iMatai ni Samuela

28 Ena gauna oya era soqona na kai Filisitia na nodra mataivalu mera valuti ira na Isireli.+ E kaya sara vei Tevita o Akisi: “O kila ni o na tomani au ina ivalu kei ira na nomu tamata.”+ 2 E kaya vei Akisi o Tevita: “O kila vinaka na ka ena cakava na nomu tamata.” E kaya vei Tevita o Akisi: “Oya na vuna au na lesi iko kina mo dau yadravi* au.”+

3 Ia sa mate o Samuela, era lolositaki koya na Isireli taucoko ra qai buluti koya ena nona koro+ e Rama. E kauti ira tani na dauvakacuru kei na daurairai o Saula mai na vanua.+

4 Era soqoni na kai Filisitia, era lako mera birika na nodra valelaca e Sunemi.+ E mani soqoni ira kece na Isireli o Saula mera birika na nodra valelaca e Kilipoa.+ 5 Ni raica o Saula na nodra keba na kai Filisitia, e rere, e taqaya vakalevu na lomana.+ 6 E dau tarogi Jiova+ o Saula, ia e sega ni rogoci koya o Jiova ena tadra, se na Urimi,+ se na gusudra na parofita. 7 E qai tukuna o Saula vei ira na nona tamata: “Dou qara mai e dua na yalewa dauvakacuru,+ au na lako meu tarogi koya.” Era kaya na nona tamata: “Raica! E dua na yalewa dauvakacuru e tiko mai Edoa.”+

8 E mani vakalecaleca o Saula ni tokara eso tale na isulu, e lako vua na yalewa ena bogi kei na rua na nona tamata. E kaya sara: “Yalovinaka, mo cakaisausau mada me vaka na dauvakacuru,+ mo kauta cake mai vei au o koya au cavuta vei iko.” 9 Ia e kaya vua na yalewa: “O kila vinaka na ka e cakava o Saula ni kauti ira tani na dauvakacuru kei ira na daurairai mai na vanua.+ Na cava o via coriti au kina meu vakamatei?”+ 10 E bubului sara o Saula vua na yalewa ena yaca i Jiova, e kaya: “Me vaka ni bula dina tiko o Jiova, o na sega ni totogitaki ena vuku ni ka qo!” 11 E kaya sara na yalewa: “O cei meu kauta cake mai vei iko?” E sauma o koya: “Mo kauti Samuela cake mai vei au.” 12 Ni raici “Samuela”* ga na yalewa,+ e qolou sara ena domo levu, e kaya vei Saula: “Na cava oni lawakitaki au kina? O kemuni ga o Saula!” 13 E kaya na tui: “Kua ni rere, na cava o raica?” E qai kaya na yalewa vei Saula: “Au raica e dua e vaka na kalou ni lako cake mai na qele.” 14 E tarogi koya sara: “E vakacava tu na kena irairai?” e sauma na yalewa: “E lako cake tiko mai e dua na kenaturaga, e vakaisulu balavu tabaleka tu.”+ E kila sara o Saula ni o “Samuela” ga oya, e tekicuva ina qele qai davo vakatoboicu.

15 E qai kaya vei Saula o “Samuela”: “Na cava o vakasosani au kina ni o kauti au cake mai?” E kaya o Saula: “Au lomaleqa vakalevu. Era valuti au tiko na kai Filisitia, sa biuti au na Kalou, e sega ni vosa vei au ena gusudra na parofita se na tadra,+ oya na vuna au kacivi iko kina mo tukuna vei au na ka meu cakava.”+

16 E kaya o “Samuela”: “Na cava o mai tarogi au kina ni sa biuti iko o Jiova,+ sa kemu meca? 17 Ena vakayacora sara ga o Jiova na nona vosa au tukuna, ena kaliraka tani mai ligamu o Jiova na matanitu me solia vua na kainomu o Tevita.+ 18 Ni o sega ni muria na vosa i Jiova o qai sega ni vakatauca na nona cudru waqawaqa vei ira na Amalekaiti,+ oya na vuna e cakava kina qo vei iko o Jiova ena siga qo. 19 Ena soli iko kei ira na Isireli o Jiova e ligadra na kai Filisitia,+ nimataka dou na tiko vata kei au, o iko+ kei ratou na luvemu tagane.+ Ena solia tale ga o Jiova na nodra mataivalu na Isireli e ligadra na kai Filisitia.”+

20 E bale vakasauri o Saula qai dodo ina qele, e lomaleqataka vakalevu na ka e tukuna o “Samuela.” E malumalumu ni a sega tu ni kana ena siga kei na bogi taucoko oya. 21 Ni lako yani na yalewa vei Saula, e raica ni lomaleqa vakalevu, e kaya vua: “E muria na nomuni vosa na nomuni dauveiqaravi, au bolemate,+ au vakayacora na ka oni tukuna vei au meu cakava. 22 Yalovinaka, moni rogoca na vosa ni nomuni dauveiqaravi. Meu vakarautaka mada e matamuni e dua na tiki ni madrai, moni kania, oni na kaukaua kina ena nomuni ilakolako.” 23 Ia e bese o koya, e kaya: “Au na sega ni kana.” Erau cikevi koya na nona dauveiqaravi kei na yalewa. E qai rogoci ratou, e tucake mai na qele me dabe ena idavodavo. 24 E tiko vua na yalewa mai vale e dua na luvenibulumakau yagovinaka, e vakamatea sara vakatotolo, e taura na falawa me balia, qai vavia na madrai sega ni vakaleveni. 25 E vakarautaka vei Saula kei rau na nona dauveiqaravi, eratou kania sara. Ni oti qori eratou tucake me ratou lako yani ena bogi oya.+