Lako Yani

39 Era qai talia vakamatailalai na wa karakarawa, na vutinisipi lokaloka, kei na isulu kulakula+ me isulu ni veiqaravi ena vanua tabu. Era cakava na isulu tabu nei Eroni,+ me vaka e vakaroti Mosese kina o Jiova.

2 E cakava o koya na efoti+ mai na koula, na wa karakarawa, na vutinisipi lokaloka, na isulu kulakula, kei na lineni matailalai e muloci. 3 Era tukia vakamamare eso na veleti koula, qai musumusuka me wa mera veicurumaki kei na wa karakarawa, na vutinisipi lokaloka, na isulu kulakula, kei na lineni matailalai, qai cula vakaiukuuku. 4 Era cakava na kena tikinisulu ena tabana me semai rau ena rua na tutuna. 5 Na beleti* tali tale ga e sema ena efoti me toka dei kina,+ e tautauvata ga na kena isulu e caka ena koula, na wa karakarawa, na vutinisipi lokaloka, na isulu kulakula, kei na lineni matailalai e muloci, me vaka e vakaroti Mosese kina o Jiova.

6 Era qai cobara na vatu onikisa ena idabedabe koula, ra qai ceuta kina na yacadratou na luvei Isireli me vaka na nodra ceuta na ivakadei.+ 7 E biuta na tikinisulu ena taba ni efoti, me vatu ni ivakananumi vei ira na luvei Isireli,+ me vaka e vakaroti Mosese kina o Jiova. 8 E qai cula na taga ni lomasere+ me vaka na cakacaka ni dauculaiukuuku ni sulu, vaka na cakacaka ni dauculaiukuuku ni efoti, mai na koula, na wa karakarawa, na vutinisipi lokaloka, na isulu kulakula, kei na lineni matailalai e muloci.+ 9 E sukuea* ni sa lobirua. Ena gauna e lobirua kina na taga ni lomasere, na kena balavu kei na kena raba e rauta ni dua na ivakarau ni iqaqalo.* 10 Era vakadabera e loma e va na iyatu vatu. Na imatai ni iyatu na rupi, topasa, kei na emeralita. 11 Na ikarua ni iyatu na tekoisi, na sefaia, kei na jasipa. 12 Na ikatolu ni iyatu na vatu lesemi, na aketi, kei na amecisita. 13 Na ikava ni iyatu na kirisilaite, na onikisa, kei na jate. Era coba ena idabedabe koula. 14 E tautauvata na iwiliwili ni vatu kei na 12 na yacadratou na luvei Isireli e ceuti me vaka na ivakadei, na yaca yadua me matataka e dua vei ratou na 12 na yavusa.

15 Era qai cakava na itaube tobe ena taga ni lomasere, me vaka na dali koula dina.+ 16 Era qai cakava e rua na idabedabe koula kei na rua na rigi koula, qai sema na rua na rigi ena tutuna ruarua ni taga ni lomasere. 17 Oti oya era daramaki rau na dali koula ena rua na rigi ena tutu ni taga ni lomasere. 18 Era qai vakacuruma ena rua na kena idabedabe na mua ni dali ruarua, ra qai sema ina tikinisulu ena taba ni efoti e liu. 19 Era cakava tarava e rua na rigi koula, qai biuti rau ena mua ruarua ni taga ni lomasere e loma, me qara ina efoti.+ 20 Oti era cakava e rua tale na rigi koula qai biuti rau ena mata ni efoti, ena tikinisulu e tabana ruarua, ena tikina e sema ena dela ni beleti* tali ni efoti. 21 Era sa qai vesuka na taga ni lomasere ena wa karakarawa mai na kena rigi ina rigi ni efoti, me toka dei kina na taga ni lomasere ena kena vanua ena efoti, ena dela ni beleti* tali me vaka e vakaroti Mosese kina o Jiova.

