Isikeli

18 E vosa tale vei au o Jiova, e kaya: 2 “Na cava na ibalebale ni nomuni cavuta tiko na vosa vakaibalebale qo ena vanua o Isireli, ‘Era kania na tama na vuanivaini vou, e wiwi kina na batidra na luvedra’?+

3 “‘Niu bula tiko,’ e kaya na Turaga Cecere Duadua o Jiova, ‘oni na sega ni cavuta tiko ga na ivosavosa qo e Isireli. 4 Raica! E noqu na bula* kece. E noqu na bula nei tama kei na bula nei luvena. O koya* e valavala ca ena mate.

5 “‘Kaya mada ke yalododonu e dua na tamata, e cakava na ka e dodonu, e vinaka. 6 E sega ni kania na isoro e cabori ina matakau ena veiulunivanua,+ e sega ni nuitaka na matakau vakasisila* ni vuvale ni Isireli, e sega ni vakacacana na watina na kainona+ se veiyacovi kei na yalewa e matenivula tiko,+ 7 e sega ni vakasaurarataka e dua,+ ia e vakasuka na ka e kauta me ivakadei ni dinau,+ e sega ni butakoca e dua,+ e solia na kena vei koya e viakana,+ e vakaisulutaki koya e luvawale,+ 8 e sega ni lavaka se lavaka vakasivia na tubu ni dinau,+ e sega ni cakava na ka e sega ni dodonu,+ e lewai rau vakadodonu e rua,+ 9 e muria tiko ga na noqu lawa, e talairawarawa ena noqu lewa me dina kina. E yalododonu na tamata qo, ena bula tiko ga,’+ e kaya na Turaga Cecere Duadua o Jiova.

10 “‘Ia kaya mada ke sucu e dua na luvena tagane e daubutako,+ se daulaba,*+ se cakava e dua na ka va qori 11 (se sega mada ni vakayacora o tamana na ka va qori), e kania na isoro e cabori ina matakau ena veiulunivanua, e vakacacana na watina na kainona, 12 e vakasaurarataki ira na vakaloloma kei ira na dravudravua,+ e butakoca na ka, e sega ni vakasuka na ivakadei ni dinau, e nuitaka na matakau vakasisila,+ e sevaki na nona itovo,+ 13 e lavaka se lavaka vakasivia na tubu ni dinau,+ ena sega ni bula tiko o luvena. Ena vakamatei sara ga ena sevaki ni ka kece e vakayacora qori. Ena bale ga vua na nona mate.

14 “‘Ia kaya mada ke dua na tama e raica o luvena tagane na nona ivalavala ca kece, e raica ia e sega ni cakava. 15 E sega ni kania na isoro e cabori ina matakau ena veiulunivanua, e sega ni nuitaka na matakau vakasisila ni vuvale ni Isireli, e sega ni vakacacana na watina na kainona, 16 e sega ni vakasaurarataka e dua, e sega ni taura na ivakadei ni dinau, e sega ni butakoca e dua na ka, e solia na kena vei koya e viakana, e vakaisulutaki koya e luvawale, 17 e sega ni vakasaurarataka na dravudravua, e sega ni lavaka vakasivia se lavaka na tubu ni dinau, e muria ga na noqu lewa, e talairawarawa ena noqu lawa. Ena sega ni mate o koya qori ena cala nei tamana. Ena bula tiko ga. 18 Ni veidabui o tamana, e butakoca na tacina qai sega ni caka vinaka vei ira na kainona, ena mate ga ena nona cala.

19 “‘Ia oni na kaya: “Na cava e sega ni sauti luvena kina na cala nei tamana?” Ni cakava o luvena na ka e dodonu, e vinaka, e vakayacora kece na noqu lawa qai muria, ena bula tiko ga.+ 20 Na tamata e valavala ca ena mate.+ Ena sega ni sauti luvena na cala nei tamana, ena sega ni sauti tamana na cala nei luvena. Ena saumi ga vua na yalododonu na nona cakadodonu, ena saumi vua na tamata ca na nona caka ca.+

21 “‘Ke vakanadakuya na tamata ca na ivalavala ca kece e vakayacora me muria na noqu lawa, me cakava na ka e dodonu, e vinaka, ena bula tiko ga o koya. Ena sega ni mate.+ 22 Ena sega ni tarogi* vua na cala kece e vakayacora.+ Ena bula tiko ga ni dodonu na nona ivalavala.’+

23 “‘Vakacava, au taleitaka me mate na tamata ca?’+ e kaya na Turaga Cecere Duadua o Jiova. ‘Au vinakata me saumaki mai na nona ivalavala me bula tiko kina.’+

24 “‘Ni biuta na nona ivalavala dodonu e dua e dau cakadodonu me caka ca, me muria na nodra itovo sevaki kece na tamata ca, ena bula o koya? Ena sega ni nanumi na nona ivalavala dodonu kece.+ Ni sega ni yalodina qai valavala ca, ena mate o koya.+

25 “‘Oni na kaya: “E sega ni dodonu na ivalavala i Jiova.”+ Yalovinaka, moni rogoca na vuvale ni Isireli! E sega ni dodonu na noqu ivalavala?+ O kemuni ga e sega ni dodonu na nomuni ivalavala.+

26 “‘Ni biuta na nona ivalavala dodonu e dua e dau cakadodonu me cakava na ivalavala e sega ni dodonu qai mate kina, ena mate ga ena nona cakacala.

27 “‘Ni vakanadakuya na tamata ca na ivalavala ca e vakayacora me cakava na ka e dodonu qai vinaka, ena vakabulai koya* ga.+ 28 Ni kila qai vakanadakuya na cala kece e vakayacora, ena bula tiko ga. Ena sega ni mate o koya.

29 “‘Ia era na kaya na vuvale ni Isireli: “E sega ni dodonu na ivalavala i Jiova.” Kemuni na vuvale ni Isireli, e sega sara ga ni dodonu na noqu ivalavala?+ O kemuni ga e sega ni dodonu na nomuni ivalavala.’

30 “‘O koya gona, au na lewai kemuni yadua na vuvale ni Isireli me vaka na nomuni ivalavala,’+ e kaya na Turaga Cecere Duadua o Jiova. ‘Moni veivutuni, io moni vakanadakuya na nomuni cala kece, me kua kina ni vakatarabetaki kemuni moni cala. 31 Moni biuta kece na nomuni cakacala,+ moni saga me vou na lomamuni kei na yalomuni,+ na cava moni mate kina,+ kemuni na vuvale ni Isireli?’

32 “‘Au sega ni taleitaka me mate e dua,’+ e kaya na Turaga Cecere Duadua o Jiova. ‘Moni saumaki mai moni bula.’”+