Lako Yani

37 E qai cakava na Kato+ o Pisalieli+ mai na kau na akasia. E rua veimama na kiupiti* na kena balavu, dua veimama na kiupiti na kena raba, qai dua veimama na kiupiti na kena cere.+ 2 E ubia o koya ena koula dina na lomana kei na dagona qai cakava na iukuuku koula me wavokita na batibatina.+ 3 Oti oya e cakava e va na kena rigi koula, me toka ena dela ni yavana vava, rua na rigi ena dua na yasana, qai rua na rigi ena yasana adua. 4 E cakava tarava na ivua mai na kau na akasia qai ubia ena koula.+ 5 E qai daramaka na ivua ena rigi e tu ena baba ni Kato me colati kina na Kato.+

6 E cakava na kena isogo ena koula dina.+ E rua veimama na kiupiti na kena balavu, qai dua veimama na kiupiti na kena raba.+ 7 E qai cakava ena koula e tukilaki e rua na jerupi+ ena mua ruarua ni isogo.+ 8 E dua na jerupi ena dua na muana, kei na dua tale na jerupi ena muana adua. E cakava na jerupi ena mua ni isogo ruarua. 9 Me rau tevuka cake tu na jerupi na tabadrau ruarua, me vakaruruga na isogo na tabadrau.+ Me rau veiqaravi tu, na matadrau e qara tu ina isogo.+

10 E qai cakava e dua na teveli mai na kau na akasia.+ E rua na kiupiti na kena balavu, dua na kiupiti na kena raba, qai dua veimama na kiupiti na kena cere.+ 11 E ubia ena koula dina, qai cakava na iukuuku koula me wavokita na batibatina. 12 E cakava tarava e dua na tutuna me tautauvata kei na rabaniliga,* qai wavokita na tutuna na iukuuku koula. 13 E cakava tale ga e va na kena rigi koula qai biuta na rigi ena tutuna vava, ena vanua e tiko kina na va na yavana. 14 E tu volekata ga na tutuna na rigi me icurucuru ni ivua me colati kina na teveli. 15 E qai cakava na kena ivua mai na kau na akasia qai ubia ena koula me colati kina na teveli. 16 Oti oya e cakava mai na koula dina na iyaya me biu ena dela ni teveli—kena disi, kena bilo, kena boulu kei na kena itakitaki me dau livi kina na isoro liviraki.+

17 E qai cakava tale ga o koya na itutu ni cina+ ena koula dina. E cakava na itutu ni cina mai na dua ga na tikina e tukilaki, qori na kena itutu, na tolona, kena bilo, kena iukuuku mokimokiti, kei na sena.+ 18 E ono na tabana e basoga mai na tolona, e tolu na taba ni itutu ni cina mai na dua na yasana, qai tolu na tabana ena yasana adua. 19 E tolu na bilo e buli vaka na se ni amodi e tiko ena dua na iwasewase ni tabana, qai biu veitaravi na iukuuku mokimokiti kei na sena ena iwasewase ni tabana adua, e biu kina e tolu na bilo e buli vaka na se ni amodi qai biu veitaravi kina na iukuuku mokimokiti kei na sena. Qo na ka e caka ena ono na tabana e basoga mai na tolo ni itutu ni cina. 20 Ena tolo ni itutu ni cina e tiko kina e va na bilo e buli vaka na se ni amodi qai biu veitaravi kina na iukuuku mokimokiti kei na sena. 21 E tiko e dua na iukuuku mokimokiti ena ruku ni imatai ni rua na tabana erau basoga mai tolona, dua tale na iukuuku mokimokiti ena ruku ni rua na tabana e tarava, kei na dua tale na iukuuku mokimokiti ena ruku ni rua tale na tabana e tarava, ena ono taucoko na tabana e basoga mai na tolo ni itutu ni cina. 22 Na iukuuku mokimokiti kei na tabadra, na itutu ni cina taucoko tale ga e caka mai na dua ga na tikinikoula dina e tukilaki. 23 E qai cakava mai na koula dina e vitu na kena cina,+ na kena iqamu ni vauvau ni cina, kei na kena itawatawa ni vovo ni matanicina. 24 E cakava na ka qori kei na kena iyaya kece mai na dua na taledi* na koula dina.

25 E cakava na icabocabo ni ka boivinaka+ mai na kau na akasia. E sukuea,* e dua na kiupiti na kena balavu, dua na kiupiti na kena raba, qai rua na kiupiti na kena cere. E caka vata kei na kena ileu.+ 26 E ubia ena koula dina na delana, na yasana kece, kei na kena ileu, qai cakava na iukuuku koula me wavolita na batibatina. 27 E cakava me rau yarua na rigi koula ena ruku ni iukuuku ena rua na yasana erau toka veibasai, me taura tu na ivua me dau colati kina. 28 Oti oya e cakava na kena ivua mai na kau na akasia qai ubia ena koula. 29 E cakava tale ga na waiwai tabu ni veilumuti,+ kei na ka boivinaka dau vakamai e savasava+ e waki vakamaqosa.*