iKarua ni Veigauna

17 E tui sara o Josafati+ na luvena me sosomitaki koya, e vakataudeitaka na nona veiliutaki e Isireli. 2 E biuti ira na mataivalu ena koro vakabai kece e Juta, e biuti ira na matasotia ena vanua o Juta kei na koro kece e Ifireimi e vakadruka o Esa na tamana.+ 3 E tokoni Josafati tiko ga o Jiova, ni muria na ivalavala e liu nei Tevita na tukana,+ e sega ni vaqarai ira na Peali. 4 E qara na Kalou i tamana+ qai muria* na nona ivakaro, e sega ni muria na nodra ivalavala na Isireli.+ 5 E vakataudeitaka tiko ga o Jiova na matanitu e ligana,+ era soli iloloma tiko ga vei Josafati o ira kece na Juta, e levu na nona iyau qai dokai vakalevu.+ 6 E doudou na lomana me muria na sala i Jiova, e kauta tani mada ga na vanua cecere+ kei na duru ni sokalou*+ mai Juta.

7 Ena ikatolu ni yabaki ni nona veiliutaki, e talatala sara me ratou lako mai na nona turaga, o Penieli, o Opetaia, o Sakaraia, o Nicaneli, kei Maikaia me ratou veivakavulici ena koro e Juta. 8 Eratou lako tale ga mai na Livai: o Semaia, o Necanaia, o Sepataia, o Asaeli, o Simiramoci, o Jionacani, o Atonaija, o Topaija, kei Topi-atonaia, erau veitomani mai o Ilisama kei Jorami erau bete.+ 9 Eratou tekivu veivakavulici e Juta, eratou kauta tiko na ivola ni Lawa i Jiova,+ eratou lakova na koro kece e Juta me ratou vakavulici ira na lewenivanua.

10 Era domobulataki Jiova na matanitu kece ena veivanua volekati Juta, era sega ni valuti Josafati. 11 Era kauta yani na iloloma na kai Filisitia vei Josafati, kei na ilavo me ivakacavacava. Era kauta vua na kai Arapea e 7,700 na tamanisipi kei na 7,700 na me tagane mai na nodra qelenimanumanu.

12 E levu tiko ga na ka e rawata o Josafati,+ e tara tiko ga e Juta na vanua vakabai+ kei na veikoro ni iyau.+ 13 E levu sara na ka e cakava ena koro e Juta, era tiko mai Jerusalemi na nona sotia, era tamataivalu qaqa. 14 Era wasewasei me vaka na mataqali nei tamadra: vei ira na Juta, o ira na turaga ni vica vata na udolu, e liutaki ira o Atina, era tomani koya e 300,000 na tamataivalu qaqa.+ 15 E taravi koya na turaga o Jionanai, era tomani koya e 280,000. 16 E taravi koya tale ga o Amasaia na luvei Sikiri e bole me qaravi Jiova, era tomani koya e 200,000 na tamataivalu qaqa. 17 Vei ira na Penijamini,+ o Eliata e dua na tamataivalu qaqa, era tomani koya e 200,000 na tamata era vakaiyaragi ena dakaititi kei

na isasabai.+ 18 E taravi koya o Jiosapati, era tomani koya e 180,000 na tamata era vakarautaki ena mataivalu. 19 Era veiqaravi vua na tui o ira qori, me kedra ikuri o ira e lesia na tui ena koro vakabai e Juta taucoko.+