Jeremaia
20 Ia e vakarorogo tiko o Pasuri na luvei Ima na bete, e iliuliu tale ga ena vale i Jiova ena gauna e parofisai tiko kina o Jeremaia. 2 E mani mokuti Jeremaia na parofita o Pasuri, e vesuki koya ena ivesu kau+ e tiko ena Matamata Cecere i Penijamini, ena vale i Jiova. 3 Ia ena siga tarava ni sereki Jeremaia oti o Pasuri mai na ivesu kau, e kaya vua o Jeremaia:
“Sa sega ni vakatokai iko o Jiova me o Pasuri, ia me o Rere Wavoki.+ 4 Ni qo na ka e tukuna o Jiova, ‘Au na vakarerei iko kei ira kece na nomu itokani, era na bale ena iseleiwau ni kedra meca ni rai tu na matamu,+ au na soli ira kece na Juta e ligana na tui Papiloni, ena kauti ira vakavesu i Papiloni qai vakamatei ira ena iseleiwau.+ 5 Au na solia na iyau kece ni koro qo, na ka kece e bini tu kina, na kena ka talei kece, kei na nodra iyau kece na tui Juta e ligadra na kedra meca.+ Era na yauta, era na kovea ra qai kauta i Papiloni.+ 6 Ia o iko Pasuri kei ira kece na tiko ena nomu vale, oni na kau vakavesu. O na lako i Papiloni, o na mate kina, o na bulu tale ga e kea kei ira kece na nomu itokani, ni o parofisaitaka vei ira na ka lasu.’”+
7 Oni vakalialiai au kemuni Jiova, au vakalialiai kina.
Oni vakaraitaka vei au na nomuni kaukaua, oni qaqa.+
Au dredrevaki ena siga taucoko,
Era vakalialiai au kece.+
8 Na gauna kece au vosa kina, au dau qolouvaka, au kacivaka,
“Na ivalavala kaukaua kei na veivakarusai!”
Vei au na vosa i Jiova au vakalialiai kina, au vosavakacacataki kina ena siga taucoko.+
Ia e lomaqu, na nona vosa e vaka na bukawaqa e sogo tu ena suiqu,
Au sega ni kinoca rawa,
Au sega ni tarova rawa.+
10 Niu rogoca e levu na itukutuku ca,
E voliti au na rere.+
“Moni tukuna mai, keitou na qai tukuni koya!”
O ira kece era via mai vakacegui au, era raica tiko meu bale:+
“De dua ena cakava o koya na ka lialia,
Meda qaqa da qai totogitaki koya.”
11 Ia o Jiova ga e tokoni au me vaka e dua na dauvala rerevaki.+
Oya na vuna era na tarabe kina o ira na vakararawataki au, era na sega ni qaqa.+
Era na madua vakalevu ni sega ni rawa na ka era saga.
Na nodra madua e sega ni mudu ena tawaguilecavi.+
13 Moni sere vei Jiova! Moni vakacaucautaki Jiova!
Ni vakabula na dravudravua mai na ligadra na daucaka ca.
14 Me ca na siga au sucu kina!
Me kua mada ga ni kalougata na siga e vakasucumi au kina o tinaqu!+
15 Me kalouca na tamata e kauta vei tamaqu na itukutuku vinaka, e kaya:
“Sa sucu e dua na luvemu, e tagane!”
E vakamarautaki koya vakalevu.
16 Na tamata qori me vaka mada ga na koro e vakarusa o Jiova qai sega ni rarawataka.
Me rogoca o koya na tagi ena mataka, kei na kaikaila ena sigalevu tutu.
17 Na cava e sega ni vakamatei au kina o koya niu tiko ena katonigone,
Me noqu ibulubulu ga o tinaqu,
18 Na cava au lako tani kina mai na katonigone
Meu raica na leqa kei na rarawa,
Me oti kina na noqu siga ena madua?+