, vakabibi e matamuni Tui Akaripa ni oti na veitarotarogi qo, sa na rawa ni dua na ka au vola. 27 Ni ka sesewa vei au meu tala tu e dua na kaivesu au qai sega ni vakamatatataka na ka e beitaki kina.”