22 E qai cakava o koya na isulu balavu tabaleka ni efoti, e talia e dua na dautali isulu mai na wa karakarawa wale ga.+ 23 E dola mai cake e lomadonu na isulu balavu tabaleka, e vaka na domo ni isulunivalu na tikina e dola. E tali wavoki na batibatina me kua kina ni kadresu. 24 Era cakava tarava ena bele ni isulu balavu tabaleka na pomekaraneti mai na wa karakarawa, na vutinisipi lokaloka, kei na isulu kulakula, nira muloci vata. 25 Era cakava na lali mai na koula dina ra qai biuta na lali ena kedra maliwa na pomekaraneti, era wavokita na bele ni isulu balavu tabaleka, ena maliwa ni pomekaraneti, 26 era cakava me veilutuki e dua na lali kei na dua na pomekaraneti, dua na lali dua na pomekaraneti, me wavokita na bele ni isulu balavu tabaleka e dau vakayagataki ena veiqaravi, me vaka ga e vakaroti Mosese kina o Jiova.

27 Ra qai cakava na isulu balavu mai na lineni matailalai e talia na dautali isulu, me nei Eroni kei ratou na luvena tagane,+ 28 kei na ivauniulu+ mai na lineni matailalai, na ivauniulu vakaiukuuku+ mai na lineni matailalai, na tarausese lekaleka mai na lineni matailalai+ e muloci, 29 na ivaunitolo mai na lineni matailalai e muloci, na wa karakarawa, na vutinisipi lokaloka, kei na isulu kulakula era tali vata, me vaka ga e vakaroti Mosese kina o Jiova.

30 Era qai cakava na tikinikoula taliva mai na koula dina me ivakatakilakila tabu ni yalayala, me vaka ga nona ceuta na ivakadei e dua, era ceuta kina na vosa: “E nei Jiova na savasava.”+ 31 Era sema e dua na wa e caka mai na wa karakarawa me tiko kina ena dela ni ivauniulu, me vaka ga e vakaroti Mosese kina o Jiova.

32 E mani vakacavari na cakacaka kece ni valeniveitavaki, na valelaca ni veitavaki, era qai cakava na Isireli na ka kece e vakaroti Mosese kina o Jiova.+ Era cakava sara ga na ka e tukuni vei ira.

33 Era qai kauta vei Mosese na valeniveitavaki,+ na valelaca+ kei na kena iyaya kece: na kena iqamu,+ na kena feremi,+ na kena kau balavu,+ na kena duru tale ga kei na kedra veleti e sivi vakalomana,+ 34 na kena iubi e caka mai na kuli ni tamanisipi boro damudamu,+ na kena iubi e caka mai na kulinisili, na kena ilatilati me ilati,+ 35 na kato ni iVakadinadina, na kena ivua+ vata kei na isogo,+ 36 na teveli, na kena iyaya kece+ kei na madrai dauraici, 37 na itutu ni cina e caka mai na koula dina, na kena cina+ era tuvani tu, na kena iyaya taucoko+ kei na waiwai ni cina,+ 38 na icabocabo+ koula, na waiwai ni veilumuti,+ na ka boivinaka e dau vakamai,+ na ilati*+ ni icurucuru ni valelaca, 39 na icabocabonisoro kopa+ kei na kena lawalawa kopa, na kena ivua,+ na kena iyaya kece,+ na beseni kei na kena itutu,+ 40 na ilatilati ni rara na kedra duru kei na kedra veleti e sivi vakalomana,+ na ilati*+ ni icurucuru ni rara, na kena dali ni valelaca kei na kedra pini ni valelaca,+ na iyaya kece ni veiqaravi ena valeniveitavaki, me baleta na valelaca ni veitavaki, 41 na isulu ni veiqaravi ena itikotiko tabu era tali matailalai, na isulu tabu nei Eroni na bete,+ kei na nodratou isulu ni veiqaravi vakabete na luvena.

42 Era cakava na Isireli na cakacaka kece me vaka ga na ka e vakaroti Mosese kina o Jiova.+ 43 Ni dikeva o Mosese na nodra cakacaka kece, e raica nira cakava me vaka ga e vakarota o Jiova, e qai vosa vakalougatataki ira o Mosese.